އިންޓަރނެޓް އަގު ހެޔޮކުރުމުގެ މަޝްވަރާތަކުގެ އެންމެ ފަހު މަރްހަލާއަށް އާދެވިއްޖެ: މަލީހް
އިންޓަރނެޓް އަގު ހެޔޮ ކުރުމުގެ މަޝްވަރާތައް ކުރަމުން އަންނަތާ ދުވަސްތަކެއް ވެއްޖެ ކަމަށް ވިދާޅުވި
މިނިސްޓަރ އޮފް ކޮމިއުނިކޭޝަން ސައިންސް އެންޑް ޓެކްނޮލޮޖީ މަލީހް ޖަމާލް
އިންޓަރނެޓް އަގު ހެޔޮކުރުމުގެ މަޝްވަރާތަކުގެ އެންމެ ފަހު މަރްހަލާއަށް އާދެވިފައިވާ ކަމަށް މިނިސްޓަރ އޮފް ކޮމިއުނިކޭޝަން ސައިންސް އެންޑް ޓެކްނޮލޮޖީ މަލީހް ޖަމާލް ވިދާޅުވެއްޖެއެވެ.
އިންޓަރނެޓްގެ އަގު ހެޔޮ ކުރުމުގެ މަޝްވަރާތައް ގޮސްފައިވާ ހިސާބު ހާމަކޮށްދިނުމުގެގޮތުން މިނިސްޓަރ އާންމު ކުރެއްވި ވީޑިއޯއެއްގައި ވިދާޅުވީ އިންޓަރނެޓް އަގު ހެޔޮ ކުރުމަށް ކޮމިއުނިކޭޝަން އޮތޯރިޓީ އޮފް މޯލްޑިވްސް އާއި، ދިވެހިރާއްޖޭގައި އިންޓަރނެޓްގެ ހިދްމަތް ދޭ ކުންފުނިތައް ކަމުގައިވާ އާރްއޯއެލް، ދިރާގު، އުރީދޫ އާއި އެކުގައި މަޝްވަރާތައް ކުރަމުން އަންނަތާ ދުވަސްތަކެއް ވެފައިވާ ކަމަށެވެ. އަދި އެކަމުގެ އެންމެ ފަހުގެ މަރްހަލާއަށް އާދެވިފައިވާ ކަމަށް މިނިސްޓަރ ވިދާޅުވި އެވެ.
މިނިސްޓަރ ވިދާޅުވީ އިންޓަރނެޓްގެ ހިދްމަތްދޭ ކުންފުނިތަކާއެކު، ބޭއްވުނު މަޝްވަރާތަކުގައި މިނިސްޓްރީން ރިއާޔަތް ކޮށްފައިވަނީ ކޮމިއުނިކޭޝަން އޮތޯރިޓީ އޮފް މޯލްޑިވްސް ހަދާފައިވާ ދިރާސާއެއްގެ މައްޗަށް ކަމަށެވެ.
މިނިސްޓަރ ވިދާޅުވީ އިންޓަރނެޓްގެ އަގު ހެޔޮކުރަން، އެ ހިދްމަތްދޭ ކުންފުނިތަކާއި އެކުގައި މަޝްވަރާތައް ކުރިއަށް ގެންދިޔައީ ދެ ފަރާތަށް އެއްބަސްވެވޭ ހިސާބަކަށް ކަންތައް ކުރިއަށް ގެންދިއުމަށް ކަމަށެވެ. އަދި އިންޓަރނެޓް އަގު ހެޔޮ ކުރުމުގެ މަޝްވަރާތަކުގައި ސަރުކާރުން އެންމެ ބޮޑު އިސްކަމެއް ދީފައިވަނީ، ދިވެހިރާއްޖޭގެ އިގްތިސާދް ފުޅާކުރެވޭނެ ގޮތާއި ކުދި އަދި މެދު ފަންތީގެ ވިޔަފާރިތަކަށް މިކަމުން ލުއި ލިބޭނެ ގޮތައް ކަންތައް ބައްޓަން ކުރުމަށް ކަމަށް ވިދާޅުވިއެވެ.
މިނިސްޓަރ ވިދާޅުވީ އިންޓަރނެޓްގެ އަގު ހެޔޮކުރަން ކޮމްޕެޓިޝަނަކަށް ހުޅުވާލަންޖެހުނަސް އެކަމަށް ސަރުކާރުން ފަސްނުޖެހޭނެ ކަމަށެވެ.
