ޒަމާނާއެކު އަންނަ ބަދަލުތަކަށް ހޭނި އެބަދަލު ގަބޫލުކުރަން ޖެހޭ
އަހުމަދު ސަލީމް ވަހަކަދައްކަވަނީ
އަވަހަށް ރަނގަޅު މައުލޫމާތު ރައްޔިތުންނާއި ހަމައަށް ފޯރުކޮށްދިނުމަށްޓަކައި ޓެކްނޮލޮޖީއަށް އަހުލުވެރިވުން ވަރަށް މުހިންމު ކަމަށް ރާއްޖެޓީވީގެ މެނޭޖިން ޑިރެކްޓަރ އަހުމަދު ސަލީމް ވިދާޅުވެއްޖެ އެވެ.
ރައްޔިތުންގެ މަޖިލީހުގެ އިންތިޚާބުގައި މަސައްކަތް ކުރެއްވި ރާއްޖެޓީވީގެ މުވައްޒަފުންގެ އަގުވަޒަން ކުރުމާއި ރާއްޖެ.އެމްވީގެ އައު ވެބްސައިޓް ލޯންޗުކުރުމަށް ބުރާސްފަތި ދުވަހުގެރޭ ބޭއްވި ހަފްލާގައި ވާހަކަދައްކަވަމުން ސަލީމް ވިދާޅުވީ އެކިއެކި އިންތިޚާބުތަކުން ލިބޭ ތަޖުރިބާ މުރާޖާކޮށް ދެން އޮންނަ އިންތިޚާބެއްގެ ކަވަރޭޖެ ކަންކަން ރަނގަޅު ކުރުމަށް ބަލާއިރު ގިނަ ފަހަރަށް ކަންކަމުގެ ހައްލު އައިސްފައި އޮންނަނީ އައު ޓެކްނޮލޮޖީގެ ތެރެއިން ކަމަށެވެ.
ސަލީމް ވިދާޅުވީ ޓެކްނޮލޮޖީ ކިތަންމެ ރަނގަޅުވެފައި ފުރިހަމަ ވީނަމަވެސް އޭގެ ބޭނުން ހިފައިގެން އެކަމެއްގެ ނަތީޖާ ނެރުމަށްޓަކައި އެމަސައްކަތް ކުރާ ޓީމެއްގެ މުރާލިކަމާއި، ހީވާގި ކަމާއި، ތެދުވެރިކަމުގެ އިތުރުން ކަމަށް ކަމޭހިތުން ފަދަ ސިފަތަކާއި ނުލާ ޓެކްނޮލޮޖީ މަސައްކަތް ނުކުރާނެ ކަމަށެވެ.
ސަލީމް އިތުރަށް ވިދާޅުވީ މިހާރު އެންމެންވެސް ވިސްނަން ޖެހިފައިވަނީ ޒަމާނާއިއެކު އަންނަ ބަދަލުތަކަށް ހޭނި އެބަދަލު ގަބޫލުކޮށް އެގޮތަށް ޚިދުމަތް ދޭން ނުކުތުމަށް ކަމަށެވެ.
ކުރިއާއި ޚިލާފަށް މިހާރު ކަންކަން ބަދަލުވެފައިވާކަން ފާހަގަކުރަށްވާ ސަލީމް ވިދާޅުވީ މިހާރު މީހާ ސީދާ މައުލޫމާތު ހިފައިގެން ނުދިޔަ ނަމަވެސް އެމީހަކު ހުރިތަނަކަށް އެމައުލޫމާތު ފޮނުވޭނެގޮތެއް ނުހޯދިއްޖެ ކަމުގައި ވަނީނަމަ އެބަޔަކީ ކާމިޔާބު ބަޔަކަށް ނުވާނެ ކަމަށެވެ. އަދިއެބަޔަކަށް ކުރިއެރުމެއްވެސް ނުހޯދޭނެ ކަމަސް ސަލީމް ވިދާޅުވިއެވެ.
