ރާއްޖެ ޓީވީގެ އަރުޝީފަކީ ގައުމީ ރިސޯސްއެއް: މިނިސްޓަރ މަލީހު
17 މެއި 2019 | ހުކުރު 03:38މީޑީއާތަކުގެ ތެރެއިން އެންމެ އަލިގަދަ ފަނޑުވުމެއް ނެތް ވިދާ ބަބުޅާ ތަރި އަކީ "ރާއްޖެ ޓީވީ" ކަމަށް ވިދާޅުވި
ރާއްޖެ.އެމްވީގެ ވެބްސައިޓް ލޯންޗުކުރުމަށް ބޭއްވި ރަސްމިއްޔާތުގައި މިނިސްޓަރ މުހައްމަދު މަލީހު ޖަމާލް
ރާއްޖެ ޓީވީގެ އަރުޝީފަކީ ގައުމީ ރިސޯސްއެއް ކަމަށާއި އެ ރިސޯސް އަންނަން އޮތް ޖީލްތަކަށް ރައްކާތެރި ކުރެވެން ޖެހޭނެ ކަމަށް މިނިސްޓަރ އޮފް ކޮމިއުނިކޭޝަން، ސައިންސް އެންޑް ޓެކްނޮލޮޖީ މުހައްމަދު މަލީހު ޖަމާލު ވިދާޅުވެއްޖެއެވެ.
ރާއްޖެ.އެމްވީގެ އައު ވެބްސައިޓް ލޯންޗުކުރުމަށް ބޭއްވި ރަސްމިއްޔާތުގައި ވާހަކަދައްކަވަމުން މަލީހު ވިދާޅުވީ ރާއްޖޭގައި ހަރަކާތްތެރިވާ މީޑީއާތަކުގެ ތެރެއިން އެންމެ އަލިގަދަ ފަނޑުވުމެއް ނެތް ވިދާ ބަބުޅާ ތަރި އަކީ "ރާއްޖެ ޓީވީ" ކަމަށެވެ.
އަށް އަހަރުގެ ކުރު މުއްދަތެއްގައި ރާއްޖެ ޓީވީގެ ބްރޭންޑާއި އެކު ވަރުގަދަ ސަހުޝިއްޔަތަކެއް އުފެދިގެން އައި ކަމަށް މިނިސްޓަރ ވިދާޅުވިއެވެ. ރާއްޖެ ޓީވީގެ އޭގެ ނަން އޭގެ ޒާތުގައި އެނގުމުގެ ކުރިންވެސް ރާއްޖެ ޓީވީގައި ހަރަކާތްތެރިވި މުވައްޒަފުންނާއި، ޚާއްސަކޮށް މުވައްޒަފުންގެ ހުނަރާއި، މަސައްކަތަށް ބެހެއްޓި ޝައުގުވެރިކަން މިނިސްޓަރ ވަނީ ފާހަގަ ކުރައްވާފައެވެ.
މިނިސްޓަރ ވިދާޅުވީ ކާމިޔާބު މީޑިއާ އައުޓްލެޓަކަށް ވުމަށްޓަކައި އޭގެ ވިސްނުން މެނޭޖްމަންޓުން ގެނައި ކަމުގައި ވީނަމަވެސް މިހާ ހިސާބަށް އެންމެ ކާމިޔާބު ޓީވީ ސްޓޭޝަނެއްގެ ގޮތުގައި ރާއްޖެޓީވީ ހެދުމުގެ ދައުރު އަދާކޮށްފައިވަނީ ރާއްޖެ ޓީވީގެ ހީވާގި މުވައްޒަފުން ކަމަށެވެ.
ފާއިތުވި އަހަރުތަކަކީ ރާއްޖޭގެ މީޑިއާތަކާއި، މީޑިއާގައި މަސައްކަތް ކުރާ ފަރާތްތަކަށް ވަރަށް ބޮޑޭތި ގޮންޖެހުންތަކެއް ކުރިމަތި ކުރުވި އަހަރުތަކެއްކަން ފާހަގަކުރައްވާ މިނިސްޓަރ ވިދާޅުވީ އެންމެ ގޮންޖެހުން ބޮޑު ދުވަސްވަރުގައި ސިޔާސީ އެކިއެކި ބޭބޭފުޅުން ރާއްޖެ ޓީވީއަށް ގެންނަވާ ޕްރޮގްރާމުތަކުގައި އެ މަސައްލަތަކާއި ބެހޭގޮތުން ރަނގަޅަށް ވާހަކަ ދެކެވުނުތަން ފެނިގެން ދިޔަކަމަށެވެ. އަދި މި ސަރުކާރުގައި ވެސް ޑިމޮކްރެސީ ހަރުދަނާކޮށް ރައްޔިތުންނަށް ސާފު މައުލޫމާތު ފޯރުކޮށްދޭން ގިނަ ބޭފުޅުންގެ ރައުޔު ދެއްކޭނެ ގޮތުގެ މަގު ފަހި ކޮށްދެއްވުމަށް މިނިސްޓަރ ވަނީ އެދިވަޑައިގެންފައެވެ.
