ޓޭންކަރުތަކަށް ދިން ހަމަލާއާ އެކު މެދުއިރުމަތީގައި ހަނގުރާމައެއްގެ ބިރުވެރިކަން!
15 މެއި 2019 | ބުދަ 05:54ހަމަލާދިނީ އީރާނުން ކަމަށް ތުހުމަތުކޮށްފައިވޭ
ހަމަލާދީފައިވާ ނޯވޭގެ ޓޭންކަރުގެ ހަލްގައި ލޯވަޅެއް އެޅިފައި
ސައުދީ އާއި ޔޫއޭއީގެ ތެޔޮ އުފުލާ ބޯޓުތަކަށް ދިން ހަމަލާތަކާ އެކު، މެދު އިރުމަތީގައި ހަނގުރާމައެއް ފެށިދާނެ ކަމުގެ ބިރު ހީވެއްޖެއެވެ.
ހޮރުމޫޒު ކަނޑުއޮޅީގައި އޮންނަ ފުޖައިރާ ބޭރުގައި އޮތް ހަތަރު އުޅަނދަކަށް ހަމަލާދިނީ އާދިއްތަ ދުވަހުގައެވެ. ހަމަލާގައި އެއްވެސް މީހަކަށް ގެއްލުމެއް ވެފައި ނުވާ އިރު، ހަމަލާގެ ސަބަބުން ބޯޓުތަކުން ނުރައްކާތެރި ކެމިކަލެއް ވެސް ނުފައިބާ ކަމަށް ޔޫއޭއީގެ ހާރިޖީ ވުޒާރާއިން ބުނެފައި ވެއެވެ.
ހަމަލާ ދިން ބޯޓުތަކަކީ ސައުދީގެ "އަލް-މަރްޒޮގާ" އަދި "އަމްޖަދް" ނަމަކަށް ކިޔާ ޓޭންކަރުތަކަކަށާއި، ނޯވޭގެ "އަންޑްރެއާ ވިކްޓްރީ" ޓޭންކަރަށާއި ޔޫއޭއީގެ ބަންކަރިން ބާޖެއް ކަމުގައިވާ "ދަ އޭ މިޝޭލް" އަށެވެ. ނޯވޭގެ ބޯޓު ހިންގާ ތޯމް ގްރޫޕުން ބުނީ ފެނުން މަތިން ޖެހުނު ގޮތް ނޭނގޭ އެއްޗެއްގެ ސަބަބުން، ބޯޓުގެ މައިގަނޑުގައި ލޯވަޅެއް އެޅިފައިވާ ކަމަށެވެ. ސައުދީ ޓޭންކަރުތަކުގެ މައިގަނޑަށް ވެސް ގެއްލުން ލިބުނު ކަމަށް ސައުދީން ރިޕޯޓްކޮށްފައި ވެއެވެ.
އެއްވެސް ގައުމަކުން އަދި ރަސްމީ ސިފައެއްގައި މި ހަމަލާގެ ޒިންމާ އެއްވެސް ބައެއްގެ ބޮލުގައި އަޅުވާފައި ނުވާއިރު، ނުރަސްމީ މަސްދަރުތަކުން ބުނެފައި ވަނީ ހަމަލާގެ ފަހަތުގައި އޮތީ އީރާނުގެ އަތެއް ކަމަށެވެ. އަދި މިއީ ހޮރުމޫޒު ކަނޑުއޮޅިން ތެޔޮ ހިފައިގެން ދަތުރުކުރާ ޓޭންކަރުތަކަށް އިންޒާރު ދިނުމުގެ ގޮތުން ހިންގި ފިނޑި އަމަލެއް ކަމަށް ވެސް ބައެއް ފަރާތްތަކުން ސިފަކޮށްފައި ވެއެވެ.
އެމެރިކާ އާއި އީރާނާ ދެމެދު ގުޅުން ގޯސްވެފައިވާ ދަނޑިވަޅެއްގައި، މި ހަމަލާއާ ގުޅިގެން ދެ ގައުމުގެ ގުޅުން އިތުރަށް ގޯސްވާނެ ކަމަށް ބެލެވެއެވެ. މީގެ ކުރިން ވެސް ތަފާތު އެތައް ފަހަރެއްގެ މަތިން އެ ކަނޑުއޮޅި ބަންދުކުރާނެ ކަމުގެ އިންޒާރު އީރާނުން ދީފައިވެއެވެ. ދުނިޔޭގައި އުފައްދާ ތެލާއި ނެޗުރަލް ގޭސްގެ 20 އިންސައްތަ ދަތުރުކުރަނީ ހޮރުމޫޒު ކަނޑުއޮޅިންނެވެ.
