ފުއްގިރި މައްސަލައިގައި އަޑުއެހުމެއް ނުބާއްވާތާ ހަތަރު މަސް
މި މައްސަލައިގައި އެންމެ ފަހުން އަޑުއެހުމެއް ބާއްވާފައިވަނީ 14 އޯގަސްޓު 2023ގައި
ރީގެ ރައީސް، އަބްދުﷲ ޔާމީން
ރ. ފުއްގިރި ކުއްޔަށް ދޫކުރުމުގެ މުއާމަލާތުގެ ތެރެއިން, މަގާމުގެ ނުފޫޒު ބޭނުންކޮށް ރިޝްވަތު ނެގި މައްސަލައިގައި ކުރީގެ ރައީސް އަބްދުﷲ ޔާމީނާއި އިތުރު ފަރާތްތަކެއްގެ މައްޗަށް އުފުލާފައިވާ ދައުވާގެ އަޑުއެހުމެއް ނުބާއްވާތާ 4 މަސްވެއްޖެއެވެ.
މި މައްސަލައިގެ އަޑުއެހުމެއް ނުބާއްވާތާ 4 މަހަށްވުރެ ގިނަދުވަސްވެފައި ވާއިރު، އެކަމާ ގުޅޭގޮތުން ރާއްޖެއެމްވީން ސުވާލު ކުރުމުން ކޯޓުގެ އޮފިޝަލަކު ވިދާޅުވީ، މައްސަލައިގައި އަޑުއެހުމެއް ނުބޭއްވި ގިނަދުވަސް ވަނީ ސެކްޝަންގައި ހުރި މައްސަލަތައް ގިނަވެފައި، ކޯޓުގެ ޖާގަ ނެތުމުން ކަމަށެވެ. އެގޮތުން ކޯޓުގެ ޖާގަ ނެތުމުގެ ސަބަބުން ޝަރީއަތްތައް ހިންގުމަށް ކޯޓު ރޫމްތައް ލިބުމުގައި ދަތިތައް ހުރިކަން އޭނާ ފާހަގަކުރެއްވިއެވެ.
މި މައްސަލައިގައި އެންމެ ފަހުން އަޑުއެހުމެއް ބާއްވާފައިވަނީ 14 އޯގަސްޓު 2023ގައެވެ. އެ ދުވަހުގެ އަޑުއެހުމުގައި އޮތީ ދައުލަތުގެ ހެކިންގެ ހެކިބަސް ނެގުމެވެ.
މެލޭޝިއާގައި ހުންނަ ހައިކޮމިޝަން މެދުވެރިކޮށް މި އަޑުއެހުމުގައި ވަނީ ދައުލަތުގެ ހެކިވެރިއެއްކަމަށްވާ މުހައްމަދު ޝިފާއު ހާޒިރުކޮށްފައެވެ.
އޭނާއަކީ ކުރިން އެމްއެމްޕީއާރްސީގައި މަސައްކަތްކުރެއްވި ފަރާތެކެވެ.
އޭނާ ވިދާޅުވީ، ރ. ފުއްގިރިއާ ގުޅޭގޮތުން ކްރިކް ރިޒާއާއެކު އެމްއެމްޕީއާރްސީން ބައްދަލުވުންތަކެއް ކުރިއަށް ދިޔަކަމަށެވެ. އެ ބައްދަލުވުންތަކުގައި އިތުރު ފަރާތްތައްވެސް ބައިވެރިވިކަމަށް އޭނާ ވިދާޅުވިއެވެ.
ފުއްގިރި ހުށައެޅިފައިވާ އަގަކަށްވުރެ ކުޑަ އަގަކަށް ދޫކުރައްވަނީ ކީއްވެތޯ އަހުމަދު އަދީބާއި އަބްދުﷲ ޒިޔަތު އަރިހު ދެންނެވުމުން، އެއީ ކުރީގެ ރައީސް އަބްދުﷲ ޔާމީނު އަންގަވައިގެން ކަމަށް އެބޭފުޅުން ވިދާޅުވިކަމަށް ހެކިވެރިޔާ ހެކިބަސް ދެއްވަމުން ވިދާޅުވިއެވެ.
އޭނާ ވިދާޅުވީ، އެމްއެމްޕީއާރްސީގައި ކުރިއަށްދިޔަ ބައްދަލުވުމުގައި އޭނާ ބައިވެރިވެވަޑައިގެންފައި ނުވާކަމަށާއި، ނަމަވެސް ބައްދަލުވުމާ ގުޅޭގޮތުން ވަޒީފާގެ މަސްއޫލިއްޔަތުގެ ތެރެއިން ކުރަންޖެހޭ ކަންކަން ކުރެއްވިކަމަށެވެ.
އެ ބައްދަލުވުމުގެ ތެރެއިން ނައިބުރައީސް އަހުމަދު އަދީބުގެ ބޮޑީގާޑު ދަބަހެއް ދެއްވިކަމަށްވެސް ހެކިވެރިޔާ ވިދާޅުވިއެވެ.
