ހުސް ފުޓްބޯޅަ ދަނޑު އަޅާކަމަށް ބުނާ ވާހަކައަށް މަހުލޫފުގެ ރައްދެއް!
ވަޒީރުކަމާ ހަވާލުވެވަޑައިގަތުމަށް ފަހު 100 ވަރަކަށް ރަށަށް ޒިޔާރަތްކުރެއްވި
ޔޫޫތު މިނިސްޓަރ އަހުމަދު މަހުލޫފު
މިނިސްޓްރީ އޮފް ޔޫތު ސްޕޯރޓްސް އެންޑް ކޮމިއުނިޓީ އެމްޕަވަރމަންޓުން ކުރާ މަސައްކަތަކީ ހަމައެކަނި ފުޓުބޯޅަ ދަނޑުތައް އެޅުން ކަމަށް ބުނެ ބައެއް ފަރާތްތަކުން ދައްކާ ވާހަކައަށް ޔޫތު މިނިސްޓަރ އަހުމަދު މަހުލޫފު ރައްދު ދެއްވައިފިއެވެ.
އާދިއްތަ ދުވަހު ޔޫތު މިނިސްޓްރީގައި ބޭއްވި ނޫސްވެރިންގެ ބައްދަލުވުމެއްގައި މިނިސްޓަރ ވިދާޅުވީ، ރަށްރަށަށް ގޮސް ވައުދުތައް ވުމާއި، ކަންކަން ކޮށްދިނުމަށް ނިންމުމުގައި އަބަދު ވެސް އިސްކަންދެނީ އެރަށެއްގެ ރައްޔިތުން އެދޭ ކަންކަން ކޮށްދިނުމަށް ކަމަށާއި، ރަށްރަށަށް ކޮށްދިނުމަށް ނިންމާ ކަންކަމަކީ އެރަށެއްގެ ޒުވާނުންނާއި ކައުންސިލުގެ މަޝްވަރާގެ ދަށުން ނިންމާ ކަންކަން ކަމަށެވެ. އަދި ކުރީގެ ސަރުކާރުން ކަންކަން ނިންމާފައި ވަނީ ރައްޔިތުން ބޭނުންވާ ގޮތެއް ބެލުމެއް ނެތި ކަމަށާއި، މި ސަރުކާރުން އަބަދުވެސް ކަންކަން ނިންމާނީ ރައްޔިތުންގެ ލަަފަ އާއި މަޝްވަރާ ހޯދުމަށް ފަހު ކަމަށް މިނިސްޓަރ ވިދާޅުވިއެވެ.
"އަޅުގަނޑުމެންގެ މަސައްކަތް ބިނާކޮށްގެން މިގެންދަނީ މިހާރު ރަށުގަ ތިބި ޒުވާނުން، ރައްޔިތުން، ކައުންސިލުތަކުން ބޭނުންވާ ކަންކަން ހޯދައި އެކަންކަން ކޮށްދެވޭތޯ. މީގެ ކުރިން އަޅުގަނޑުމެންނަށް ފާހަގަކުރެވިފައި އޮތީ މިނިސްޓްރީގައި އެ ތިއްބެވި ބޭފުޅުން ތިއްބަވައިގެން އެމީހުން ނިންމަނީ ކޮންމެވެސް ރަށެއްގައި ކީއްތޯކޮށްދޭނީ. އެއީ އެވެއަރނަސް ޕްރޮގްރާމެއް ވިޔަސް، ޓްރެއިނިންގއެއް ވިޔަސް، ދަނޑެއް އަޅަން ވިޔަސް، ކޯޓެއް އަޅަން ވިޔަސް މިކަހަލަ ގޮތަކަށް،" މިނިސްޓަރ ވިދާޅުވިއެވެ.
ވަޒީރުކަމާ ހަވާލުވެ ވަޑައިގަތުމަށް ފަހު 100 ވަރަކަށް ރަށަށް ޒިޔާރަތްކުރައްވައި އެ ރަށްރަށުގެ ކައުންސިލާއި ޒުވާނުންނާ ބައްދަލުކޮށް ރަށަށް އެންމެ ބޭނުންވާ ކަންކަމާ ގުޅޭ ގޮތުން މަޝްވަރާ ކުރައްވާފައިވާއިރު، އެންމެ ބޮޑު ގޮންޖެހުމެއް ކަމަށް ފާހަގަ ކުރެވުނީ ކުރީގެ ސަރުކާރުން ފަށާފައިވާ ދަނޑު ތަކުގެ މަސައްކަތްތަކާއި، މިނިސްޓްރީގެ ބެލުމުގެ ދަށުގައި ވީރާނާވެ، ހަލާކުވެފައި ހުރި ޒުވާނުންގެ މަރުކަޒުތައް ފަދަ ތަންތަން ކަމަށް ވެސް މިނިސްޓަރ ވިދާޅުވިއެވެ.
އޭގެ އިތުރުން، ކުޅިވަރު ތަރައްޤީ ކުރުމަށް މި ސަރުކާރުން މުހިއްމު އިސްކަމެއް ދޭނެކަން ފާހަގަކުރައްވައި މިނިސްޓަރ ވިދާޅުވީ، މިއަހަރު ނިމުމުގެ ކުރިން ގާތްގަނޑަކަށް 25 ރަށެއްގެ ފުޓުބޯޅަ ދަނޑު އެޅުމުގެ މަސައްކަތް ފެށި އޭގެ ތެރެއިން ގިނަ ދަނޑުތަކެއްގެ މަސައްކަތް އަވަސް މުއްދަތެއްގެ ތެރޭގައި ނިމޭނެ ކަމަށް ލަފާ ކުރެވޭ ކަމަށެވެ. އަދި ރާއްޖޭގައި ބައިނަލްއަޤުވާމީ މުބާރަތްތައް ބޭއްވުމަށް މަސައްކަތް ކުރައްވާނެ ކަމަށާއި، އެކަމަށް ބޭނުންވާ ވަސީލަތްތައް ޤާއިމުކުރައްވާނެ ކަމަށް ވެސް މިނިސްޓަރ ވިދާޅުވިއެވެ.
މިނިސްޓަރ އިތުރަށް ވިދާޅުވީ، އެހެން އަހަރުތަކާ ޚިލާފަށް ޒުވާނުންނާއި މުޖުތަމައު ބާރުވެރި ކުރުމުގެ މަސައްކަތް މިއަހަރު ހިންގާނީ ޒުވާނުންނާއި ރަށު ކައުންސިލުތަކުގެ ލަފަ އާއި މަޝްވަރާއާ އެކުގައި ކަމަށާއި، އެއްވެސް ކަމެއް އެފަރާތްތަކުގެ ލަފާ ނުހޯދައި ނުނިންމާނެ ކަމަށެވެ.
