މީޑިޔާ ދާއިރާގައި ހުރި ކަންކަން ހައްލުކުރުމަށް މަޝްވަރާކޮށްފި
9 މެއި 2019 | ބުރާސްފަތި 14:53ބަޖެޓް ލިބުމުގައި ހުރި ދަތިކަން ފާހަގަކުރެއްވި
ހޯމް މިނިސްޓްރީގައި ބޭއްވި ބައްދަލުކުރުވުމުގެ ތެރެއިން
މީޑިޔާގެ ދާއިރާގައި ހުރި ކަންކަން ހައްލު ކުރުމަށް މިނިސްޓްރީ އޮފް ހޯމް އެފެއާޒުން، މޯލްޑިވްސް މީޑިޔާ ކައުންސިލާއެކު މަޝްވަރާ ކޮށްފިއެވެ.
ހޯމް މިނިސްޓްރީގައި ބުރާސްފަތި ދުވަހު ބޭއްވި މަޝްވަރާ ބައްދަލުވުމުގައި މޯލްޑިވްސް މީޑިޔާ ކައުންސިލުން ވަނީ އެކައުންސިލް ހިންގުމާއި، މަތިކޮށްފައިވާ މަޞްޢޫލިއްޔަތު އަދާކުރުމުގައި ހުރި ގޮންޖެހުންތައް ހުށައަޅާ އެކަންކަން ހައްލުކުރުމަށް ކުރެވިދާނެ ކަންތައްތަކާ ގުޅޭގޮތުން މަޝްވަރާ ކުރައްވާފައެވެ.
ހޯމް މިނިސްޓްރީން ބުނީ މީޑިޔާ ކައުންސިލްގެ އެދުމަކަށް ބޭއްވި ބައްދަލުވުމުގައި އެކައުންސިލުން ހުށައެޅި މައިގަނޑު ކަންބޮޑުވުންތަކަކީ ބަޖެޓް ލިބުމުގައި ހުރި ދަތިކަމާއި، މެންޑޭޓް ތަންފީޒުކުރުމުގައި ހުރި ގާނޫނީ ހުރަސްތައް ކަމަށެވެ. އަދި މީޑިޔާގެ ދަފްތަރާއި، ނޫސްވެރިންގެ ދަފްތަރު އެކުލަވާލުމާ ގުޅޭގޮތުން ވެސް މަޝްވަރާ ކުރެއްވިއެވެ. މީގެ އިތުރުން މީޑިޔާތައް ރަޖިސްޓްރީ ކުރުމުގެ ކަންކަން އިތުރަށް ހަރުދަނާ ކުރުމާ ގުޅޭގޮތުން ވެސް މަޝްވަރާކުރެއްވި ކަމަށް މިނިސްޓްރީން މައުލޫމާތުދެއެވެ.
މިނިސްޓްރީގެ ފަރާތުން ބައްދަލުވުން ޗެއަރކުރެއްވި މިނިސްޓަރ އޮފް ސްޓޭޓް ފޮރ ހޯމް އެފެއާޒް އަލީ ނަޒީރު ވިދާޅުވީ އެކަންކަން އަވަހަށް ހައްލުކުރެއްވުމަށް މަސައްކަތް ކުރައްވާނެ ކަމަށެވެ. އަދި މީޑިޔާ ކައުންސިލާ ގުޅިގެން މީޑިޔާގެ ދާއިރާގެ ކުރިއެރުވުމަށް މަސައްކަތްކުރައްވަން ބޭނުންވާ ކަމަށާއި، ކުރިއަށް އޮތްތަނުގައި އެމަސައްކަތް ކުރައްވާނެ ކަމަށެވެ. ސިލްސިލާ ބައްދަލުވުންތަކެއް ބޭއްވި ކައުންސިލްގެ ޝަކުވާތަކަށް ހައްލު ހޯއްދަވައިދެއްވުމުގެ މަސައްކަތާއި، މީޑިއާ ދާއިރާ ކުރިއެރުވުމަށް ކައުންސިލާ ގުޅިގެން މަސައްކަތް ކުރައްވާނެކަމުގެ ޔަޤީންކަން ސްޓޭޓް މިނިސްޓަރ ދެއްވިއެެވެ. ސްޓޭޓް މިނިސްޓަރ އަލީ ނަޒީރު ވިދާޅުވީ ދިވެހި މީޑިޔާ ހަރުދަނާކޮށް ތަރައްޤީ ކުރުމަށް ކުރާ މަސައްކަތުގައި މޯލްޑިވްސް މީޑިޔާ ކައުންސިލްގެ އެހީތެރިކަން ބޭނުންވާކަމަށާއި، ދެފަރާތުން ގުޅިގެން ކުރެވެންހުރި ކިތަންމެ ކަމެއް އެބަހުރި ކަމަށެވެ.
މިބައްދަލުވުމުގައި މީޑިޔާ ކައުންސިލްގެ ރައީސް ހިދާޔަތުﷲގެ އިތުރުން އެކައުންސިލްގެ ބައެއް މެމްބަރުންނާއި، އިދާރީ ބޭފުޅުން ބައިވެރިވެލެއްވިއެވެ. މިނިސްޓްރީގެ ފަރާތުން ސްޓޭޓް މިނިސްޓަރ އަލީ ނަޛީރުގެ އިތުރުން ޑިރެކްޓަރ، ކޮމިއުނިކޭޝަން ޙަފްޞީ ޢަބްދުﷲ އާއި ސީނިއަރ ޕޮލިސީ އެގްޒެކްޓިވް ނިޝާނާ ހަސަން ބައްދަލުވުމުގައި ބައިވެރިވިއެވެ.
