ކިހާދުއްފަރު ރިސޯޓްގެ ދިވެހި މުވައްޒަފުންނަށް އެއްމަހުގެ މުސާރައިގެ އިތުރުން ސާރވިސް ޗާޖް ނުދޭތާ އެތައް މަހެއް:ހަސީން

ކިހާދުއްފަރު ރިސޯޓްގެ ދިވެހި މުވައްޒަފުންނަށް އެއް މަހުގެ މުސާރައިގެ އިތުރުން, ސާރވިސް ޗާޖް ނުދޭތާ އެތައް މަހެއްވެފައިވާ ކަމަށް ލޭބާރ ޕާޓީން ބުނެފިއެވެ.

މަސައްކަތްތެރިންގެ ހައްގުގައި މަސައްކަތް ކުރާ ހަމައެކަނި ޕާޓީ ލޭބާރ ޕާޓީގެ ސެކްރެޓަރީ ޖެނެރަލް އަބްދުﷲ ހަސީން ވިދާޅުވީ ކިހާދުއްފަރު ރިސޯޓްގައި 400 މުވައްޒިފުން ތިބިއިރު، އޭގެ ތެރެއިން 250 މީހުންނަކީ ދިވެހިން ކަމަށެވެ. އެ ރިސޯޓްގެ މެނޭޖްމަންޓުން އެތާގައި މަސައްކަތް ކުރަމުންދާ ދިވެހިންގެ ވަޒީފާގެ ހައްގުތަކަށް އަރައިގެންފައިވާ ކަމަށް ހަސީން ވިދާޅުވިއެވެ. އެ ރިސޯޓްގައި މަސައްކަތް ކުރާ ދިވެހި މުވައްޒިފުންނަށް މުސާރައާއި ސާރވިސް ޗާޖް ނުދީގެން އެ ކަމުގެ ކަންބޮޑުވުން މެނޭޖްމަންޓާއި ހިއްސާކުރި ތިން މުވައްޒިފުން ވަޒީފާއިން ވަކިކޮށްފައިވާ ކަމަށް އޭނާ ވިދާޅުވިއެވެ.

"ވަޒީފާއިން ވަކި ކުރި މުވައްޒިފުންގެ މައްސަލަ ލޭބާރ ޕާޓީގެ ފަރާތުން ޓްރައިބިއުނަލްއަށް ހުށަހަޅާފައިވަނީ" ހަސީން ވިދާޅުވިއެވެ.

ހަސީން ވިދާޅުވީ އެ ރިސޯޓަކީ ދިވެހި މެނޭޖްމަންޓަކުން ހިންގާ ރިސޯޓެއް ކަމަށެވެ.

ވަޒީފާދޭ އެކި ފަރާތްތަކުން މަސައްކަތްތެރިންގެ ހައްގުތަކަށް އަރައިގަންނަމުން އަންނާތީ، އެކަމުގެ ޝަކުވާ ލޭބާރ ޕާޓީއަށް ލިބެމުން އަންނަ ކަމަށް ހަސީން ވިދާޅުވިއެވެ. ހަސީން ވިދާޅުވީ ގަވައިދާއި ޚިލާފަށް ވަޒީފާއިން ވަކި ކުރާ ފަރާތްތަކަށް އެ ޕާޓީން އެހީތެރިކަން ފޯރުކޮށްދެމުން އަންނަ ކަމަށެވެ. އޭގެ ތެރޭގައި ހިލޭ ލޯޔަރުން ހަމަޖައްސައިދިނުމާއި، ކޯޓް މަރްހަލާއަށް ދާންޖެހޭ މައްސަލަތަކުގައި އެހީތެރިކަން ފޯރުކޮށްދިނުމާއި، ޓްރައިބިއުނަލްއަށް ދިއުމުގައި އެހީތެރިކަން ފޯރުކޮށްދިނުން ފަދަ ކަންތައްކަން ހަސީން ފާހަގަކުރެއްވިއެވެ.

މީގެ އިތުރުން ސެކިއުރިޓީގެ ހިދްމަތް ދެމުން އަންނަ ސަންރައިސް ކްރޯނާ އެންޓަރޕްރައިސަސްގައި މަސައްކަތް ކުރާ ސެކިއުރިޓީ މުވައްޒިފުންނަށް މުސާރަ ނުދޭތާ 10 މަސްވެފައިވާ ކަމަށް ހަސީން ވިދާޅުވިއެވެ. އެ މުވައްޒިފުންނަށް ރަމްޟާން މަހުގެ އިނާޔަތް ވެސް ނުދޭކަން ހަސީން ފާހަގަކުރެއްވިއެވެ.

"އެ މީހުންނަކީ ސަރުކާރުގެ މުހިންމު ތަން ތަން ކަމަށްވާ ކޯޓްތައް ފަދަ ތަންތަނުގައި ސެކިއުރިޓީ ބަލަހައްޓާ މީހުން. އެ ކުންފުންޏައް ސަރުކާރުން ދޭންޖެހޭ މުސާރަ ދީފައިވާނީ. އެ މީހުންނަކީ ގާތްގަނޑަކަށް 3000 ރުފިޔާ މުސާރައެއް ލިބޭ މީހުން. މުސާރަ ނުލިބުމުގެ ސަބަބުން އެ މީހުން އުޅެނީ ވަރަށް ދަތި ހާލުގައި " ހަސީން ވިދާޅުވިއެވެ.

ހަސީން ވިދާޅުވީ އެ މީހުންގެ މައްސަލަތައް ލޭބާރ ރިލޭޝަން އޮތޯރިޓީއަށް ހުށަހަޅާފައިވާ ކަމަށެވެ.