އިންވެސްޓްމަންޓްތައް ކޮށްގެން، ހައްޖު ކޯޕްރޭޝަނުން ހައްޖަށް ގެންދާ އަގު ދަށް ކުރާނަން: އެމްޑީ
9 މެއި 2019 | ބުރާސްފަތި 04:17ދުރު ރާސްތާ ޕްލޭނަކުން މިކަން ކުރެވޭނެ
ހައްޖު ކޯޕްރޭޝަންގެ މެނޭޖިން ޑިރެކްޓަރު އިސްމާއިލް ހަމީދު
އިންވެސްޓްމަންޓްތަކެއް ކޮށްގެން، ހައްޖު ކޯޕްރޭޝަނުން މީހުން ހައްޖަށް ގެންދާ އަގު ދަށް ކުރުމަށް މަސައްކަތް ކުރަމުން އަންނަ ކަމަށް ހައްޖު ކޯޕްރޭޝަންގެ މެނޭޖިން ޑިރެކްޓަރު އިސްމާއިލް ހަމީދު ވިދާޅުވެއްޖެއެވެ.
ރާއްޖެ ޓީވީގެ "ފަލަ ސުރުހީ" ޕްރޮގްރާމްގައި ވާހަކަ ދައްކަވަމުން އިސްމާއިލް ވިދާޅުވީ ހައްޖު ކޯޕްރޭޝަން އުފެއްދުމުގެ މަގުސަދަކީ މީހުން ދުރާލާ ދައްކާ ފައިސާ ކަލެޓްކޮށް ޝަރީއްއާ ހުއްދަކުރާ ކަންތައްތަކެއްގައި އިންވެސްޓްކޮށްގެން އެއިން ލިބޭ ފައިދާ އިން ހައްޖަށް ދެވޭ އަގު ދަށްކުރުން ކަމަށެވެ.
ނަމަވެސް މި ފާއިތުވި ދުވަސްތަކުގައި ހައްޖު ކޯޕްރޭޝަނުން އިންވެސްޓްމެންޓްތަކެއް ކޮށްފައިވާ ކަމަށާއި، ނަމަވެސް ފައިދާ ލިބޭ ގޮތަށް އިންވެސްޓްމެންޓްތަކެއް ކުރެވިފައި ނެތް ކަމަށް އިސްމާއިލް ވިދާޅުވިއެވެ.
''ޕެންޝަން ފަންޑު ނެންގެވީމަ ޕެންޝަން ފަންޑުގައި ހުންނަ ފައިސާ އަޅުގަނޑުމެންގެ އަތުގައި ހުންނަ ފައިސާ އިންވެސްޓް ކުރަން އުދަނގޫ އެބަވޭ. އަޅުގަނޑުމެންގެ އަސާސީ ގަވާއިދުގައި ބުނާ ގޮތުން ޝަރީއާ ކޮންޕްލެއިން ނޫން އިންވެސްޓެއް އަޅުގަނޑުމެންނަށް ނުވެސް ކުރެވޭ. އެހެން ވީމަ އަދި ޕެންޝަން ފަންޑަށް ވުރެ އަދި ރެސްޓްރިކްޓް އެބަވޭ އެފައިސާ އިންވެސްޓްކުރަން ދިމަދިމާލުން،'' އިސްމާއިލް ވިދާޅުވިއެވެ.
އިސްމާއިލް ވިދާޅުވީ ދުރު ރާސްތާ ޕްލޭނެއްގެ ދަށުން ބޮޑެތި ރަނގަޅު އިންވެސްޓްތަކެއް ކުރެވިއްޖެ ނަމަ ރަނގަޅު ފައިދާއެއް ހޯދައިގެން ހައްޖު ކޯޕްރޭޝަނުން ހައްޖަށް މީހުންގެންދާ އަގު ދަށް ކުރެވޭނެ ކަމަށެވެ.
އިސްމާއިލް ވިދާޅުވީ މިދިޔަ ދުވަސްތަކުގައި ހައްޖަށް ދިއުމަށް ދައްކާ ފައިސާ އެއް އަގެއްގައި ހިފެހެއްޓުމަށް ވެސް އިންވެސްޓްމެންޓްތަކެއް ކުރެވިފައި ނެތް ކަމަށާއި، މި އަހަރު މި އަގުގައި ހައްޖަށް ގެންދާ ކަމަށްވާ ނަމަ ކޮންވެސް ވަރެއްގެ ގެއްލުމެއް ކޯޕްރޭޝަނަށް ލިބޭނެ ކަމަށެވެ. ނަމަވެސް ދައުލަތުން އެކަން ފޫބައްދާނެ ކަމަށް އޭނާ ވިދާޅުވިއެވެ.
މީގެ އިތުރުން އިސްމާއިލް ވިދާޅުވީ ތަފާތު ގޮންޖެހުންތައް އެ ކޯޕްރޭޝަނަށް ކުރިމަތިވާ ކަމަށާއި، އެންމެ ބޮޑު ގޮންޖެހުމަކީ ރައްޔިތުން އިތުބާރު ނުކުރުން ކަމަށެވެ.
އިސްމާއިލް ވިދާޅުވީ ހައްޖު ކޯޕްރޭޝަނާ މެދު ރައްޔިތުން ދެކޭ ގޮތް ބަދަލުކޮށް އެ ކޯޕްރޭޝަނަކީ ރައްޔިތުންގެ ފުރިހަމަ ލިބިފައިވާ ތަނަކަށް ހަދާނެ ކަމަށެވެ. މާޒީގައި ކަން ހިނގާފައިވާ މިހާރު ކަންތައްތައް ނުހިގާނެ ކަމުގެ ޔަގީންކަން ވެސް އޭނާ އެރުވިއެވެ.
