މާލެ ސިޓީ ކައުންސިލުން ކަދުރު ބަހަން ފަށަނީ އަންނަ އާދިއްތަ ދުވަހު
ކަދުރު ބަހާނީ މި ދިޔަ އަހަރުގެ ނިޔަލަށް ފަގީރުންގެ ދަފްތަރުގައި ނަންނޯޓް ކޮށްފައިވާ ފަރާތްތަކަށް
މާލޭ ސިޓީގެ ރައްޔިތުންނަށް ކަދުރު ބަހާނީ ކައުންސިލްގެ އާންމު ހިދްމަތްތަކާއި ބެހޭ ސެކްޝަނުން
އިސްލާމިކް މިނިސްޓްރީން މާލޭ ސިޓީގެ ރައްޔިތުންނަށް ބެހުމަށް ދީފައިވާ ކަދުރު ބަހަން ފަށާނީ 12 މެއި ވާ އާދިއްތަ ދުވަހު ކަމަށް މާލެ ސިޓީ ކައުންސިލުން ބުނެފިއެވެ.
މާލެ ސިޓީ ކައުންސިލުން ބުނީ އިސްލާމިކް މިނިސްޓްރީން ކަނޑައަޅާފައިވާ އުސޫލާއި އެއްގޮތަށް ކަދުރު ބަހާނީ މި ދިޔަ އަހަރުގެ ނިޔަލަށް ފަގީރުންގެ ދަފްތަރުގައި ނަންނޯޓް ކޮށްފައިވާ ފަރާތްތަކަށް ކަމަށެވެ. އެ ގޮތުން ފަގީރުންގެ ދަފްތަރުގައި ރެޖިސްޓްރީ ކޮށްފައިވާ ކޮންމެ ގޭ ބިސީއަކަށް ދޭނީ އެންމެ ކަދުރު ޕެކެޓެއް ކަމަށެވެ. އަދި ކަދުރު ބަހާނީ އެންމެ ފުރަތަމަ އަންނަ ފަރާތްތަކަށް ފުރަތަމަ އިސްކަންދޭ އުސޫލުންނެވެ.
ފަގީރުންގެ ގޭބިސީތަކަށް ކަދުރު ބެހުމަށް ފަހު، ބާކީ ކަދުރު ބަހާނީ އެންމެ ފުރަތަމަ އަންނަ ފަރާތްތަކަށް ފުރަތަމަ އިސްކަންދޭ އުސޫލުން ކަމަށް ކައުންސިލުން ވަނީ ބުނެފައެވެ. ކައުންސިލުން ބުނެފައި ވަނީ މި ގޮތަށް ކަދުރު ބެހުމުގައި ފަގީރުންނަށް އިސްކަންދެވޭނެ ކަމަށެވެ. ގޭބިސީތަކަށް ކަދުރު ބަހާނީ އެ ގޭބިސީއެއްގެ ސައްހަކަން އަންގައިދޭ ލިޔުމެއް ގެންނެވުމުން، އެ ލިޔުމުގެ ސައްހަކަން ބެލުމަށްފަހުގައި ކަމަށް ކައުންސިލުން ވަނީ ބުނެފައެވެ.
ގޭބިސީއެއްގެ ސައްހަކަން ކަނޑައަޅާ ލިޔުމަކީ ކުއްޔަށް ހިފައިގެން ދިރިއުޅޭ ތަނުގެ ދެ ފަރާތުން ސޮއިކޮށްފައިވާ އެއްބަސްވުމުގެ އަސްލު ނުވަތަ އެގޭބިސީއެއް ނިސްބަތްވާ އިމާރާތުގެ ގޯތީގެ ރެޖިސްޓްރީގެ އަސްލު ނުވަތަ ގޭގެ އިމާރާތުގެ ގޯތީގެ ރެޖިސްޓްރީގެ އަސްލު ކަމަށް ކައުންސިލުން ވަނީ ބުނެފައެވެ. އަދި ކަދުރު ހަވާލުވާ ބޭފުޅެއްގެ ދިވެހި ރައްޔިތެއްކަން އަންގައިދޭ ކާޑު ގެންނަންވާނެ ކަމަށެވެ.
ކައުންސިލުން ބުނީ މާލޭ ސިޓީގެ ރައްޔިތުންނަށް ކަދުރު ބަހާނީ ކައުންސިލްގެ އާންމު ހިދްމަތްތަކާއި ބެހޭ ސެކްޝަނުން ކަމަށެވެ.
ކަދުރު ބެހުމަށް ހަމަޖެހިފައިވާ ގަނޑިތައް :
ރަސްމީ ބަންދުނޫން ދުވަސްތަކުގެ ހެދުނު 9.30 ން މެންދުރު 12.30 އަށް.ރޭގަނޑު 9.00 އިން 10.30 އަށް
