ޔުނިވަރސަލް ޕީރިއޮޑިކް ރިވިއުގައި ރާއްޖެއިން ބައިވެރިވާނެ: ފޮރިން މިނިސްޓްރީ

އދ. ގެ މެމްބަރު ޤައުމުތަކުގައި އިންސާނީ ހައްގުތައް ދެމެހެއްޓުމަށް ކުރެވޭ މަސައްކަތްތައް މުރާޖާކޮށް ދެނެގަތުމަށް ބޭއްވޭ ޔުނިވަރސަލް ޕީރިއޮޑިކް ރިވިއުގައި ދިވެހިރާއްޖެ އިން ބައިވެރިވާނެ ކަމަށް ފޮރިން މިނިސްޓްރީން ބުނެފިއެވެ.

ފޮރިން މިނިސްޓްރީން ބުނީ އދ. ގެ މެމްބަރު ޤައުމުތަކުގައި އިންސާނީ ހައްގުތައް ދެމެހެއްޓުމަށް ކުރެވޭ މަސައްކަތްތައް މުރާޖާކޮށް ދެނެގަތުމަށް ބޭއްވޭ ޔުނިވަރސަލް ޕީރިއޮޑިކް ރިވިއު ގެ 33 ވަނަ ސެޝަންގެ ބައްދަލުވުންތައް އޮތީ، މެއި މަހުގެ ހަ ވަނަ ދުވަހުން ފެށިގެން ޖެނީވާގައި ހުންނަ އދ. ގެ މަރުކަޒުގައި ކަމަށެވެ.

އދ. ގެ އިންސާނީ ހައްގުތަކާ ބެހޭ މަސައްކަތްތަކަށް ދިވެހި ރާއްޖެ އިން ދޭ އިސްކަމުގެ ތެރެއިން، ދިވެހި ރާއްޖޭ އިން ޖެނީވާގައި ހުންނަ ދާއިމީ މިޝަންގެ، މި ރިވިއުގައި އަމަލީ ގޮތުން ބައިވެރިވެ، ރިވިއުކުރެވޭ ޤައުމުތަކަށް ހުށަހެޅުންތަކެއް ދިވެހި ރާއްޖޭގެ ފަރާތުން ހުށަހަޅާނެ ކަމަށް ފޮރިން މިނިސްޓްރީން ބުނެއެވެ. ޔޫޕީއާރު ސެޝަންގައި ދިވެހި ރާއްޖެ ތަމްސީލުކުރައްވާނީ ދިވެހި ރާއްޖޭގެ ފަރާތުން ޖެނީވާގައި ހުންނަ އދ. ގެ އޮފީސްތަކަށް ކަނޑައަޅުއްވާފައި ހުންނަ ދާއިމީ މަންދޫބު ޑރ. ހާލާ ހަމީދާއި ދާއިމީ މަންދޫބުގެ ނާއިބު ހައުލާ އަޙުމަދު ދީދީ އަދި ފަސްޓް ސެކްރެޓަރީ އައިޝަތު ޝަހުލާއެވެ.

ޔުނިވާސަލް ޕީރިއޮޑިކް ރިވިއުއަކީ އދ. ގެ މެމްބަރު ގައުމުތަކުގެ އިންސާނީ ހައްގުތައް ކުރިއަރުވައި ހިމާޔަތްކުރެވޭ މިންވަރު ދެނެގަތުމަށް ކުރެވޭ ރިވިއުއެކެވެ. ޔުނިވާސަލް ޕީރިއޮޑިކް ރިވިއުގެ ސަބަބުން ޤައުމުތަކުގެ އިންސާނީ ހައްގުތަކުގެ ހާލަތު ރަނގަޅުކުރުމާއި މެދު އެ ޤައުމުތަކުގެ މައްޗަށް ލާޒިމްކޮށްފައިވާ ކަންކަން ފުރިހަމަކުރުމަށް ފުރުސަތު ލިބިގެންދާނެއެވެ.

ދިވެހިރާއްޖޭގެ ރިވިއު ބޭއްވުމަށް ހަމަޖެހިފައި ވަނީ 2020 ވަނަ އަހަރުގެ އޭޕްރީލް އަދި މެއި މަހުގައި އޮންނަ ޔުނިވަރސަލް ޕީރިއޮޑިކް ރިވިއުގެ 36 ވަނަ ސެޝަންގައެވެ