ޓެރަރިޒަމްގެ މައްސަލަތަކުގައި ގުޅިގެން މަސައްކަތްކުރެވެނީ ސަރުކާރުގެ އިދާރާތަކުގެ މެދުގައިވާ އެކުވެރިކަމުގެ ސަބަބުން: މާރިޔާ
6 މެއި 2019 | ހޯމަ 05:47ޓެރަރިޒަމާއި ދެކޮޅަށް ހިންގަންޖެހިފައިވާ ހަނގުރާމައަކީ މުޅި ސަރުކާރު އެކުވެގެން ކުރެވޭނެ ހަނގުރާމައެއް
ސިފައިންގެ ބައްދަލުވުމެއްގައި މިނިސްޓަރ މާރިޔާ
ޓެރަރިޒަމްގެ މައްސަލަތަކުގައި ގުޅިގެން މަސައްކަތްކުރެވެނީ ސަރުކާރުގެ އިދާރާތަކުގެ މެދުގައިވާ އެކުވެރިކަމުގެ ސަބަބުން ކަމަށް ޑިފެންސް މިނިސްޓަރ މާރިޔާ ދީދީ ވިދާޅުވެއްޖެ އެވެ.
ޓެރަރިޒަމާއި ދެކޮޅަށް ކުރެވޭ މަސައްކަތްތަކާއި ގުޅެގޮތުން މިނިސްޓަރ މާރިޔާ ވިދާޅުވީ ޓެރަރިޒަމާއި ދެކޮޅަށް ހިންގަންޖެހިފައިވާ ހަނގުރާމައަކީ މުޅި ސަރުކާރު އެކުވެގެން ކުރެވޭނެ ހަނގުރާމައެއް ކަމަށެވެ. އަދި ފުލުހުންނާއި، ސިފައިންނާއި، އެހެންވެސް ސަރުކާރުގެެ އިދާރާތައް ގުޅިގެން މަސައްކަތް ކުރެވެނީ ރައީސް އިބްރާހިމް މުހައްމަދު ސޯލިހްގެ ސަރުކާރުގެ "އެކުވެރިކަމަކީ ބާރެއް"ގެ އުސޫލުގެ ސަބަބުން ކަމަށް މާރިޔާ ވިދާޅުވި އެވެ.
މިނިސްޓަރ މާރިޔާ އެގޮތަށް ޓުވީޓްކުރީ އާދިއްތަ ދުވަހު ފުލުހުންނާއި، ސިފައިން ގުޅިގެން މާލޭގައި ކުރިއަށްގެންދިޔަ ތަމްރީންތަކާއި ގުޅިގެންނެވެ. އެ ތަމްރީނުތަކަކީ ކުއްލި ޙާލަތްތަކުގައި ސަލާމަތީ ބާރުތަކުން ޙަރަކާތްތެރިވާނެ ގޮތްތަކާގުޅޭ ތަމްރީންތަކެކެވެ.
ލަންކާއަށް ދެވިގެންދިޔަ ހަމަލާތަކަށް ފަހު، ރާއްޖޭގެ ސަލާމަތީ ކަންކަން ވަރުގަދަ ކުރުމަށް އިދާރާތަކުން ގެންދަނީ ގިނަ މަސައްކަތްތަކެއް ކުރަމުންނެވެ. އެގޮތުން އިމިގްރޭޝަނުން ވަނީ ހާއްސަ ފިޔަވަޅުތަކެއް އަޅައިފަ އެވެ. އަދި ވެރިރަށް މަލޭގެ ސަލާމަތީ ކަންކަން އިތުރަށް ވަރުގަދަ ކޮށްފައިވާ ކަމަށް އިދަރާތަކުން ބުނެފައިވެއެވެ.
