ޓްރާންސްފާގެ އަޑުތަކަށް ބެނާޑޯ ސިލްވާ ދިނީ ބީރު ކަންފަތެއް

މެންޗެސްޓާ ސިޓީއަށް ކުޅެމުން އަންނަ ޕޯޗުގަލްގެ މިޑްފިލްޑަރ ބެނާޑޯ ސިލްވާ ޓްރާންސްފާގެ އަޑުތަކަށް ބީރު ކަންފަތެއް ދީފިއެވެ.

ޕޯޗުގަލްގެ ނޫހެއް ކަމަށްވާ ރެކޯޑް އަށް ދިން އިންޓަވިއުއެއްގައި ބެނާޑޯ ސިލްވާ ބުނީ، އޭނާއާ ގުޅޭ ގޮތުން ނޫސްތަކުގައި ދައުރުވާ ޚަބަރުތަކަށް މާބޮޑު ސަމާލުކަމެއް ނުދޭ ކަމަށެވެ.

ސިލްވާ ބުނީ، ސިޓީއާ އެކު އޭނާ ހަދާފައިވާ އެއްބަސްވުން އާކޮށްފައިވާ ކަމަށާއި، މި ސީޒަނަށް ފަހު ސިޓީއާ އެކު އިތުރު ތިން އަހަރު ހޭދަކުރަން ޖެހޭ ކަމަށެވެ. އަދި އޭނާ ބުނީ ސިޓީގައި ހުރީ ވަރަށ ހިތްހަމަޖެހިގެން ކަމަށެވެ.

ކުރިޔަށް އޮތް ސީޒަނަށް އަމާޒުކޮށް ކްލަބްތަކުން ހޯދުމަށް މަސައްކަތް ކުރަމުން އަންނަ ކުޅުންތެރިން ތެރޭގައި ބެނާޑޯ ސިލްވާ ހިމެނެއެވެ. އޭނާ ހޯދުމަށް އެންމެ ބޮޑަށް މަސައްކަތް ކުރަމުން އަންނަނީ ބާސާ ކަމަށް ރިޕޯޓްތައް ބުނެއެވެ.

އެގޮތުން ބެނާޑޯ ސިލްވާ ބުނީ ބާސާއިން އޭނާ ހޯދުމަށް މަސައްކަތް ކުރާކަން ނޭގޭ ކަމަށާއި، ވިސްނަމުން އަންނަނީ މި ސީޒަން ކާމިޔާބުކަމާއެކު ސިޓީގައި ނިންމާލުން ކަމަށެވެ.

ބެންފީކާ އިން ކެރިޔަރު ފެށި އުމުރުން 24 އަހަރުގެ ބެނާޑޯ ސިލްވާ ޔޫތު ކެރިޔަރު ހޭދަކުރީ ބެންފީކާ ބީއިންނެވެ. އޭނާ ވަނީ މޮނާކޯ އަށް ވެސް ކުޅެފައެވެ.

ބެންފީކާއާ އެކު ލީގު ތަށި އަދި ޕޯޗުގީޒް ކަޕް ކާމިޔާބުކޮށްފައިވާ ބެނާޑޯ ސިލްވާ ވަނީ މޮނާކޯއާއެކު ލީގު ތަށި ކާމިޔާބުކޮށްފައެވެ. އަދި އޭނާ ވަނީ ސިޓީއާއެކު ޕްރިމިއާ ލީގު، ލީގް ކަޕް އަދި އެފްއޭ ކޮމިއުނިޓީ ޝިލްޑް ކާމިޔާބުކޮށްފައެވެ.

މޮނާކޯއަށް ކުޅުނު 126 މެޗުގައި 25 ލަނޑު ކާމިޔާބުކޮށްފައިވާ ބެނާޑޯ ސިލްވާ ވަނީ ސިޓީއަށް މިހާތަނަށް ކުޅުނު 100 މެޗުގައި 22 ލަނޑު ކާމިޔާބުކޮށްފައެވެ.

ޕޯޗުގަލްއާއެކު ފީފާ ކޮންފެޑެރޭޝަންސް ކަޕްގެ ތިންވަނަ 2017 ވަނަ އަހަރު ހޯދާފައިވާ ބެނާޑޯ ސިލްވާ ވަނީ ގައުމީ ޓީމަށް މިހާތަނަށް ކުޅުނު 36 މެޗުގައި ތިން ލަނޑު ކާމިޔާބުކޮށްފައެވެ.