ލީބިޔާގައި ތިބި ފިލިޕީންސް ރައްޔިތުން އެޤައުމުން ފައިބަން އަންގައިފި
ޓްރިޕޯލީއިން ފިލިޕީންސް ރައްޔިތުން ފޭބުމަށް އެތައް ފަހަރެއްގެ މަތިން ވަނީ އިލްތިމާސްކޮށްފަ
ލީބިޔާގައި ތިބި ފިލިޕީންސްގެ ބައެއް ރައްޔިތުން އެ ޤައުމުން ފޭބުމަށް އޮފިޝަލުން އެހީވަނީ
މަސްރަހު ގޯސްވެފައިވާ ލީބިޔާގެ ވެރިރަށް ޓްރިޕޯލީގައި ދިރިއުޅެމުންދާ ހާހަކަށްވުރެ ގިނަ ފިލިޕީންސްގެ ރައްޔިތުން އެ ޤައުމުން ފޭބުމަށް އަންގައި ފިލިޕީންސްއިން އިވެކިއުއޭޝަން އޯޑަރެއް ނެރެފިއެވެ.
ފިލިޕީންސްގެ ޑިޕާޓްމަންޓް އޮފް ފޮރިން އެފެއާޒްގެ ތަރުޖަމާނު، އެމަނުއެލް ފެރްނާންޑޭޒް ބުދަ ދުވަހު މީޑިއާގައި ވިދާޅުވީ، ފިލިޕީންސް ސަރުކާރުން އެ އަމުރު ނެރުނީ، އެތައް ފަހަރަކު އެދުމުން ވެސް އެނބުރި ޤައުމަށް ނުގޮސްތިބި ފިލިޕީންސްގެ ހާހަކަށް ވުރެ ގިނަ ރައްޔިތުންގެ ސަލާމަތާއި ރައްކާތެރިކަން ކަށަވަރު ކުރުމަށް ކޮށްދެވޭނެ އިތުރު ކަމެއް ނެތް ކަމަށް، ޓްރިޕޯލީގައި ހުންނަ ފިލިޕީންސްގެ އެމްބަސީއިން އެންގުމުން ކަމަށެވެ.
ފިލިޕީންސްގެ ފޮރިން ސެކްރެޓަރީ، ޓެޑީ ލޮކްސިން ޖޫނިއަރ މީޑިއާގައި ވިދާޅުވީ، މިފަދަ އަމުރެއް ނެރުނު ނަމަވެސް، ޓްރިޕޯލީގައި ތިބި ފިލިޕީންސްގެ މަސައްކަތްތެރިންނާއި އެމީހުންގެ އާއިލާތައް އެނބުރި ޤައުމަށް ދިއުމަށް މަޖުބޫރު ނުކުރެވޭނެ ކަމަށެވެ.
ޓްރިޕޯލީގެ ހާލަތު ގޯސްވެ، ހުއްޓުމެއްނެތި އެކި އިމާރާތްތަކަށް ރޮކެޓް ހަމަލާތައް ދެމުންދާއިރު، ރޮކެޓް ހަމަލާއިން ސަލާމަތްވުމަށް، ޓްރިޕޯލީގައި ހުންނަ ފިލިޕީންސްގެ އެންމެ އިސް ޑިޕްލޮމޭޓް، އެލްމަރ ކާޓޯގެ އަމުރަށް، ފިލިޕީންސް އެމްބަސީގެ ފުރާޅުން ބައެއް އެކުގައި ފޮރުވޭވަރަށް ވަނި ފިލިޕީންސްގެ ދިދައެއް އަޅާފައެވެ.
