ލަންކާ ހަމަލާ: މަރުވި މީހުންގެ ތެރޭގައި ޗައިނާގެ ސައިންޓިސްޓުން

މިދިޔަ މަހުގެ 21 ވަނަ ދުވަހު އީސްޓާ ސަންޑޭއާ ދިމާކޮށް ލަންކާގެ ފައްޅިތަކާއި، މަތީ ފަންތީގެ ހޮޓާތަކަށް ހަށި ގޮއްވާލައިގެން ދިން ހަމަލާގައި މަރުވި މީހުންގެ ތެރޭގައި ޗައިނާގެ ހަތަރު ސައިންޓިސްޓަކު ހިމެނޭ ކަމަށް ސްރީލަންކާގައި ހުންނަ ޗައިނާ އެމްބަސީ އިން ބުނެފިއެވެ.

އެ ހަމަލާގައި ބޭރު ގައުމުތަކުގެ 42 މީހަކު މަރުވެފައިވާ ކަމަށް ސްރީލަންކާގެ ފޮރިން މިނިސްޓްރީން ވަނީ ބުނެފައެވެ.

އަންގާރަ ދުވަހު ޗައިނާގެ އެމްބަސީން ނެރުނު ބަޔާނެއްގައި ބުނީ، ބޮން ގޮއްވާލި ހާދިސާގައި މަރުވި ޗައިނާގެ ހަ މީހުންގެ ތެރެއިން ހަތަރު މީހުންނަކީ، ޗައިނީޒް އެކަޑަމީ އޮފް ސައިންސް (ސީއެސް) އިން ރިސާޗް ހެދުމަށް އެޕްރީލް މަހުގެ މެދު ތެރޭގައި ލަންކާ އަށް ގޮސްފައިވާ ސައިންޓިސްޓުން ކަމަށެވެ. އާއިލާތަކުން އެ މީހުންނަކީ ކޮން ބައެއް ކަން ދެނެގަނެފައިވާ ކަމަށް އެމްބަސީ އިން ބުންޏެވެ. އެ މީހުންގެ ވަނަވަރެއް އެމްބަސީ އިން ހާމައެއް ނުކުރެއެވެ.

އެ ހަމަލާގައި ސީއެސްގެ އިތުރު ފަސް މީހަކަށް އެކިވަރުގެ ޒަހަމްތައް ލިބި އެ މީހުން ވަނީ، އިތުރު ފަރުވާއަށް ޗައިނާ އަށް ގޮސްފައެވެ.

ބޮން ގޮއްވާލައިގެން ދިން ހަމަލާގައި ބޭރު ގައުމުތަކުގެ ތެރެއިން އެންމެ ގިނަ މީހުން މަރުވެފައި ވަނީ އިންޑިއާ އިންނެވެ. އިންޑިއާގެ 11 މީހަކު ވަނީ މަރުވެފައެވެ.

މަރުވި މީހުންގެ ތެރެއިން 25 މީހުންގެ ހަށިގަނޑު އެ މީހުންގެ ގައުމަށް ފޮނުވާލާފައިވާ ކަމަށް ފޮރިން މިނިސްޓްރީން ބުންޏެވެ. އަދި އެއީ ކޮން ބައެއްކަން ދެނެގަނެވިފައިނުވާ 12 މީހަކުގެ ހަށިގަނޑު ކޮލަމްބޯ ޖުޑިޝަލް މެޑިކަލް އޮފީސަރސް މޯޗަރީގައި ވަނީ ބައްވާފައެވެ.

ކޮލަމްބޯގެ ހޮސްޕިޓަލްތަކުގައި ފަސް މީހަކު ފަރުވާ ހޯދަމުންދާ ކަމަށް ވެސް ފޮރިން މިނިސްޓްރީން ބުންޏެވެ. ލަންކާ އަށް ދިން ޓެރަރިސްޓް ހަމަލާގެ ޒިންމާ ނަގާފައި ވަނީ ޓެރަރިސްޓް ޖަމާއަތެއް ކަމަށްވާ އައިއެސް ޖަމާއަތުންނެވެ.