ލަންކާގައި ހައްޔަރުކުރި އިތުރު ހަތަރު މީހެއްގެ ބަންދުގެ މުއްދަތު ޖަހައިފި
1 މެއި 2019 | ބުދަ 06:09ލަންކާ ފުލުހުންގެ ބެލުމުގައި ދަށުގައި މިހާރު ހަ ދިވެހިން އެބަތިބި
ސްރީލަންކާގައި ސެކިއުރިޓީ ވަރުގަދަކޮށްފައި
ސްރީލަންކާ ފުލުހުން ކުރިއަށް ގެންދާ ޚާއްސަ އޮޕަރޭޝަނުގެ ދަށުން ހޯމަ ދުވަހު ފުލުހުންގެ ބެލުމުގެ ދަށަށް ގެންދެވުނު ހަތަރު ދިވެހިންގެ ބަންދަށް ތިން ދުވަހަށް ޖަހައިފިއެވެ.
ލަންކާ ފުލުހުންގެ ބެލުމުގައި ދަށުގައި މިހާރު ހަ ދިވެހިން އެބަތިބިއެވެ.
ރާއްޖެއެމްވީއަށް މައުލޫމާތު ލިބިފައިވާ ގޮތުގައި ސްރީލަންކާގެ ސެކިއުރިޓީ ޗެކް ޕޯސްޓުން ހޯމަ ދުވަހު ހައްޔަރުކޮށްފައިވާ ހަތަރު މީހުންގެ ބަންދުގެ މުއްދަތު ވަނީ ތިން ދުވަހަށް އިތުރުކޮށްފައެވެ. ބަންދުގެ މުއްދަތު ތިން ދުވަހަށް އިތުރުކޮށްފައި ވަނީ އެ ގައުމުގެ ފުލުހުން ބޭނުންވާ ލިޔެކިޔުންތައް ހޯދުމަށް ކަމަށް ރާއްޖެ އެމްވީއަށް ވަނީ މައުލޫމާތު ލިބިފައެވެ.
ފުލުހުންގެ ބެލުމުގެ ދަށަށް ހޯމަ ދުވަހު ގެންދެވުނު ހަތަރު މީހުންނަކީ ސައިކަލްތަކެއްގެ ސްޕެއަރޕާޓްސް ގަތުމަށް ލަންކާއަށް ގޮސް އުޅުނު ބައެއް ކަމަށް ރާއްޖެއެމްވީއަށް ވަނީ މައުލޫމާތު ލިބިފައެވެ. ފުލުހުންގެ ބެލުމުގެ ދަށަށް އެ މީހުން ގެންދެވުނީ ކޮލަމްބޯ އާއި 100 ވަރަކަށް ކިލޯ މީޓަރު ދުރުގައި ހަދާފައިވާ ޗެކް ޕޯސްޓަކުން ކަމަށް މައުލޫމާތު ލިބިއެވެ.
ލަންކާގައި ހުންނަ ދިވެހި އެމްބަސީން ބުނީ ފުލުހުންގެ ބަންދުގައި ތިބި ދިވެހިންގެ ހާލު ރަނގަޅު ކަމަށާއި، އެމްބަސީގެ މުވައްޒިފުން ކޮންމެ ދުވަހަކު ވެސް ޖަލަށް ގޮސް އެ މީހުންގެ ހާލު ބަލަމުން އަންނަ ކަމަށެވެ. ފުލުހުންގެ ބަންދުގައި ތިބި މީހުންގެ އާއިލާތަކަށް ވެސް އެ މީހުންނާ ބައްދަލުކުރުމުގެ ފުރުސަތު ވެސް ލިބެމުން އަންނަ ކަން އެމްބަސީން ވަނީ ފާހަގަކޮށްފައެވެ.
މި ދިޔަ ބުރާސްފަތި އަދި ހުކުރުދުވަހު ލަންކާ ފުލުހުން ހިންގި ޚާއްސަ އޮޕަރޭޝަނެއްގައި ހަ ދިވެއްސަކު ހައްޔަރުކޮށްފައިވާއިރު، އޭގެ ތެރެއިން ހަތަރު މީހަކު މިހާރު ވަނީ ދޫކޮށްލާފައެވެ. އަނެއް ދެ މީހުންނަށް ވަނީ ބަންދުގެ މުއްދަތު ޖަހާފައެވެ. އެ ދެ މީހުންގެ ބަންދުގެ މުއްދަތު ހަމަވާނީ މި މަހުގެ 6 ވަނަ ދުވަހުއެވެ. ލަންކާގައި ހުންނަ ދިވެހި އެމްބަސީން ބުނެފައި ވަނީ ބަންދުގައި ތިބި ދެ ދިވެހިންގެ ހާލަތު ވަރަށް ގާތުން ބަލަމުން އަންނަ ކަމަށެވެ.
ލަންކާގައި އޭޕްރީލް މަހުގެ 21 ވަނަ ދުވަހު ދިން ބޮމުގެ ޓެރަރިސްޓް ހަމަލާއަށް ފަހު، އެ ގައުމު ވަނީ ސަލާމަތީ ގޮތުން ވަރުގަދަ ކޮށްފައެވެ. އެގޮތުން އެ ގައުމުގައި ކުއްލި ހާލަތު އިއުލާންކޮށް، އެމަރޖެންސީ ގާނޫނުގައި ހިމެނޭ އެންޓި ޓެރަރިޒަމްގެ މާއްދާތަކަށް އެ ގައުމުގެ ސަލާމަތީ ބާރުތަކުން ވަނީ އަމަލުކުރަން ފަށާފައެވެ. ކޯޓު އަމުރަކާ ނުލައި ގެތަށް ބަލާ ފާސްކުރުމުގެ ހުއްދަ އެ ގައުމުގެ ސަލާމަތީ ބާރުތަކަށް، ސަރުކާރުން ދީފައިވާއިރު، އެކި ސަރަހައްދުތަކުގައި ޗެކް ޕޯސްޓްތައް ހަދައި، އެ ޗެކް ޕޯސްޓްތައް ހިމެނޭ ސަރަހައްދުތަކުން ދަތުރުކުރަމުންދާ އެންމެން ދަނީ ޗެކްކުރަމުންނެވެ. އެގައުމުގައި ދިރިއުޅޭ ދިވެހިން ވެސް ބޭރުގައި އުޅޭ ހުރިހާ ވަގުތެއްގައި ޕާސްޕޯޓް ގެންގުޅުމަށް ލަންކާގައި ހުންނަ ދިވެހި އެމްބަސީން ވަނީ އިލްތިމާސްކޮށްފައެވެ.
މިދިޔަ މަހުގެ 21 ވަނަ ދުވަހު ސްރީލަންކާއަށް ދިން ޓެރަރިސްޓް ބޮމުގެ ހަމަލާގައި 250 އަށް ވުރެ ގިނަ މީހުން މަރުވެ، 500 އަށް ވުރެ ގިނަ މީހުން ވަނީ ޒަހަމްވެފައެވެ.
