12 ބުރީގެ ވިލިމާލެ ފެރީޓާމިނަލް ނާޅަން އެމްޓީސީސީން ނިންމައިފި

މާލޭގައި ހުންނަ ވިލިމާލެ ފެރީ ޓާމިނަލް ސަރަހައްދުގައި ކުރީގެ ސަރުކާރުގައި އިމާރާތް ކުރަން ނިންމި 12 ބުރީގެ ފެރީޓާމިނަލް ނާޅަން އެމްޓީސީސީން ނިންމައިފިއެވެ.

ވިލިމާލެ ފެރީޓާމިނަލަށް ހުރި ބިމުގައި 12 ބުރީގެ އިމާރާތެއް އަޅަން ނިންމައި، އެ ސަރަހައްދުން ބިން ހުސްކޮށް، ވަގުތީ ގޮތުން ފެރީޓާމިނަލެއް ވެސް އެމްޓީސީސީން ވަނީ ހަދާފައެވެ. ކުރީގެ ސަރުކާރުން އާ އިމާރާތުގެ ކުރެހުމަށް ފަސް ލައްކަ ޑޮލަރު ހޭދަކުރިއެވެ. އިމާރާތް އެޅުމަށްޓަކާ އެޑްވާންސަށް 17 މިލިއަން ރުފިޔާ އެ ކުންފުނިން ވަނީ ދީފައެވެ.

ރާއްޖެޓީވީގެ "ފަލަސުރުހީ" ޕްރޮގްރާމްގައި ވާހަކަ ދައްކަވަމުން އެމްޓީސީސީގެ މެނޭޖިން ޑިރެކްޓަރު ހަސަން ޝާހު ވިދާޅުވީ މާލޭގެ ހޭޅި ފަށުގައި އުސް ބިލްޑިންތައް އިމާރާތް ކުރުމަކީ މި ސަރުކާރުގެ ސިޔާސަތެއް ނޫން ކަމަށެވެ. އަދި ވިދާޅުވީ މާލެ އާއި ވިލިމާލެ އަދި ތިލަފުށީ ހިމެނޭ ގޮތަށް ބްރިޖަކުން ގުޅާލުމަށް ސަރުކާރުން ނިންމައި، އެ މަސައްކަތުގެ ޕްލޭން ކުރިއަށްދާތީ، ވިލިމާލެ ފެރީޓާމިނަލް ކުރިއަށް ނުގެންދަން އެމްޓީސީސީން ނިންމާފައިވާ ކަމަށެވެ.

"މި ސަރުކާރުގެ ޕޮލިސީއެއް ނޫން، މާލޭގެ އުރަފަށުގައި ނޫނީއްޔާ ހޭޅިފަށުގައި ޝޯލައިންގައި ނުވަތަ އުސް އިމާރާތްތައް ހަދައިގެން ވިއު ބްލޮކްވާ ގޮތަށް އިމާރާތް ކުރުމަކީ ގަބޫލު ކުރެވޭނެ ކަމެއް ނޫން. އޭގެ އިތުރުން ހުލުމާލެ އާއި މާލެ އާއި ގުޅީފަޅާއި ތިލަފުށްޓާ ގުޅޭ ބްރިޖެއް އަންނާތީ، ޕްލޭނިން ސްޓޭޖުގައި އުޅޭތީ އެހެންވެ، ވިލިގިލީ ފެރީޓާމިނަލް އެޅުމަކީ ކުރީގެ 28 މިލިއަން ރުފިޔާ ހަރަދުކޮށްފައި އޮތް ޕްރޮޖެޓު މިހާރު ނެތް ކުރިއަށް ގެންދެވޭކަށް،" ޝާހު ވިދާޅުވިއެވެ.

މާލޭގައި ހުންނަ ވިލިމާލެ ފެރީ ޓާމިނަލް ހުރި ސަރަހައްދުގައި އާ ފެރީ ޓާމިނަލް އިމާރާތްކުރުމަށްޓަކާ އެ ސަރަހައްދުގައި ހުރި ވެހިކަލްތައް ނަގައި ބިން ހުސްކުރުމުގެ މަސައްކަތް ފެށީ 2016 ވަނަ އަހަރުގެ ޖޫން މަހުގެތެރޭގައެވެ.