ވޭސްޓް މެނޭޖްމެންޓް ކޯޕަރޭޝަން ލިމިޓެޑް (ވެމްކޯ) އިން 10 ބުރީގެ އިމާރާތެއް އެޅުމުގެ މަސައްކަތް ފަށައިފި އެވެ.
އެ ކޯޕަރޭޝަނުން ކޮށްފައިވާ އިއުލާނެއްގައި ވަނީ 10 ބުރީގެ އިމާރާތް އެޅުމަށް ޑީޓެއިލް ޑިޒައިނެއް ހަދާނެ ފަރާތެއް ހޯދުމަށް އިއުލާނުކޮށްފަ އެވެ.
އެ އިއުލާނުގައި ބުނެފައިވަނީ، ކުނި މެނޭޖް ކުރުމުގެ މަސައްކަތް ކުރުމަށް ކުރަންޖެހޭ އިދާރީ މަސައްކަތްތައް ކުރުމަށް އޮފީހެއްގެ ގޮތުގައި ބޭނުން ކުރަމަށް 10 ބުރީގެ އިމާރާތެއް އެޅުމަށް ބޭނުންވާ ކަމަށެވެ.
ވެމްކޯއިން އެޅުމަށް ބޭނުވާ އިމާރާތުގެ ޑިޒައިން ކުރުމަށް ބޭނުންވާ ފަރާތްތަކުން ވެމްކޯގެ މައި އޮފީސް މއ.ޖަންބުގަސްދޮށުގެ، ދެވަނަ ފަންގިފިލާއަށް ވަޑައިގެން މަައުލޫމާތު ސާފު ކުރުމަށް އެ ކޯޕަރޭޝަނުން އެދެ އެެވެ. މިކަމަށް އެދި ބީލަން ހުށަހެޅުން އޮތީ އަންނަ މަހުގެ ނޮވެމްބަރު 02 ގަ އެވެ.
ވެމްކޯ އިން ރަސްމީކޮށް ކުނި އުކަން ފަށާފައިވަނީ، މިދިޔަ އަހަރުގެ ޑިސެމްބަރު މަހު އެވެ. އަދި މުޅި މާލެއަށް ހިދުމަތް ދޭން ފަށާފައިވަނީ މިއަހަރުގެ އޭޕްރީލް މަހު އެވެ.
ވެމްކޯ އިން މާލޭގައި ކުނި މެނޭޖް ކުރުމުގެ މަސައްކަތް ފެށުމުން، ގިނަ ބައެއް ޝަކުވާތައް އެކި ކަންކަމުގައި ކުރިމަތިވި އެވެ. އެގޮތުން ވެމްކޯއަށް ފީ ދެއްކުމުގައި ދިމާވާދަތިތަކައި ކުނި ކަލެކްޓް ކުރުމަށް ކޮންމެ ދުވަހަކު ނައުން ފަދަ މައްސަލަތައް ކުރިމަތިވި އެވެ.
އެހެން ނަމަވެސް އެ މައްސަލަތައްވެސް ހައްލު ކުރަމުންދާ ކަމަށް ވެމްކޯ އިން ބުނެފައިވެ އެެވެ. ކުނި މެނޭޖް ކުރުމުގެ މަސައްކަތް ވެމްކޯ އިން މާލެ ސަރަހައްދުގައި ކުރިއަށްގެންދާ އިރު އައްޑޫ ސިޓީ އާއި ފުވައްމުލަކުގައިވެސް ކުނި މެނޭޖް ކުރުމުގެ މަސައްކަތް ކުރަނީ ވެމްކޯއާ ހަވާލުކޮށްގެންނެވެ.
