ރޯދަ މަހު އުލިގަމުގެ ގެތަކަށް މަސްދަޅު ކޭހަކާއި ކުކުޅު ބިސް ކޭހެއް
30 އެޕްރީލު 2019 | އަންގާރަ 12:06އެގޮތަށް ނިންމާފައިވަނީ އަންގާރަ ދުވަހު ބޭއްވި ކައުންސިލުގެ 3 ވަނަ ދައުރުގެ 100 ވަނަ އާންމު ޖަލްސާގައި
ހއ. އުލިގަމު
މި އަހަރުގެ ރޯދަ މަހު ހއ. އުލިގަމުގައި މީހުން ދިރިއުޅޭ ކޮންމެ ގެއަކަށް މަސް ދަޅު ކޭހަކާއި ކުކުޅު ބިސް ކޭހެއް ހަދިޔާ ކުރުމަށް އެ ރަށު ކައުންސިލުން ނިންމައިފިއެވެ.
އަންގާރަ ދުވަހު އެ ރަށު ކައުންސިލުން ނެރުނު އިއުލާނެއްގައި ބުނެފައިވަނީ އެގޮތަށް ނިންމާފައިވަނީ އަންގާރަ ދުވަހު ބޭއްވި ކައުންސިލުގެ 3 ވަނަ ދައުރުގެ 100 ވަނަ އާންމު ޖަލްސާގައި ކަމަށެވެ.
ރޯދަ މަހާއި ދިމާކޮށް ގިނަ ރަށްތަކެއްގެ ކައުންސިލުތަކުން އަންނަނީ ރައްޔިތުންނަށް އެކި ގޮތްގޮތުން އެހީތެރިކަން ފޯރު ކޮށްދެމުންނެވެ. އެގޮތުން ރ. އުނގޫފާރުގެ ގެތަކަށް ކަރަންޓު ހިލޭ ދިނުމަށް އެ ރަށު ކައުންސިލުން ނިންމާފައިވާއިރު ރޯދަ ހަދިޔާގެ ގޮތުގައި ފ. މަގޫދޫ އިން ވަނީ އެ ރަށުގެ ގެތަކުގެ އެޕްރީލް މަހުގެ ކަރަންޓް ބިލުގެ 50 އިންސައްތަ ކައުންސިލުން ދޭގޮތަށް ވެސް ނިންމާފައެވެ.
ގިނަ ކައުންސިލުތަކުން ރައްޔިތުންނަށް ރޯދަ ހަދިޔާތައް ދޭން ނިންމާފައިވާއިރު ރައްޔިތުން ދަނީ ކައުންސިލުތަކަށް ޝުކުރު އަދާކޮށް، އެކަމަށް ތައުރީފު ކުރަމުންނެވެ.
