ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް)އަށް ދޭންޖެހޭ ފައިސާ ދައުލަތުގެ މުސާރައާއި ރޯދަ އިނާޔަތް ދިނުމަށް ފަހު ދޭން ފިނޭންސް މިނިސްޓްރީން ނިންމައިފިއެވެ.
ފިނޭންސުން އެޕާޓީއަށް ފޮނުވާފައިވާ ސިޓީއެއްގައި ބުނެފައިވަނީ އެ ފައިސާއަކީ 2018 ވަނަ އަހަރުގެ ޚަރަދެއް ކަމަށާއި އެ ޚަރަދު މިއަހަރުގެ ކޭޝްފްލޯ ފޯކާސްޓުގައި ހިމެނިފައި ނުވާ ކަމަށެވެ. އަދި މިއަހަރު ދައުލަތުގެ ކޭޝް ފްލޯގައި ހިމެނިފައި ނުވާ ޚަރަދަކަށް ވާތީ އެ ޕާޓީއަށް ފައިސާ ދޭންޖެހޭ އުސޫލު ކަނޑައަޅާފައިވާ ކަމަށެވެ. އެގޮތުން މިދިޔަ އަހަރު ދޫކުރަން ހަމަޖެހިފައިވާ އެ ފައިސާ ދޫކުރާނީ މިމަހުގެ މުސާރައާއި ރަމަޟާން މަހުގެ އިނާޔަތްތައް ދައުލަތުގެ މުއައްޒަފުންނަށް ދީ ނިމުމަށް ފަހު ކަމަށް ޕީޕީއެމަށް ފިނޭންސުން ފޮނުވި ސިޓީގައި ވަނީ ބުނެފައެވެ.
ނިމިދިޔަ ރިޔާސީ އިންތިޚާބާއި ރައްޔިތުންގެ މަޖިލީހުގެ އިންތިޚާބުގައި ވެސް ބޮޑު ނާކާމިޔާބަކާއި ކުރިމަތިލާން ޖެހުނު ޕީޕީއެމް ވަނީ ދަރަނިވެރި ވެފައެވެ. އެގޮތުން ރިޔާސީ އިންތިޚާބުން ޕީޕީއެމުން ކޮށްފައިވާ ދަތުރުތަކަށް 3.8 މިލިއަން ރުފިޔާ ޚަރަދު ކުރިއިރު، އެފައިސާ ދެވޭނީ ޕާޓީއަށް އިލެކްޝަންސް ކަމިޝަނުން ދޭންޖެހޭ ފައިސާ ދޫކުރުމުން ކަމަށް އެޕާޓީން ވަނީ ބުނެފައެވެ. އަދި އެޕާޓީގެ ފޯނު ބިލްތައް ނުދައްކައިގެން ރަސްމީ ފޯނުތައް ވަނީ ކަނޑާލާފައެވެ.
އެޕާޓީން ބުނެފައިވަނީ ދަރަނި ނުދެއްކިގެން އުޅެނީ އީސީއިން ދޭންޖެހޭ ފައިސާ ދޫނުކޮށްގެންނެވެ.
ފިނޭންސުން ޕީޕީއެމްގެ ފައިސާ ދޫކުރަން ނިންމާފައިވާރު، ޕީޕީއެމް ލީޑަޝިޕާ މެދު ގާނޫނީ ސުވާލުތަކެއް އުފެދިފައި އޮތުމުން، އިލެކްޝަންސް ކޮމިޝަނުން ވަނީ އެޕާޓީއަށް ދޭންޖެހޭ ފައިސާ މީގެ ކުރިން ހިފަހައްޓާފައެވެ. އަދި މިމައްސަލަ ނިންމިއިރު ސުޕްރީމް ކޯޓުން ވަނީ އެ ފައިސާ ޕީޕީއެމްއަށް ދޫކުރުމަށް ހުކުމް ކޮށްފައެވެ.
