ހަފްތާ ބަންދުގައި މީހުން ގިނަވެ އުޅޭ ތަންތަނަށް ނުދިޔުމަށް އެމްބަސީން އިލްތިމާސް ކޮށްފި
އެމްބަސީ އިން އެހެން ބުނީ ކުރި ޓްވީޓެއްގައި
ލަންކާ ގައި ދިިރިއުޅޭ ދިވެހިންތަކެއް
ހަފްތާ ބަންދާ ދިމާކޮށް މީހުން ގިނަވެ އުޅޭ ތަންތަނަށް ނުދިޔުމަށް ލަންކާ ގައި ހުންނަ ރާއްޖެ އެމްބަސީން ދިވެހިންނަށް އިލްތިމާސްކޮށްފިއެވެ.
ލަންކާގައި ހުންނަ ރާއްޖެ އެމްބަސީން ކުރި ޓްވީޓެއްގައި ބުނީ، އާދިއްތަ ދުވަހު ލަންކާ ގައި ދިން ބޮން ގޮއްވުމުގެ ހަމަލާ ގުޅިގެން އެގައުމުގައި ދިރިއުޅޭ ދިވެހިން ހަފްތާ ބަންދުގައި މީހުން ގިނަވެ އުޅޭ ތަންތަނަށް ނުދިޔުމަށް އެދޭ ކަމަށެެވެ. އަދި ކާފިޔު ގަޑި ތަކުގައި ގޭގައި މަޑުކުރުމަށް ވެސް އެމްބަސީން ވަނީ އިލްތިމާސްކޮށްފައެވެ.
ސްރީލަންކާގެ ފައްޅިތަކާއި، ހޮޓާތަކަށް ދިން ޓެރަރިސްޓް ހަމަލާއަށްފަހު އެ ގައުމުގައި ކުއްލި ނުރައްކަލުގެ ހާލަތު ވަނީ އިއުލާންކޮށްފައެވެ. ކުއްލި ނުރައްކަލުގެ ހާލަތު ގައި ކޯޓު އަމުރެއް ނެތި މަގުމަތިން މީހުން ހުއްޓުވައި ގެތައް ބަލައި ފާސްކުރަމުގެ ބާރު ފުލުހުންނަށް ލިބިގެންވެއެވެ. އެގޮތުން ވެރިރަށް ކޮޅުނބު ގައި ހުންނަ ގޭތައް ފުލުހުން ދަނީ ޗެކްކުރަމުންނެވެ. އޭގެ ތެރޭގައި ދިވެހިން ދިރިއުޅޭ ގެތައްވެސް ހިމެނެއެވެ.
އެގޮތަށް ޗެކްކުރާ ކުރުމުގައި ފުލުހުންނަށް ފުރިހަމަ އެއްބާރުލުން ދިނުމަށް ދިވެހި އެމްބަސީ އިން ވަނީ އިލްތިމާސް ކޮށްފައެވެ. ލަންކާގެ ނަސާރާއިންނާއި އެކު މުސްލިމުން ތިބި ކަން ހާމަކުރުމުގެ ގޮތުން މިއަދުގެ ހުކުރު ނަމާދުގެ ބަދަލުގައި ގޭގައި މެންދުރު ނަމާދު ކުރަން ސްރީލަންކާގެ މުސްލިމް ރިލީޖިއަސް އެފެއާރސް މުހައްމަދު ހާޝިމް ވަނީ އެގައުމު މުސްލިމުންނަށް އިލްތިމާސްކުރައްވާފައެވެ.
ހުކުރު ނަމާދު ގަޑިއާ ދިމާކޮށް މިސްކިތްތަކަށް ހަމަލާތަކެއް ދޭން އުޅޭ ކަމުގެ މައުލޫމާތު ލިބިފައިވާ ކަމަށް އިންސްޕެކްޓާ ޖެނެރަލް އޮފް ޕޮލިސް ވިދާޅުވެފައިވެއެވެ.
ލަންކާއަކީ ގިނަ އަދަދެއްގެ ދިވެހިން ދިރިއުޅެމުންދާ ގައުމެކެވެ. ލަންކާގައި ހިނގާ ދިޔަ ބޮން ގޮއްވުމުގެ ހާދިސާ އާއި ދިވެހިން ބައިވެރިވުމެއް އޮތްކަމުގެ އެއްވެސް އިޝާރާތެއް މިހާތަނަށް ވެފައި ނެތް ކަމަށާއި ބޮން ގޮއްވުމުގެ ހާދިސާގައި ދިވެއްސަކު މިހާތަނަށް މަރުވެފައިވާ ކަމުގެ ޚަބަރު ލިބިފައި ނުވާ ކަމަށް ފުލުހުން ވަނީ ބުނެފައެވެ.
