ހަލާކުވެ ދަންދެން ފަނޑިޔާރުގެ އިސްލާހުކުރުމުގެ ވާހަކަ ދައްކާނަން: އިމްތިޔާޒު
25 އެޕްރީލު 2019 | ބުރާސްފަތި 03:51ފަޑިޔާރުގެއާ ބެހޭ ގޮތުން ވާހަކަ ދެއްކުމަކީ ކުށެއް ނޫން
މާފަންނު އުތުރު ދާއިރާގެ މެމްބަރު އިމްތިޔާޒު ފަހުމީ
ގައުމާއި ދަރިންގެ ހައްގާއި ކުރިމަގަށް ފަނޑިޔާރުގެ އިސްލާހުކުރާ ވާހަކަ ދައްކަންޖެހޭ ކަމަށާއި، އޭނާ ހަލާކުވެދާނީ ފަނޑިޔާރުގެ އިސްލާހުކުރާ ވާހަކަ ދައްކައިގެން ކަމަށް މާފަންނު އުތުރު ދާއިރާގެ މެމްބަރު އިމްތިޔާޒު ފަހުމީ ވިދާޅުވެއްޖެއެވެ.
ފަލަސުރުހީ ޕްރޮގްރާމްގައި އިމްތިޔާޒު ވިދާޅުވީ ފަނޑިޔާރުގެއާބެހޭ ގޮތުން ވާހަކަ ދެއްކުމަކީ ކުށެއް ނޫން ކަމަށާއި ފަނޑިޔާރުން ވަކި ކުރެވޭނެ ވާހަކަ ދެއްކުން ވެސް އެއީ ކުށެއް ނޫން ކަމަށެވެ. ކުށަކަށް ނުވާ ކަމެއްގައި ބިރު ދައްކައި، މައްސަލަ ބެލުމަށް ތަންތަނަކަށް ނުވެސް ގެންދެވޭނެ ކަމަށް އިމްތިޔާޒު ވިދާޅުވިއެވެ.
އިމްތިޔާޒު ވިދާޅުވީ ފަނޑިޔާރުންގެ ވާހަކަ ދެއްކުމުން ވަކި ތަނަކަށް ގެންގޮސް ސުވާލުކުރުމަކީ ބިރު ދެއްކުން ކަމަށެވެ. އޭނާ ވިދާޅުވީ ފަނޑިޔާރުން ކަންކަން ކުރާ ގޮތުގެ ވާހަކައާ، މިހާތަނަށް ކަންތައްތައް ހިންގާފައިވާ ގޮތުގެ ވާހަކަ ދެއްކުން އެއީ ކުށެއް ކަމަށް ކަނޑައަޅައި ބަޔާންކޮށްފައިވާ ގާނޫނެއް ރާއްޖޭގައި ނެތް ކަމަށެވެ. ކުށެއް ކަމަށް ބަޔާންކޮށް ރައްޔިތުންގެ މަޖިލީހުން ގާނޫނެއް ހަދައިގެން މެނުވީ އެއްވެސް މީހަކަށް އަދަބެއް ނުދެވޭނެ ކަމަށް އިމްތިޔާޒު ވިދާޅުވިއެވެ.
އިމްތިޔާޒު ވިދާޅުވީ އަދުލް އިންސާފަކީ އެންމެންގެ ހައްގެއް ކަމަށާއި، އިންސާފު ނުލިބޭނަމަ އެ ވާހަކަ ދައްކާނެ ކަމަށާއި، އެއީ އެ މީހެއްގެ ހައްގެއް ކަމަށެވެ. މީގެ އިތުރުން އިމްތިޔާޒު ވިދާޅުވީ އިންސާފު ހޯދުމަށް ރާއްޖޭގެ ފަނޑިޔާރުގޭގައި މި ހިންގަމުންދާ ނާއިންސާފުތަކުގެ ވާހަކަ ދައްކަންޖެހޭ ކަމަށާއި، ރައްޔިތުންނަށް ކަންކަން އޮޅުން ފިލުވައިދޭންޖެހޭ ކަމަށެވެ.
''ގަދަ އަޑުން އެ ވާހަކަ ދެއްކުން. ވީހާ ވެސް ބާރަށް އެވާހަކަ ދެއްކުން. ހުރިހާ ތަނެއްގައި ވާހަކަ ދެއްކުން. ކޯޓު ތެރޭގައި ވެސް، މަގުމަތީގައި މަޖިލީހުގައި ވެސް ދެންވެސް ހުރިއްޔާ ހުރި ތަނެއްގައި ޕޯޑިއަމްތަކުގައި ވެސް ޓީވީގައި ވެސް ވާހަކަ ދެއްކުން. އަޅުގަނޑުމެން ކޮންމެ މީހެއްގެ ހައްގެއް،'' އިމްތިޔާޒު ވިދާޅުވިއެވެ.
ރާއްޖެ ޓީވީގެ ފަލަސުރުޚީ ޕްރޮގްރާމުގައި ދެއްކެވި ވާހަކަތަކާ ގުޅިގެން މަރުތައް ބަލާ ކޮމިޝަންގެ ރައީސް އަދި ކުރީގެ ބަންޑާރަ ނައިބު ހުސްނުއްސުއޫދު ސުޕްރީމް ކޯޓަށް ހާޒިރުކޮށް ބަޔާން ނެގި މައްސަލައަށް އަލިއަޅުއްލައްވާ އިމްތިޔާޒު ވިދާޅުވީ ވަކީލުންނަކީ ކޮންމެ ގައުމެއްގައި ވެސް އަދުލްއިންސާފު ގާއިމްކުރުމަށް ވަރަށް ބޮޑު ދައުރެއް އަދާކޮށްދޭ ބައެއް ކަމަށާއި، އެ ބޭފުޅުންގެ ވަރަށް ބޮޑެތި މަސްއޫލިއްޔާތުތައް އޮންނަ ކަމަށެވެ. ކަންކަން ގޯސްކަމަށްދާނަމަ އެކަންކަން ފާހަގަކޮށް އެކަންކަމާ ބެހޭ ގޮތުން ވާހަކަ ދެއްކުން އައުލާކަން ބޮޑީ ވެސް ވަކީލުން ކަމަށެވެ.
ފަނޑިޔާރު ގޭގައި ހުރި މައްސަލަކުގެ ވާހަކަ ހެޔޮ ނިޔަތުގައި ދެއްކެވީމަ މިގެންދަނީ ސުޕްރީމް ކޯޓަށް. ގެންގޮސް މި އިންޒާރު ދިނުމުގެ އަމަލުތައް މިހިންގަނީ. ރާއްޖޭގެ އެކަކު ވެސް އަމިއްލަ ނަފުސުގެ އަނގަ ބަންދުވެގެން ވާހަކަ ދެއްކުން މަނާ ވެގެން ހުރެގެން ނުވާނެ. ވާހަކަ ދައްކައިގެން ކަންކަން އިސްލާހު ކުރެވޭނީ. ވާހަކަ ދައްކައިގެން ކުރިއަށް ގެންދެވޭނީ. ގާނޫނީ ވަކީލުން ޖެހެލުމެއް ނުވާނެ،'' އިމްތިޔާޒު ވިދާޅުވިއެވެ.
އިމްތިޔާޒު ވިދާޅުވީ އިންސާފުވެރި ފަނޑިޔާރުގެއެއް ގާއިމްކުރަން ބޭނުންވާ ކަމަށާއި، އެފަދަ ވާހަކަތަކާއި، މަންޒަރުތައް ދަރިންގެ ދަރިންނަށް ދައްކުވައިދޭން ބޭނުންވާ ކަމަށެވެ.
