ކުރީގެ ސަރުކާރުން އެމީހުންގެ ސިޔާސީ މަސްލަހަތު ހިމާޔަތް ކުރަން ދިވެހި އަސްކަރިއްޔާ ނާޖާއިޒުގޮތުގައި އިންތިހާއަށް ބޭނުންކުރި ކަމަށް ޑިފެންސް މިނިސްޓަރ މާރިޔާ އަހުމަދުދީދީ ވިދާޅުވެއްޖެއެވެ.

127 ވަނަ ސިފައިންގެ ދުވަހުގެ މުނާސަބަތުގައި ބޭއްވި ރަސްމިއްޔާތުގައި ސިފައިންނާ މުޚާތަބު ކުރައްވައި ވާހަކަފުޅު ދައްކަވަމުން މިނިސްޓަރ މާރިޔާ ވިދާޅުވީ ފާއިތުވެގެން ދިޔަ 5 އަހަރަކީ ސިފައިން އެންމެ ދަތި ހާލުގައި އުޅެން ޖެހުނު 5 އަހަރު ކަމަށާއި އެގޮތުން ދިވެހި ސިފައިން ތިބީ ނާއުންމީދުވެ  ވަޒީފާގެ އެއްވެސް ޔަގީންކަމެއް ނެތިފައި ކަމަށާއި ހެދިފައިވާ ގާނޫނޫތަކާއި ގަވާއިދުތަކަށް ބެލުމެއްނެތި ކުރާ އަމުރުތަކާއި ގުޅިގެން ވެސް ސުވާލު ކޮށްލުމުގެ ފުރުސަތު ވެސް ނޯންނަ ކަމަށެވެ. އަދި އެފަދަ ހާލަތެއް މެދުވެރިވެ ސުވާލެއް ކޮށްފިނަމަ އެމީހަކީ މުއައްސަސާއަށް ކިތަންމެ އަގުހުރި ހިދުމަތެއް ކުރި މީހެއް ވިޔަސް ، އެކަމަށް ބެލުމެއް ނެތި ވަޒީފާއިން ވަކިކުރާ ކަމަށެވެ. މިނިސްޓަރ ވިދާޅުވީ ދައުލަތުން އެތައް ހަރަދެއް ކޮށްގެން ގައުމަށް އެތައް ޒަމާނެއް ވަންދެން ހިދުމަތް ކޮށްފައިވާ ސިފައިން ވަނީ ސިޔާސީ މަގްސަދަށްޓަކައި ނުހައްގުން ވަޒީފާއިން ވަކި ކޮށްފައި ކަމަށެވެ. އަދި ޝަކުވާ ހިފައިގެން ދާނެ އަދުލުވެރި ނިޒާމެއް އެއިރު ސިފައިންގެ ތެރޭގައި ނެތް ކަމަށް ވެސް މިނިސްޓަރ ވިދާޅުވިއެވެ.

" ޝަކުވާ ހިފައިގެން ވަޑައިގަންނަވާނެ އަދުލުވެރި ނިޒާމެއް ސިފައިންގެ ތެރޭގައި ވަނީ ނެތިފައި ، ގާނޫނާއި ގަވާއިދަށް ބެލުމެއްނެތި ކުރާ އަމުރުތަކާއި ގުޅިގެން ސުވާލެއް ކޮށްލިއަސް މި މުއައްސަސާއަށް އެތައް އަހަރެއް ވަންދެން އިހްލާސްތެރިކަމާއެކު ކޮށްދިން ހިދުމަތަށް ބެލުމެއްނެތި ވަނީ ވަޒީފާއިން ވަކިކޮށްފައި ، ދިވެހި ސިފައިން ތިބީ ނާއުންމީދުވެފައި. ވަޒީފާގެ އެއްވެސް ޔަގީންކަމެއް ނެތިފަ . އަޅުގަނޑުމެން މި ދަނީ މިކަން ކަމުގައި ރަނގަޅު އުސޫލުތަކެއް ތައާރަފް ކުރަމުން. ބޭނުމަކީ ބޮޑުން ހިތުހުރިހާ ގޮތަަކަށް އެތައް ޒަމާންތަކެއް ވަންދެން ރެޔާއި ދުވާލު ހިދުމަތުގައި އުޅުއްވާފައިވާ ސިފައިން ސިޔާސީ ސަބަބުތަކަށްޓަކައި ވަޒީފާއިން ވަކި ކުރުމުގެ ފުރުސަތު ނުދިނުން " މިނިސްޓަރ ވިދާޅުވިއެވެ.

މިނިސްޓަރ ވިދާޅުވީ ދިވެހި އަސްކަރިއްޔާ އަކީ ޒަމާނީ އަސްކަރިއްޔާއަކަށް ހެދުމަށް ތަފާތު ގިނަގުނަ މަސައްކަތްތަކެއް ކުރެވެމުންދާ ކަމަށާއި އެގޮތުން ދިވެހި ސިފައިންގެ ހުނަރު އިތުރުކޮށް، އިތުރަށް ޕްރޮފެޝަނަލައިޒް ކުރުމާއި އިތުރު ތަމްރީނުގެ ފުރުސަތު ހޯދައިދިނުމުގެ މަސައްކަތް ކުރައްވަމުން ގެންދަވާކަން ފާހަގަކުރެއްވިއެވެ. ދިވެހި ސިފައިންގެ ވެލްފެއަރގެ ކަންކަން އިތުރަށް ފުޅާކޮށް ކެންޓޯންމަންޓް ސްޓައިލް އެކޮމަޑޭޝަން، ސިފައިންގެ ޢާއިލާތަކަށް ލިބިދިނުމުގެ ވިސްނުން ހަޤީޤަތަކަށް ހެއްދެވުމަށް ވެސް ގިނަ ގުނަ މަސައްކަތްތަކެއް ކުރަމުން ގެންދަވާ ކަމަށް މިނިސްޓަރ ވިދާޅުވިއެވެ.

މިރަސްމިއްޔާތުގައި އިތުރަށް ވާހަކަ ދައްކަވަމުން މިނިސްޓަރ ވިދާޅުވީ ދިވެހި އަސްކަރިއްޔާގެ ދައުރު ފުރިހަމައަށް އަދާކުރެވޭނެ ގޮތަށް، ބޭނުންވާ އިކްއިޕްމަންޓް ހޯދުމަށް ގިނަ މަސައްކަތްތަކެއް ކުރައްވަމުން ގެންދަވާ ކަމަށާއި އަސްކަރިއްޔާއަކީ މަސްއޫލިއްޔަތު ފުރިހަމައަށް އަދާކުރާ އަދި ޖަވާބުދާރީވާ އަސްކަރީ ފައުޖަކަށް ހެދުމަށް އަންގާރަ ދުވަހުގެ ރޭ ތައާރަފް ކުރެވުނު ސިފައިންގެ ކެޕްސްޓޯން ޑޮކްޓްރީން އަކީ ލަނޑުދަނޑި ހާސިލްކުރުމުގެ މުހިއްމު ވަސީލަތަކަށް ވެގެންދާނެ ކަމަށެވެ.

މިނިސްޓަރކަމާއި ހަވާލުވުމުގެ ކުރިން އެންމެ ފުރަތަމަ ކުރެއްވި ކަމަކީ ދިވެހި އަސްކަރިއްޔާ އޮތް ހާލަތު ދެނެގަތުން ކަމަށާއި އެ ދިރާސާގައި އަސްކަރިއްޔާ އޮތް ހާލު ފެނިވަޑައިގެން ހިތާމަ ކުރެއްވި ކަމަށް ވެސް މިނިސްޓަރ ވިދާޅުވިއެވެ.