ކިންގް ސަލްމާން މިސްކިތް: 79 ޕަސެންޓް މަސައްކަތް ނިމި، ޖުލައި މަހު ހުޅުވުމު
23 އެޕްރީލު 2019 | އަންގާރަ 09:23ޖުލައި މަހުގެ 31 ގައި މިސްކިތް ހުޅުވޭނެ ކަމަށް ވިދާޅުވި
ސައުދީ ސަރުކާރުގެ ހިލޭ އެހީ ގައި މާލޭ ބީޗް ސަރަހައްދު ގައި ހަދަމުންދާ ކިންގް ސަލްމާން މިސްކިތުގެ 79 ޕަސެންޓް މަސައްކަތް ނިމި، ޖުލައި މަހު ހުޅުވަން ހަމަޖެހިފައިވާ ކަމަށް މިނިސްޓަރ އޮފް ނޭޝަނަލް ޕްލޭނިންގ އެންޑް އިންފްރާސްޓްރަކްޗަރ އިން ބުނެފިއެވެ.
ޖުމްލަ 6000 މީހުންނަށް ނަމާދު ކުރެވޭ ގޮތަށް ހަދާ އެ މިސްކިތަކީ ރާއްޖޭގެ މިނިވަން ކަމަށް 50 އަހަރު ފުރުމުގެ މުނާސަބަތުގައި ސައުދީ ސަރުކާރުގެ އަޅާދޭން ނިންމި މިސްކިތެކެވެ. ކުރީ ސަރުކާރުގައި އެ މިސްކިތުގެ އޮނިގަނޑުގެ (ސްޓަރަކްޗަރަލް ކޮންކްރީޓް) މަސައްކަތް ވަނީ ނިންމާފައެވެ.
މިސްކިތުގެ މަސައްކަތް ކުރިއަށްދާ ގޮތާއި ބެހޭ ގޮތުން ރާއްޖެ.އެމްވީ އަށް މައުލޫމާތު ދެމުން ޕްލޭނިންގ މިނިސްޓްރީގެ ޗީފް އެސިސްޓެން އިންޖިނިއަރ ހަސަން ސާމީ ވިދާޅުވީ، މިސްކިތުގެ މަސައްކަތް ކުރިޔަށް ނުގެންދެވި ލަސްތަކެއްވީ، ފައިސާގެ ދަތިކަމެއް ދިމާވެގެން ކަމަށެވެ.
އެކަމަކު މިހާރު އެ މަސައްކަތް ވަރަށް ބާރަށް ކުރިއަށްދާ ކަމަށާއި، ޕޭމެންޓު ލަސްނުވާނަމަ ޖުލައި މަހު 31 ގައި މަސައްކަތް ނިމޭނެ ކަމަށް ކޮންޓްރެކްޓް ހަވާލުކުރި ފަރާތުން އަންގާފައިވާ ކަމަށް ސާމީ ވިދާޅުވިއެވެ.
ޖުމްލަ 20 މިލިއަން ޑޮލަރު ހޭދަ ކޮށްގެން ހަދާ މިސްކިތުގެ 79 ޕަސެންޓް މިހާރު ނިމިފައިވާ ކަމަށް އޭނާ ވިދާޅުވިއެވެ.
''މިހާރު ހުރީ 100 ޕަސެންޓް ހުރިހާ ކޮންކްރިޓް މަސައްކަތް ނިމިފައި. ދެން ފިނިޝިންގެ މޭޖަރަ މަސައްކަތް ކުރެވެމުންދަނީ.. އޮވަރޯލް ކޮށް 79 ނިމިފައި ވަނީ'' އެކްޗުއަލް ޕްރޮގްރެސް މިއުޅެނީ 79 ޕަސެންޓް'' ސާމީ ވިދާޅުވިއެވެ.
މިހާރު އެހެރީ ޑިޒައިން އަކީ އެންމެ މިސްކިތަށް އެންމެ ރަނގަޅު ޑިޒައިން ކަމަށް އޭނާ ވިދާޅުވިއެވެ.
ހަ ފަންގިފިލާގެ މި މިސްކިތުގައި ކުތުބުހާނާއަކާއި، ގުރްއާނާއި ބެހޭ މަރުކަޒަކާއި، މަލްޓި-ޕާރޕަސް ހޯލަކާއި، ކިލާސްރޫމްތަކާއި، ޖަލްސާކުރާ މާލަންތަށް ހިމެނެއެވެ.
