މަރުތައް ބަލާ ކޮމިޝަންގެ ރައީސް އަދި ކުރީގެ ބަންޑާރަ ނައިބު ހުސްނުއް ސުއޫދު ޝަރުޢީ ދާއިރާއާ ގުޅޭ ގޮތުން ރާއްޖެޓީވީގައި ދެއްކެވި ވާހަކަތައް ބަލަން ސުޕްރީމް ކޯޓުގެ ފަނޑިޔާރުންގެ މަޖިލީހުން ނިންމައިފިއެވެ.
ސުޕްރީމް ކޯޓުގެ ވެބްސައިޓުގައި ޝާއިއުކޮށްފައިވާ ލިޔުމެއްގައި ބުނެފައި ވަނީ ރާއްޖެޓީވީގެ "ފަލަސުރުޚީ" ޕްރޮގްރާމްގައި ޝަރުއީ ދާއިރާއާ ގުޅޭ ގޮތުން ސުއޫދު ދެއްކެވި ވާހަކަތައް، ކޯޓު ޙުރުމަތް ރައްކާތެރިކުރުމާ ބެހޭ ޤަވާޢިދާއި ދިވެހިރާއްޖޭގެ ކޯޓުތަކުގައި ވަކާލާތުކުރާ ޤާނޫނީ ވަކީލުންނާ ބެހޭ ޤަވާޢިދުގެ ދަށުން ބެލުމަށް ސުޕްރީމް ކޯޓުގެ ފަނޑިޔާރުންގެ މަޖިލީހުން ނިންމާފައިވާ ކަމަށެވެ. ނަމަވެސް ތަހުގީގު ކުރަނީ ސުއޫދު ދެއްކެވި ކޮން ވާހަކަތަކެއް ކަމެއް ސުޕްރީމް ކޯޓަކުން ތަފްސީލުކޮށްދީފައެއް ނުވެއެވެ.
"ފަލަސުރުޚީ" ޕްރޮގްރާމްގައި ވާހަކަފުޅު ދައްކަވަމުން ސުއޫދު ވިދާޅުވީ ސުޕްރީމް ކޯޓުގެ ފަނޑިޔާރުންގެ މައްޗަށް އިތުބާރެއް ނެތް ކަމަށާއި އެ ކޯޓުގެ ފަސް ފަނޑިޔާރުން ވަކިކުރަން ޖެހޭ ކަމަށެވެ. އެ ކޯޓުގެ ފަނޑިޔާރުންގެ މައްޗަށް އިތުބާރުު ނެތް ސަބަބުތައް ސުއޫދު ވަނީ ވިދާޅުވެ ދެއްވާފައެވެ. މިސާލެއްގެ ގޮތުގައި ސުއޫދު ވިދާޅުވީ އެކެއް ފެބްރުއަރީގެ އަމުރާއި އިލެކްޝަންސް ކޮމިޝަންގެ މެމްބަރުންގެ މައްޗަށް 2013 ވަނަ އަހަރު ހިންގި ސުމޯޓޯ މައްސަލައެވެ.
އޭނާ ވިދާޅުވީ ފަނޑިޔާރުން މަގާމުން ވަކިކުރަންޖެހޭނީ ހާމަކަން ބޮޑު ޕްރޮސެސްއެއްގެ ތެރެއިން ކަމަށާއި ޖަވާބުދާރީވުމަށް ފަނޑިޔާރުންނަށް ފުރުސަތު ދޭންޖެހޭނެ ކަމަށެވެ. އަދި ވިދާޅުވީ ފަނޑިޔާރުން ކުއްލިއަކަށް ވަކިކޮށްގެން ނުވާނެ ކަމަށެވެ.
"ސުޕްރީމް ކޯޓުގެ ފަނޑިޔާރުންގެ މައްޗަށް އެއްވެސް އިތުބާރެއް ނެތް. ސުޕްރީމް ކޯޓުގެ ހުރިހާ ފަނޑިޔާރުން ވަކިކުރަންޖެހޭ ކަމަށް އަޅުގަނޑު ގަބޫލުކުރަނީ... އަޅުގަނޑު ދެކޭ ގޮތުގައި ޕްރޮސެސްއެއްގެ ތެރެއިން ގޮސް، އެ ޕްރޮސެސް ކޮންޕްލީޓް ކުރަންޖެހޭނީ ވަރަށް ހާމަކަމާއި ހުޅުވާލެވިފައިވާ މޭރުމަކުން،" ސުއޫދު ވިދާޅުވިއެވެ.
ޝަރުއީ ދާއިރާ އިސްލާހު ކުރުމަށް ސަރުކާރުން މަގުޗާޓެއް އެކުލަވާލަންޖެހޭ ކަމަށް ފާހަގަ ކުރައްވައި ސުއޫދު ވިދާޅުވީ ޖުޑީޝަލް ސާވިސް ކޮމިޝަން (ޖޭއެސްސީ)ގެ ކަންކަން ތަރުތީބުކޮށްފައި ވަނީ ފަނޑިޔާރުންނާ ގުޅޭ ގޮތުން ހުށަހަޅާ މައްސަލަތައް ނުބެލޭ ގޮތަށް ކަމަށެވެ.
"އެ މީހުންގެ އިޖުރާއަތްތަކާއި މައްސަލަ ބެލުމުގެ ނިޒާމުތަކާއި މައްސަލަ ބެލުމުގެ އުސޫލުތައް އެކަށައަޅައި ތަރުތީބުކޮށްފައި ހުރީ ފަނޑިޔާރެއްގެ މައްޗަށް ހުށަހެޅޭ މައްސަލައެއް ނުބެލޭނެ ގޮތަށް،" ސުއޫދު ވިދާޅުވިއެވެ.
