ސްރީ ލަންކާގެ ކްރިސްޓިއަނުން އީސްޓަ ސަންޑޭ ފާހަގަ ކުރަމުން ދަނިކޮށް ތިން ފައްޅިއެއްގަ އާއި ކޮލަމްބޯގެ ބައެއް ތަންތަނުގައި ބޮންތަކެއް ގޮއްވާލި ހަމަލާގައި އެންމެ ގިނަ މީހުން މީހުން މަރުވެ، ޒަހަމްވެފައިވަނީ ނެގަމްބޯގެ ކަޓުވަޕިޓިޔާގައި ހުންނަ ސެބަސްޓިއަން ޗާޗުގައި ގޮއްވާލި ބޮމުގެ ހަމަލާގައެވެ.
ބޮން ގޮއްވާލިތާ ތިން ދުވަސްވެފައިވާއިރު، ނެގަމްބޯގެ ޖެނެރަލް ހޮސްޕިޓަލްގައި, ހަމަލާގައި ޒަހަމްވި ގިނަ މީހުންނަށް އަދި ވެސް ދަނީ ފަރުވާ ދެމުންނެވެ.
ސެބަސްޓިއަން ޗާޗުގައި ގޮއްވާލި ބޮމުގެ ހަމަލާގައި މަރުވި 104 މީހުން އަދި ވެސް ހޮސްޕިޓަލްގައި އެބަތިބި ކަމަށާއި، ޒަހަމްވި 100 މީހުންނަށް އަދި ވެސް ފަރުވާ ދެމުން އަންނަ ކަމަށް ނެގަމްބޯ ޖެނެރަލް ހޮސްޕިޓަލްގެ ޑައިރެކްޓަރ ލަންކާގެ ބައެއް މީޑިޔާތަކަށް މައުލޫމާތު ދެމުން ވަނީ ވިދާޅުވެފައެވެ.
ރަގަމާ ހޮސްޕިޓަލްގެ ހަމަލާގައި ޒަހަމްވި މީހުންގެ ތެރެއިން 32 މީހަކަށް އަދި ވެސް ފަރުވާ ދެމުން އަންނަ ކަމަށް ލަންކާގެ މީޑިޔާތަކުން ވަނީ ރިޕޯޓް ކޮށްފައެވެ.
ސްރީ ލަންކާގެ ކްރިސްޓިއަނުން އީސްޓަ ސަންޑޭ ފާހަގަ ކުރަމުން ދަނިކޮށް ތިން ފައްޅިއެއްގަ އާއި ކޮލަމްބޯގެ ބައެއް ތަންތަނުގައި ބޮންތަކެއް ގޮއްވާލި ހަމަލާގައި، ޝައްކު ކުރެވޭ 24 މީހަކު ވަނީ ހައްޔަރު ކޮށްފައެވެ. އަދި މި ހަމަލާގައި މަރުވި މީހުންގެ އަދަދު 310 އަށް އަރާފައިވާއިރު، ޒަހަމްވި މީހުންގެ އަދަދު ވަނީ 500 އަށް އަރާފައެވެ.
