ފަޒީލް ޤައުމީ ރެކޯރޑް ތިންވަނަ ފަހަރަށް އާކުރިއިރު، ސާއިދު ސެމީ އަށް!

ގަތަރުގެ ދޯހާގައި އާދިއްތަ ދުވަހު ފެށި އޭޝިއަން އެތުލެޓިކްސް ޗެމްޕިއަންޝިޕްގެ 10،000 މީޓަރު (10 ކިލޯމީޓަރު) ދުވުމުން ރާއްޖޭގެ ހުސައިން ފަޒީލް ހާރޫން ޤައުމީ ރެކޯރޑް އައުކުރި އިރު، ހަސަން ސާއިދު ވަނީ މުބާރާތުގެ 100 މީޓަރު ދުވުމުން ސެމީ ފައިނަލަށް ދަތުރު ކޮށްފައެވެ.

ފަޒީލް ޤައުމީ ރެކޯރޑް އައުކޮށްފައިވަނީ 32:46 މިނެޓުން ރޭސް ނިންމައިގެންނެވެ. އޭނާ އެންމެ ފުރަތަމަ ޤައުމީ ރެކޯރޑް މުގުރާލާފައި ވަނީ 2017 ވަނަ އަހަރު ބޭއްވި އޭޝިއަން އެތުލެޓިކްސް ޗެމްޕިއަންޝިޕްގައި 34:21 މެނެޓުން ރޭސް ނިންމައިގެންނެވެ. 28 އަހަރަށް ފަހު ފަޒީލް މި ރެކޯރޑްމުގުރާލީ ހުސައިން ހަލީމް (ކުޑަހުސެން) 1989 ވަނަ އަހަރު ހަދާފައިވާ ރެކޯރޑް މުގުރާލައިގެންނެވެ.

ދެވަނަ ފަހަރަށް ފަޒީލް ޤައުމީ ރެކޯރޑް އައުކުރީ 2018 ވަނަ އަހަރުގެ އޮކްޓޯބަރު މަހުގައި ބޭއްވި ޤައުމީ މުބާރާތުގައި 33:34 މިނެޓުން 10 ކިލޯމީޓަރު ދުވެގެންނެވެ. މި މުބާރާތުގައި އޭނާ ތިން ރަން މެޑަލް ހާސިލް ކުރިއިރު، މުބާރާތުގެ އެންމެ މޮޅު އެތުލީޓްގެ މަޤާމު ވެސް ލިބުނީ އޭނާ އަށެވެ.

ހަސަން ސާއިދު / 2015 ވަނަ އަހަރުގެ އޭއޭސީ

އޭޝިއަން އެތުލެޓިކްސް ޗެމްޕިއަންޝިޕްގެ 100 މީޓަރު ދުވުމުން ސެމީ ފައިނަލަށް ސާއިދު ދަތުރުކުރީ ފުރަތަމަ ބުރުގެ އެއް ވަނަ ހީޓުގައި 10.47 ސިކުންތު ދުވެގެންނެވެ.

މި މުބާރާތުގައި ފަޒީލްއާއި ސާއިދުގެ އިތުރުން ރާއްޖޭގެ ޓީމުގައި ހިމެނެނީ ނަޖޫމް ހަސަން، އިބްރާހިމް އަފްޝާން އަލީ، އިބާދުﷲ އާދަމް އަދި ހުސައިން ރިޒާގެ އިތުރުން ސާރިސް އަހުމަދެވެ.

މުބާރާތުގައި ފަޒީލް ދެން ދުވާނީ 5000 މީޓަރު ރޭހުގަ އެވެ. ސާއިދަށް ދެން އޮތީ 100 މީޓަރު އަދި 400 މީޓަރު ރިލޭ އެވެ. އޭނާއާ އެކު ސަރީސް ވެސް އެ ދެ އިވެންޓުގައި ވާދަކުރާނެ އެވެ. އަފްޝާން އާއި އިބާދުﷲ ވާދަކުރާނީ 200 މީޓަރު ދުވުމާއި 100 މީޓަރު ރިލޭ އާއި 400 މީޓަރު ރިލޭގަ އެވެ. ނުޖޫމް ދުވުމަށް ހަމަޖެހިފައިވަނީ 100 މީޓަރު ރިލޭ އާއި 400 މީޓަރު ރިލޭގަ އެވެ. ރިޒާ ތިން އިވެންޓެއްގައި ދުވާނެ އެވެ. އެއީ 800 މީޓަރު ދުވުމާއި 1500 މީޓަރު ދުވުން އަދި 400 މީޓަރު ރިލޭ އެވެ.