އާޓިސްޓުންނަށް ދިމާވާ އެންމެ ބޮޑު މައްސަލައަކީ ފުރުސަތު ނުލިބުން ކަމަށާއި، މަސައްކަތް ކުރަނީ ގިނަ ފުރުސަތުތައް ހޯދައިދޭން ކަމަށް ހެރިޓޭޖް މިނިސްޓްރީގެ ސްޓޭޓް މިނިސްޓަރު މުހައްމަދު ތޯރިގު ވިދާޅުވެއްޖެއެވެ.

ފަލަސުރުހީ ޕްރޮގްރާމްގައި ތޯރިގު ވިދާޅުވީ އާޓިސްޓުންނަށް ދިމާވާ ގިނަ ގޮންޖެހުންތައް އެބަހުރި ކަމަށެވެ.

އެގޮތުން އެމީހުންގެ ހުނަރު ކުރިއެރުވުމަށް ފަހި މާހައުލެއް ނެތް ކަމަށާއި، މިއަދާ ހަމައަށް ކަމާބެހޭ މުއައްސަސާތަކުން މާބޮޑު ސަމާލުކަމެއް ދީފައިނުވާ ކަމަށް ތޯރިގު ވިދާޅުވިއެވެ.

ތޯރިގު ވިދާޅުވީ ހުނަރު ދައްކާލުމަށް އޮލިންޕަސް ނުވަތަ ނޭޝަނަލް އާޓް ގެލަރީ ނޫންތަނެއް މިމާލޭގައި ނެތް ކަމަށާއި، ކޮންމެ ދުވަހަކީ ވެސް މިދެތަނުގައި ކޮންމެ ވެސް ހަރަކާތެއް ބާއްވާ ދުވަހެއް ކަމަށެވެ.

އާޓިސްޓުން އެމީހުންގެ ހުނަރު ކުރިއަރުވައި ތަރައްގީ ކުރުމަށް ތަނެއް ބޭނުންވާކަން ފާހަގަކުރައްވައި ތޯރިގު ވިދާޅުވީ އެމީހުންނަށް ފުރުސަތުތައް ލިބޭ ގޮތަށް މުޖުތަމައު ބައްޓަން ކުރަންޖެހޭ ކަމަށެވެ.

''އާޓިސްޓުންނޭ ބުނީމަ އެއީކީ ވަރަށް ބައިވަރު. އާޓިސްޓުންގެ ގޮތުގަ ވަރަށް ގިނަ ވައްތަރު މިއުޒިޝަނުންނާއި، ކުރެހުންތެރިން ހިމެނޭ. ވަރަށް ގިނަ އެކުލެވިގެން އަންނައިރު ގިނަ ގޮންޖެހުންތައް އެބަހުރި. ޒަމާނުއްސުރެ ކުރިމަތިވަމުން އަންނަނީ. އެކަމަކު ހައްލު ހޯދިފަނުވޭ'' ތޯރިގު ވިދާޅުވިއެވެ.

އަންނަ ހޮނިހިރު ދުވަސް ތަރިކައިގެ ދުވަހުގެ ގޮތުގައި ފާހަގަކުރާކަން ފާހަގަކުރައްވައި ތޯރިގު ވިދާޅުވީ މިދުވަސް ފާހަގަކުރަނީ ރައްޔިތުން ހޭލުންތެރިކޮށް ކަންތައްތަކެއް ދަސްކޮށްދިނުމުގެ މަގުސަދު ކަމަށެވެ.

ތޯރިގު ވިދާޅުވީ ތަރިކަ ދުވަހުގެ ހަރަކާތްތައް ބާއްވަނީ ސަލްޓަން ޕާކާއި އިސްލާމީ މަރުކަޒުގެ މާބުލް ޖެހިސަރައްދުގައި ކަމަށާއި، ކުރިއަށް ގެންދަނީ ދެދަންފަޅިއަށް ބަހާލައިގެން ކަމަށެވެ.

ތޯރިގު ވިދާޅުވީ އާޓިސްޓުންނަށް އެތަނުގައި މަންޒަރު ކުރެހުމަށް ފަހު ވަގުތުން ވިއްކާލުމުގެ ފުރުސަތު ލިބޭނެ ކަމަށާއި، އަދި އާންމުންނަށް ކުރަހާ މަންޒަރު ވެސް ފެންނާނެ ކަމަށެވެ. އަދި މިދުވަހުގެ ހަރަކާތްތަކުގައި ގިނަ އާޓިސްޓުން ބައިވެރިވުމަކީ ލިބޭނެ ވަރަށް ބޮޑު ކުރިއެރުމެއް ކަމަށް އޭނާ ވިދާޅުވިއެވެ. 

މީގެ އިތުރުން ތޯރިގު ވިދާޅުވީ އެވޭލާ ޒަމާނުއްސުރެ ކާބަފައިންގެ ފަރާތުން ވާރުތަވެފައި ހުރި މަސައްކަތްތައް ފެންނަ ފޮޓޯތައް އާންމު ކުރެވޭނެ ކަމަށެވެ.

''މިސްކިތުގެ މަސައްކަތްތަކާ، މަހާނަ ގަލުގެ މަސައްކަތްތައް މިއީ ކާބަފައިން  ކުރަމުން އައި ބުރަ މަސައްކަތްތައް. މިހަރަކާތްތަކުން ބޭނުންވަނީ އާދަތައް އަށަގަންނަވަން. މީގެ އިތުރުން ވެސް ކާބޯތަކެތި ލިބޭ ސްޓޯލްތައް ވެސް ހުންނާނެ. މިސްޓޯލްތަކުން ދިވެހި ރަހައިގެ ދިވެހި ކެޔުންލިބޭނީ'' ތޯރިގު ވިދާޅުވިއެވެ.

ދުނިޔޭގެ ތަރިކައިގެ ދުވަހާއި ދުނިޔޭގެ ކުރެހުމުގެ ދުވަސް ފާހަގަ ކުރުމުގެ ގޮތުން ބާއްވާ މިހަރަކާތް ފެށޭނީ ހޮނިހިރު ދުވަހުގެ 16:00 އިން 18:00 އަށް އަދި 20:00 އިން 22:00 އަށެވެ.