ކެލާ އަދި ފުވައްމުލަކުގައި ދަނޑުވެރިކަމުގެ ސަރވޭ ފަށައިފި
16 އެޕްރީލު 2019 | އަންގާރަ 17:00ސަރވޭ ހިންގަނީ 11 ރަށެއްގައި
ދަނޑުވެރިކަމުގެ ސަރވޭ ފުވައްމުލަކުގައި ކުރިޔަށް ދަނީ
މިނިސްޓްރީ އޮފް ނޭޝަނަލް ޕްލޭނިންގ އެންޑް އިންފްރާސްޓްރަކްޗަރ އާއި މިނިސްޓްރީ އޮފް ފިޝަރީޒް މެރިންރިސޯސް އެންޑް އެގްރިކަލްޗަރ ގުޅިގެން ރާއްޖޭގެ އެކިކަންކޮޅުތަކުގައި ހިންގާ ދަނޑުވެރިކަމުގެ ސަރވޭ ފަށައިފިއެވެ.
މި ސަރވޭގެ މައިގަނޑު މަގުސަދަކީ ދެމެހެއްޓެނިވި ގޮތެއްގައި ދަނޑުވެރިކަން ތަރައްގީ ކުރުމަށް ބޭނުންވާ މައުލޫމާތު ހަރުދަނާކުރުމާއި، ދަނޑުވެރިކަމުގެ ޕޮލިސީތައް ހެދުމުގައި ހަރުދަނާ ތަފާސްހިސާބުގެ ނިޒާމެއް ބޭނުންކުރުމެވެ. އަދި ދަނޑުވެރިންގެ ހާލަތު ދެނެގަނެ، ދަނޑުވެރިކަމުގެ ދާއިރާއިން ކުރިއެރުވޭނެ ކަންތައްތައް ދެނެގަތުން ކަމަށް މިނިސްޓްރީން ބުންޏެވެ. އަންގާރަ ދުވަހު މި ސާރވޭ ވަނީ ހއ. ކެލާގެ އިތުރުން ފުވައްމަލަކުގައި ހިންގާފައެވެ. ސަރވޭގައި ހަރަކާތްތެރިވަނީ ތަމްރީނު ކުރެވިފައިވާ އެނިމޭޓަރުންނެވެ.
ދަނޑުވެރިކަމުގެ ސަރވޭގެ ތެރެއިން . ފޮޓޯ: ފިޝަރީސް މިނިސްޓްރީ
ސަރވޭ ހިންގަން ހަމަޖެހިފައިވާ ރަށްތަކަކީ، ޏ.ފުވައްމުލައް، ސ.މީދޫ، ހއ.ކެލާ، ލ.ގަން، ލ.ފޮނަދޫ، ކ.ކާށިދޫ، ފ.މަގޫދޫ، އދ.މާމިގިލީ،ޅ. ނައިފަރު އަދި ގދ. ގައްދޫގެ އިތުރުން އއ. ތޮއްޑޫއެވެ.
ޕްލޭނިން މިނިސްޓްރީން ބުނީ މި ސަރވޭއިން އެއްކުރެވޭ މައުލޫމާތުތަކުގެ ތެރޭގައި ރާއްޖޭގައި ދަނޑުވެރިކަން ކުރާ މައިގަނޑު ގޮތްތައް، ރާއްޖޭގައި ހައްދާ ދަނޑުވެރިކަމުގެ ބާވަތްތަކާއި އެބާވަތްތައް ހައްދާ ގޮތާއި ވިއްކާ ގޮތް ހިމެނެއެވެ. އަދި ދަނޑުވެރިކަމުން ދިވެހިރާއްޖެއަށާއި ދަނޑުވެރިންނަށް ލިބޭ އާމްދަނީ އާއި ހަރަދު ދެނެގަތުމާއި ދިވެހިރާއްޖޭގެ ދަނޑުވެރިކަން އިތުރަށް ހަރުދަނާ ކުރެވޭނެ ގޮތްތައް ހޯދާ ބެލުމާއި މައިގަނޑު ގޮތެއްގައި ދަނޑުވެރިކަން ކުރާ ރަށްތަކުގެ މައުލޫމާތުތައް ހޯދުން ހިމެނެއެވެ.
