ގަސް ގިނަ، ފެހިކަން ގަދަ ރ. ފައިނުގައި އެއާޕޯޓު ނާޅަން ސަރުކާރުން ނިންމައިފިއެވެ.
ޓްރާންސްޕޯޓް މިނިސްޓްރީގެ އޮފިޝަލަކު "ރާއްޖެއެމްވީ"އަށް ވިދާޅުވީ ފައިނުގައި އެއާޕޯޓް އެޅުމަކީ ތިމާވެއްޓަށް ބޮޑެތި ގެއްލުންތަކެއް ލިބޭނެ ކަމަކަށް ވާތީ، އެއާޕޯޓް އެ ރަށުގައި ނާޅަން ނިންމާފައިވާ ކަމަށެވެ. ފައިނުގައި އެއާޕޯޓް ނާޅަން ރައީސުލްޖުމްހޫރިއްޔާގެ އޮފީހުން ވެސް ޓްރާންސްޕޯޓް މިނިސްޓްރީއަށް އަންގާފައިވާ ކަމަށް އޮފިޝަލް ވިދާޅުވިއެވެ.
ސަރުކާރުން އެގޮތަށް ނިންމާފައި ވަނީ އެ ރަށުގައި އެއާޕޯޓް އެޅުމާ ދެކޮޅަށް އިހުތިޖާޖުކޮށް، އެކަމުގެ ކަންބޮޑުވުން ސަރުކާރަށް ހިއްސާ ކޮށްފައިވަނިކޮށެވެ. ދަނޑުވެރި ކަމަށް މަޝްހޫރު ފައިނުގައި އެއާޕޯޓް އަޅައިފިނަމަ، އެ ރަށުގެ ތިމާވެއްޓަށް އިޔާދަނުކުރެވޭނެ ގެއްލުމެއް ލިބިދާނެތީ އެކަމުގެ ކަންބޮޑުން ރައީސް ޔާމީންގެ ސަރުކާރަށް ހުށަހެޅުމުން އެކަމަށް ދީފައި ވަނީ ބީރުކަންފަތެކެވެ.
ޕީޕީއެމްގެ ސަރުކާރުން ފައިނުގައި އެއާޕޯޓް އެޅުމަށް ހަވާލު ކުރީ އައިލެންޑް އޭވިއޭޝަނާއެވެ. އެ ރަށުގައި އެއާޕޯޓް އަޅާނީ އެ ކުންފުނިން ނަގާ ލޯނަކާއި ބައެއް ރިސޯޓްތަކުގެ އެހީގައި ކަމަށް ކުރީގެ ސަރުކާރުން ވަނީ ބުނެފައެވެ. އެ މަޝްރޫއުއަށް ގާތްގަނޑަކަށް 120 މިލިއަން ރުފިޔާ ހަރަދުވާނެ ކަމަށް ވަނީ ލަފާކޮށްފައެވެ.
ފައިނުގައި އެއާޕޯޓް އެޅުމަށް ހެދި އެންވައިރަމަންޓަލް އިމްޕެކްޓް އެސެސްމަންޓް (އީއައިއޭ) ރިޕޯޓުގައި ބުނެފައިވާ ގޮތުން އެ މަޝްރޫއު ކުރިއަށް ގެންދަން އެ ރަށުން 5،792 ގަސް ކަނޑަން ޖެހެއެވެ. 451 މީހުންގެ އާބާދީއެއް އޮންނަ ފައިނުން އެހާ ގިނަ އަދަދެއްގެ ގަސް ކަނޑަައި އެއާޕޯޓް އަޅައިފިނަމަ ރަށުގެ ދަނޑުބިންތައް ގެއްލި، ފަށަލަ އާއި ރަށުގެ ފިނިހޫނުމިނަށް ނޭދެވޭ އަސަރު ކުރާނެ ކަމަށް ވަނީ ލަފާ ކޮށްފައެވެ.
ފައިނުގައި އެއާޕޯޓް ނާޅަން ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހުގެ ސަރުކާރުން ނިންމުން، ސޯޝަލް މީޑިއާގައި ބައެއް މީހުން ދަނީ އެކަމަށް ޝުކުރުއަދާކޮށް، ސަރުކާރަށް ތައުރީފު ކުރަމުންނެވެ.
