ކުރީގެ ރައީސް މައުމޫން އަބްދުލްގައްޔޫމް އިސްވެ ހުންނަވައިގެން އުފައްދަވާ ޕާޓީ, މޯލްޑިވްސް ރިފޯމް މޫވްމަންޓް (އެމްއާރްއެމް) އަށް އަންނަ ހަފްތާތެރޭގައި 3000 މެމްބަރުން ހަމަވާނެ ކަމަށް އެ ޕާޓީން ބުނެފިއެވެ. 

އާދީއްތަ ދުވަހު މޯލްޑިވިސް ރިފޯމް މޫވްމަންޓްގެ ސެކްރެޓަރީ ޖެނެރަލް އަބްދުލް އަލީމް ރާއްޖެއެމްވީ އަށް މައުލޫމާތު ދެއްވަމުން ވިދާޅުވީ ޕާޓީ އުފެއްދުމުގެ މަސައްކަތް ބާރަށް ކުރިޔަށް ދާ ކަމަށާއި ރައްޔިތުންގެ މަޖިލީހުގެ އިންތިހާބަށް ފަހު އަތޮޅުތެރޭގައި ވެސް ފޯމް ހަމަކުރުމުގެ މަސަތްކަތް ކުރަމުން އަންނަ ކަމަށެވެ. މިހާރު ފޯމްތައް ހުރި އަދަދު ދަންނަވަން އެނގޭނީ އަތޮޅުތަކުން ފޯމްތައް ލިބުމުން ކަމަށާއި އެހެން ނޫނީ އެ ވާނީ ދޮގު މައުލޫމާތަކަށް ކަމަށް ވެސް އަލީމް ވިދާޅުވިއެވެ. އިތުރަށް މައުލޫމާތު ދެއްވަމުން އަލީމް ވިދާޅުވީ، އިންސާފަށް ލޯބި ކުރާ އަނިޔާވެރިކަމަށް ދެކޮޅު އަދި ރައީސް މައުމޫންއަށް ތާއީދު ކުރައްވާ ޕީޕީއެމްގެ މެމްބަރުން ވެސް އެމްއާރްއެމަށް ގުޅިވަޑައިގަންނަވާނެ ކަމަށް އުންމީދު ކުރައްވާ ކަމަށެވެ.

ރައީސް މައުމޫން އެމްއާރްއެމްއަށް ސޮއިކުރެއްވީ އެ ޕާޓީގެ މެންބަރޝިޕް އިތުރުކުރުމުގެ މަސައްކަތް ކުރަމުންދާ އެންދެރިމާގޭގައި ފެބްރުއަރީމަހުގެ 22 ވަނަ ދުވަހުގައެވެ. ޕީޕީއެމްގެ ރައީސްއަކަށް ހުންނަވަނިކޮށް، އެ މަނިކުފާނު އެ މަގާމުން ވަކިކޮށް، ސިވިލް ކޯޓަށް ހުށަހަޅައިގެން ޕާޓީ ހިންގެވުމުގެ ބާރު ކުރީގެ ރައީސް އަދި މައުމޫންގެ ކޮއްކޯފުޅު އަބްދުﷲ ޔާމީން ނެންގެވި އެވެ. މޯލްޑިވްސް ރިފޯމް މޫވްމަންޓްގެ ނަމުގައި ސިޔާސީ ޕާޓީއެއް އުފެއްދުމުގެ ހުއްދަ އިލެކްޝަން ކޮމިޝަނުން ދީފައިވަނީ  ފެބްރުއަރީ މަހުގެ 19 ވަނަ ދުވަހުއެވެ. އަދި ޕާޓީ އުފެއްދުމަށް ހުށައެޅުމުގެ އެންމެ ފަހު ތާރީޚަކީ އަންނަ މެއި މަހުގެ 19 ވަނަ ދުވަހެވެ.