ދިވެހި ކާބަފައިން މި ޤައުމު މިނިވަންކަމާއެކީ މިއަދާ ހަމަޔަށް ގެނެސް ދިނުމަކީދިވެހިންނަށް ލިބިފައިވާ އެންމެ ބޮޑު ހަދިޔާ ކަމަށް ރައީސުލްޖުމްހޫރިއްޔާގެ ނައިބު ފައިސަލް ނަސީމް ވިދާޅުވެއްޖެއެވެ.
ޝަހީދުންގެ ދުވަސް ފާހަގަކުރުމަށް ހޮނިހިރު ދުވަހުގެ ރޭ ދަރުބާރުގޭގައި އޮތް ރަސްމީ ޖަލްސާ ޝަރަފުކޮށްދެއްވައި ވާހަކަފުޅު ދައްކަވަމުން ނައިބު ރައީސް ވިދާޅުވީ ދިވެހި ރައްޔިތުން އެންމެ ބޮޑަށް ބޭނުންވާނެ އެއް ކަމަކީ މި އަގުބޮޑު ހަދިޔާ، އަދި ދިވެހިންނަށް ލިބިފައިވާ އިސްލާމީ ހިދާޔަތުގެ އަލިކަން، ތާއަބަދު ދެމިއޮތުން ކަމުގައެވެ.
ބަވަނަވެފައިވާ ދުނިޔޭގައި ތަފާތު އެކި އޮއިވަރުގައި ވިސްނަންޖެހޭ ކިތަންމެ ކަންތައްތަކެއް އެބަހުރި ކަމަށާއި، އެ އޮއިވަރުގެ ތެރޭގައި ދިވެހިން ތިބެން ޖެހޭނީ އެއްބައެއްވަންތަ ބައެއްގެ ގޮތުގައި ކަމަށް ނައިބު ރައީސް ވިދާޅުވިއެވެ.
ރާއްޖޭގެ ތާރީހު ހެކިދޭ ގޮތުގައި ގިނަ ހާދިސާތައް ރާއްޖޭގައި ހިނގާފައިވަނީ ދިވެހިންގެ ތެރެއިން ބަޔަކު ދިވެހި ޤައުމަށް ޣައްދާރުވުމުންކަން ފާހަގަކުރައްވާ ފައިސަލް ވިދަޅުވީ މިއީ މިފަދަ ދުވަހެއް ފާހަގަކުރަމުންދާއިރު ލިބިގަންނަންވީ ޢިބްރަތެއް ކަމުގައެވެ. އަދި އެފަދަ ކަންކަމަށް ސަމާލުވުމަށް އެމަނިކުފާނު ވަނީ ގޮވައިލައްވާފައެވެ.
މީގެ އިތުރުން މިހަފުލާގައި ރައީސުލްޖުމްހޫރިއްޔާގެ ނައިބު ވަނީ ރާއްޖެއަށް ކުރިމަތިވި ޢުދުވާނީ ހަމަލާތަކުގެ ދިފާޢުގައި ނުކުމެވަޑައިގެން ޝަހީދުވެވަޑައިގެންނެވި ބަޠަލުންގެ ޒިކުރާ އާކުރައްވައިފައެވެ. ތަފާތު އެކިފަހަރު މަތިން ދިވެހިންގެ ޤައުމިއްޔަތާއި، ދީނާއި މުޅި ޤައުމަށް ކުރިމަތިވި އެކިކަހަލަ ޢުދުވާނީ ޙަމަލާތަކުން ދިވެހި ރައްޔިތުންނާއި ޤައުމު ސަލާމަތް ކުރުމަށްޓަކައި އެބޭފުޅުން ކުރެއްވި މަތިވެރި ޖިހާދަކީ ދިވެހިންގެ ހިތްތަކުގައި ތާއަބަދު ދިރިދެމި އޮންނާނެ ކަންތައްތަކެއް ކަމުގައި ރައީސުލްޖުމްހޫރިއްޔާގެ ނައިބު ވިދާޅުވިއެވެ.
މި ހަފްލާގައި ނައިބު ރައީސްގެ އިތުރުން ހޯމް މިނިސްޓަރު އިމްރާން އަބްދުﷲ އާއި ކެބިނެޓްގެ އިސް ވަޒީރުން ވަނީ ބައިވެރިވެވަޑައިގެންފައެވެ.
