އެޖެންޑާ 19 ގެ ދަށުން އެމްޑީޕީން ރައްޔިތުންނަށް ވީ ވައުދުތަައް ފުއްދައިދިނުމަށް ކެތްމަދުވެފައި ހުންނެވި ކަމަށް ހިންނަވަރު ދާއިރާގެ ގޮނޑި ކާމިޔާބުކުރެއްވި އެމްޑީޕީގެ ކެންޑިޑޭޓް ޖީހާން މަހުމޫދު ވިދާޅުވެއްޖެެއެވެ.

ގޮނޑި ކާމިޔާބުކުރެއްވުމަށް ފަހު މީޑިއާއަށް ދެއްވި ފުރަތަމަ އިންތަވިއުގައި، ރާއްޖެޓީވީގެ "މަޖިލިސް19" ޕްރޮގްރާމްގައި ދެންނެވި ސުވާލަކަށް ޖަވާބުދެއްވަމުން ޖީހާން ވިދާޅުވީ، ރައްޔިތުން އެހާ ބޮޑު އިތުބާރެއްކޮށް ދިން ވޯޓާ އެކު އަވަސްވެގަންނަން ބޭނުންފުޅުވަނީ، އެމްޑީޕީން ވެފައިވާ ވައުދުތައް ފުއްދުމަށާއި ކުރެވެން ހުރި މަސައްކަތްތައް ކޮށްދެއްވުމަށް ކަމަށެވެ.

"ވަރަށް އިމޯޝަނަލްވެ، ހިތް އަވަސްވެފައި އަޅުގަނޑު މި ހުންނަނީ ހަމަ މި މަސައްކަތް ކުރާހިތުން. މި މަސައްކަތް ރަނގަޅު ގޮތުގައި ކުރާހިތުން،" ޖީހާން ވިދާޅުވިއެވެ.

ހިންނަވަރު ދާއިރާއަށް އިންތިޚާބުކޮށްދިން ހުރިހާ ރައްޔިތުންނަށް ޝުކުރު އަދާކުރައްވަމުން ވިދާޅުވީ، މަޖިލީހުގެ މަސައްކަތްތައް ފަށައިގަނެވުމުން އެންމެ ފުރަތަމަ ވެސް މަސައްކަތްކޮށްދެއްވުމަށް ބޭނުންފުޅުވަނީ، ހިންވަރު ދާއިރާގެ ރައްޔިތުންނަށް ބޯހިޔާވަހިކަން ކަށަވަރުކޮށްދިނުމުގެ މަސައްކަތްޕުޅު ކަމަށެވެ.

މަޖިލީހުގެ ނައިބު ރައީސް ކަމަށް ޝައުގުވެރިކަން އެބަހުރިތޯ ދެންނެވުމުން ވިދާޅުވީ، އެކަމަށް އެއްވެސް ވަރަކަށް ޝއުގުވެރިކަން ނެތް ކަމަށެވެ. އަދި އެ މަގާމަށް އެންޑޯސް ކުރައްވާ ނަމަ ކުރައްވާނީ ގަލޮޅު އުތުރު ދާއިރާގެ މެންބަރު އީވާ އަބުދުﷲ ކަމަށް ވިދާޅުވިއެވެ.

މަޖިލީހަށް އަންހެން ބޭފުޅުން ހޮވިވަޑައިގެންނެވި އަދަދު މަދުވުމަކީ ބޮޑު ކަންބޮޑުވުމެއް ކަމަށާއި، އަންހެނުން ބާރުވެރި ކުރުވުމަށް މަޖިލީހުގެ ތެރެއިން ގިނަ މަސައްކަތްތަކެއް ކޮށްދެއްވުމުގެ އަޒުމުގައި ހުންނެވި ކަމަށް ޖީހާން ވިދާޅުވިއެވެ.

ޖީހާން މަހުމޫދު ހިންނަވަރު ދާއިރާގެ ގޮނޑި ކާމިޔާބުކުރެއްވީ ހިންވަރުގެ ތާރީޚުގައި ވެސް ލިބުނު އެންމެ ގިނަ ވޯޓް ހޯއްދަވައިގެންނެެެވެ. މި އިންތިޚާބުގައި އެދާއިރާއިން 1779 ވޯޓް ޖީހާން ހޯއްދެވިއެވެ.