ރަސްދޫ ރައްޔިތުން ބޭނުންވެފައި ހުރި ކަންކަމާ މެދު މަޝްވަރާކުރުމަށް ކައުންސިލުން ރައީސްއާއި ބައްދަލު ކުރައްވައިފި

ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހު، އއ.ރަސްދޫ ކައުންސިލްގެ މެންބަރުންނާ ބައްދަލުކުރައްވާ، ރަސްދޫ ރައްޔިތުން އެންމެ ބޮޑަށް ބޭނުންވެފައިވާ ކަންކަމާއި ބެހޭ ގޮތުން މަޝްވަރާ ކުރައްވައިފިއެވެ.

ބުދަ ދުވަހު ރައީސް އޮފީހުގައި ބޭއްވި ބައްދަލު ކުރެއްވުމުގައި ކައުންސިލް މެމްބަރުން ވަނީ ރަށަށް ކުރިމަތިވެފައިވާ މައްސަލަތައް ފާހަގަ ކުރައްވާފައެވެ. އެގޮތުން ރަސްދޫ ކައުންސިލްގެ ފަރާތުން ފާހަގަ ކުރެއްވި ކަންތައްތަކުގެ ތެރޭގައި، ރަށުގެ ބޭރު ތޮށިލުމުގެ މަޝްރޫއުގެ މަސައްކަތް ތިން މަރުޙަލާއަކަށް މިހާރު ބަހާލާފައިވާތީ އެ މަޝްރޫއުގެ މަސައްކަތް އެއް މަރުހަލާއަކުން ނިމޭނެގޮތެއް ހައްދަވައި ދެއްވުމަށް އެދިފައެވެ.

މީގެ އިތުރުން ރަސްދޫއަށް ދިމާވެފައިވާ ރަށް ގިރުމުގެ މައްސަލަ ހައްލުކޮށްދެއްވުމަށާއި، ރަސްދޫގެ ބިމުގެ ދަތިކަމާއި، ބަނދަރުގެ ދަތިކަން އަދި ހޮސްޕިޓަލު ތަރައްގީ ކުރުމުގެ އިތުރުން ފެރީ ގިމަތައެއް ތަރައްގީކުރުމާއި ބެހޭގޮތުން ކައުންސިލް މެމްބަރުން ވަނީ ރައީސް ސޯލިހާ މަޝްވަރާ ކުރައްވާފައެވެ.

މި ބައްދަލުކޮށްލެއްވުމުގައި ރައީސުލްޖުމްހޫރިއްޔާ ދެއްކެވި ވާހަކަފުޅުގައި ރަސްދޫ ކައުންސިލުން އެދިވަޑައިގެންފައިވާ ކަންކަމުގައި ކަމާގުޅޭ މިނިސްޓްރީތަކާއެކު މަޝްވަރާ ކުރައްވައިގެން އެކަންކަމަށް ޙައްލެއް ހޯއްދަވައިދެއްވަން މަސައްކަތްޕުޅު ކޮށްދެއްވާނެ ކަމުގައި ވިދާޅުވިއެވެ.

މި އަހަރުގެ ބަޖެޓުގައި ރަސްދޫގައި ކުރަން ބަޖެޓުކުރެވިފައިވާ ކަންކަމުގެ ތެރޭގައި އެމްއެންޔޫގެ ޖޫނިއަރ ކޮލެޖެއް އެޅުމާއި، އެރަށުގެ ބޭރު ތޮށި ލުމުގެ މަޝްރޫއާއި އަދި އާރްއޯ ޕްލާންޓަކާއި ސްޓޯރޭޖް ޓޭންކެއް ބެހެއްޓުން ހިމެނެއެވެ.