ފަރަންސޭސްވިލާތުގެ ދެކުނު އައްސޭރީގައި ހުންނަ އަވަށެއްގައި މަހުޖަނަކު އިމާރާތް ކޮށްފައިވާ 64 މިލިއަން ޑޮލަރުގެ ހަވޭލީއެއް ތަޅާލަން އެގައުމުގެ ކޯޓަކުން އަމުރު ކޮށްފިއެވެ.

ގަވައިދާ ހިލާފަށް އިމާރާތް ކޮށްފައިވާ ކަމަށް ބުނެ އިމާރާތް ތަޅާލަން ކޯޓުން ދީފައިވަނީ އަށާރަ މަސް ދުވަހުގެ މުހުލަތެކެވެ. އަދި ދެ ލައްކަ ޔޫރޯގެ ޖޫރިމަނާއެއް ދައްކަން ވެސް ގޭގެ ވެރިފަރާތަށް ވަނީ އަމުރު ކޮށްފައެވެ. ޕްރޮޕަޓީ ޑިވޮލޮޕަރެއް ކަމުގައިވާ ޕެޓްރިކް ޑައިޓަރގެ މައްޗަށް ސާބިތުވެފައިވަނީ ހުއްދަ ނުނަގައި އިމާރާތް ކުރުމުގެ ދައުވާއެކެވެ.

ޑައިޓަރ އިމާރާތްކުރަން ހުއްދަ ނަގަން ޖެހެނީ އެ ސަރަހައްދަކީ ރައްކާތެރިކޮށްފައިވާ ސަރަހައްދަކަށް ވުމުން ކަމަށް އެ ޕްރޮވިންސްގެ އެޓަރނީ ޖެނެރަލް ޕިއޭ-ޖޯން ގައުރީ ވަނީ ބުނެފައެވެ. ޑައިޓަރގެ އިިތުރުން އިމާރާތް އަޅަން މަސައްކަތް ކުރި ކުންފުނި ވެސް ވަނީ ހަމަ ދެ ލައްކަ ޔޫރޯއިން ޖޫރިމަނާ ކޮށްފައެވެ. އަދި އިމާރާތް ތަޅާނުލާ އިތުރުވާ ކޮންމެ ދުވަހަކަށް 500 ޔޫރޯގެ ޖޫރިމަނާއެއް އަންނާނެ ކަމަށް ވެސް ހުކުމުގައި ވަނީ ހިިމަނާފައެވެ.

ގައުރީ ބުނީ ބިން ގަތުމުގައި އެއްވެސް ގާނޫނާ ޙިލާފު އަމަލެއް ހިނގާފައި ނުވި ނަމަވެސް، އިމާރާތް ގަވައިދާ ހިލާފުވީ ނަގަން ޖެހޭ ހުއްދަތައް ނުނެގުމުން ކަމަށެވެ. އަދި ގޭގެ ވެރިފަރާތުން އަޑުގަދަކޮށް ބޭއްވުމާ ގުޅިގެން އަވަށްޓެރިންގެ ގިނަ އަދަދެއްގެ ޝަކުވާ ލިބިފައިވާ ކަމަށް ވެސް އޭނާ ވަނީ ބުނެފައެވެ. ޑައިޓަރއަށް ކޯޓުގެ ނިންމުން އިސްތިއުނާފު ކުރެވޭނީ މާޗް 30 ވަނަ ދުވަހުގެ ކުރިންނެވެ.

ސަތާރަ އޭކަރުގެ ބޮޑު ސަރަހައްދެއްގައި އަޅާފައިވާ އިމާރާތުގައި 18 ސުއީޓާއި، ދެ ހެލިކޮޕްޓަރު ޕެޑް ހިމެނޭއިރު އެ ގޭގައި ޕޫލްއަކާއި ފެންއަރުވާ ވަޑާންތައް ވެސް ހިމެނެއެވެ. ޑައިޓަރ މިތަނުގައި އިމާރާތް ކޮށްފައިވަނީ އެ ތަނުގައި ހުރި ކުޑަ ގެޔެއް ތަޅާލުމަށް ފަހުގައެވެ.