ގެއްލުވާލާފައިވާ ނޫސްވެރިޔާ އަހްމަދު ރިލްވާނާއި ރަހުމްކުޑަ ގޮތެއްގައި މަރާލާފައިވާ ބްލޮގަރު ޔާމިން ރަޝީދުގެ ހަނދާނުގައި އެ ދެ ފަރާތުގެ އާއިލާއިން ޖަމިއްޔާއެއް އުފައްދައިފިއެވެ.
ޔާމީންގެ 31 ވަނަ އުފަން ދުވަސް ފާހަގަކުރުމުގެ ގޮތުން ބޭއްވި ނޫސްވެރިންގެ ބައްދަލުވުމެއްގައި "ރިލްވާން އެންޑް ޔާމިން ފައުންޑޭޝަން" ގެ ނަމުގައި ޖަމިއްޔާއެއް އުފެއްދި ކަން އިއުލާން ކުރީ ޔާމިންގެ މަންމަ މަރިޔަމް ޝަފީގާއެވެ. ޝަފީގާ ބުނީ މި ޖަމިއްޔާ އުފެއްދުމުގެ މައިގަނޑު މަގުސަދަކީ ޔާމިން އާއި ރިލްވާނުގެ ޙިޔާލާއި، ރޫޙާއި، ހިތްވަރު އައުކުރުމަށް އަދި އެ މީހުން ވަކާލާތުކުރި ހައްގުތައް ކުރިއެރުވުން ކަމަށެވެ.
މި ޖަމިއްޔާއިން ޔާމިން އާއި ރިލްވާނު ކުރިއަރުވަން ވަކާލާތު ކުރި ދާއިރާތަކުން ތައުލީމާއި ތަމްރީން ބޭނުންވާ ފަރާތްތަކަށް އެ ފުރުސަތު ފަހިކޮށްދޭން މަސައްކަތް ކުރާނެ ކަމަށް ވެސް ޝަފީގާ ބުންޏެވެ.
ވަރަށް އަސަރުން ފުރިގެން ހުރެ ޔާމިންގެ މަންމަ ދެއްކި ވާހަކައިގައި އޭނާ ވަނީ ޔާމިން އާއި ރިލްވާނަށް އިންސާފު ހޯއްދަވައި ދެއްވަން މަސައްކަތް ކުރެއްވި ހުރިހާ ފަރާތްތަކަށް ވަރަށް ބޮޑަށް ޝުކުރު އަދާކޮށްފައެވެ. އަދި ދެ އާއިލާގެ ވެސް އެދުމަކީ މި ފަށާފައިވާ މަސައްކަތުގައި ވީހާ ވެސް ގިނަ ބަޔަކު ބައިވެރިވުން ކަމަށް ވެސް އާއިލާ އިން ބުންޏެވެ.
ބުދަ ދުވަހު ހަވީރު ބޭއްވި ނޫސްވެރިންގެ ބައްދަލުވުމުގައި ޔާމިން އާއި ރިލްވާނުގެ އާއިލާއިން ވަނީ މިހާތަނަށް ވެސް އެ ދެ މީހުންގެ މައްސަލައިގައި ވީނުވީއެއް ބުނެދެވިފައި ނުވާތީ ކަންބޮޑުވުން ފާޅުކޮށްފައެވެ. އަދި ސިޔާސީ ވެރިންނާއި ގޭންގުތަކުންނާއި ދައުލަތުގެ ކަމާބެހޭ މުއައްސަސާތަކުންނާއި ކޯޓުތަކުން ވެސް މިކަމުގެ ހަގީގަށް ވަންހަނާކުރަން މަސައްކަތް ކުރާ ކަމަށް ވެސް އެ ފަރާތްތަކުން ވަނީ ތުހުމަތުކޮށްފައެވެ.
މި ނޫސްވެރިންގެ ބައްދަލުވުމުގައި ޔާމިން ރަޝީދުގެ މަންމައާއި ދައްތަގެ އިތުރުން ރިލްވާންގެ މަންމައާއި ދައްތަ ވެސް ވަނީ ބައިވެރިވެފައެވެ.
ރިލްވާން ގެއްލުވާލިތާ މިއަދަށް 1700 ދުވަސްވެފައިވާ އިރު މިހާތަނަށް އޭނާ ގެއްލުވާލި މައްސަލައާ ގުޅިގެން ބަޔަކު ހައްޔަރު ކުރި ކަމުގައިވީ ނަމަވެސް އެ އެއްމެން ވެސް ވަނީ ދޫކޮށްލާފައެވެ. އޭގެ ފަހުން މިތަނުން އެއް ބަޔަކު ސީރިޔާއަށް ހަނގުރާމައަށް ގޮސްފައިވާ ކަމަށް ވެސް ފުލުހުން ވަނީ ބުނެފައެވެ. މީގެ އިތުރުން ޔާމިން މަރާލި މައްސަލައިގައި ފަސް މީހަކު ހައްޔަރުކޮށް ޝަރީއަތް ހިންގަން ފަށާފައިވީ ނަމަވެސް ޝަރީއަތްތައް ސިއްރުކޮށްގެން ކުރިޔަށް ގެންދާތީ އެ މައްސަލައާ ބެހޭ މައުލޫމާތު ލިބޭ ގޮތް ވަނީ ނުވެފައެވެ. އަދި މައްސަލަ އެކަށީގެންވާ ބާރު މިނެއްގައި ކުރިއަށް ނުދާކަން ފާހަގަކޮށްލެވެއެވެ.
