ދައުލަތުގެ ބެލުމުގެ ދަށުގައި ތިބޭ ކުދިންނަށް ދީނީ ޕްރޮޮގްރާމް ހިންގަން ފަށަނީ
10 އެޕްރީލު 2019 | ބުދަ 05:59ފިޔަވަތީގެ އިތުރުން ހިޔާވަހީ ގައި ދިރިއުޅޭ ކުދިންނަށް ނަމާދު ކުރާނެ ގޮތާއި ވުޝޫކުރާނެ ގޮތް ދަސްކޮށްދިނުމަށް ވަނީ ހަމަޖެހިފައި
އެއްބަސްވުމުގައި ސޮއިކުރުމުގެ ރަސްމިއްޔާތުގެ ތެރެއިން
ފިޔަވަތި އަދި ކުޑަކުދިންގެ ހިޔާގައި ދިރިއުޅޭ ކުދިންނަށް ގުރުއާން ކްލާސްތަކެއް ހިންގައި އެކުދިން ކީރިތި ގުރުއާނަށް އަހުލުވެރި ކުރުވުމަށާއި ދީނީ ހޭލުންތެރި ކުރުމުގެ ގޮތުން ޖެންޑާ މިނިސްޓްރީއާ އިސްލާމިކް މިނިސްޓްރީ އާއި ދެމެދު މެމޯރީ އޮފް އަންޑަސްޓޭންޑިން (އެމްއޯޔޫ) އެއްގައި ސޮއި ކޮށްފިއެވެ.
އިސްލާމީ މަރުކަޒުގައި ބޭއްވި ރަސްމިއްޔާތުގައި މި އެއްބަސްވުމުގައި އިސްލާމިކް މިނިސްޓްރީގެ ފަރާތުން ސޮއިކުރެއްވީ، މިނިސްޓަރ އޮފް އިސްލާމިކް އެފެއާޒް ޑރ. ޑޮކްޓަރ އަޙްމަދު ޒާހިރުއެވެ. އަދި ޖެންޑާ މިނިސްޓްރީގެ ފަރާތުން އެއްބަސްވުމުގައި ސޮއިކުރެއްވީ މިނިސްޓަރ އޮފް ޖެންޑަރ، ފެމިލީ އެންޑް ސޯޝަލް ސަރވިސަސް ޝިދާތާ ޝަރީފްއެވެ.
މީޑިއާ އަށް މައުލޫމާތު ދެއްވަމުން ޖެންޑާ މިނިސްޓަރު ވިދާޅުވި، މި އެއްބަސްވުމުގެ ދަށުން ހުޅުމާލޭގައި ހުންނަ ފިޔަވަތީ ގައި ތިބި 102 ކުދިންނަށާއި، ވިލިގިލީ ހިޔާގައި ތިބޭ 41 ކުއްޖަކަށް މި ޕްރޮގްރާމް ހިންގުމަށް ހަމަޖެހިފައިވާ ކަމަށެވެ. ރަމަޝާން މަހާއި ދިމާކޮށް މިފަދަ ޕްރޮގްރާމެއް ކުރިޔަށް ގެންދާތީވެ މިނިސްޓަރު ވަނީ އެކަމާއި އުފާފާޅުކުރައްވައިފައެވެ. އެމްއޯޔޫގެ ދަށުން ކުރިޔަށް އޮތްތާގައި މުހިއްމު ޕްރޮގްރާމްތަކެއް ހިންގިގެން ދާނެ ކަމަށް ޖެންޑާ މިނިސްޓަރު ވިދާޅުވިއެވެ.
ޖެންޑާ މިނިސްޓަރު ޝިދާތާ މީޑިއާއަށް މައުލޫމާތު ދެއްވަނީ، އަރިހުގައި އިސްލާމިކް މިނިސްޓަރު . ފޮޓޯ: އިސްލާމިކް މިނިސްޓްރީ
އިސްލާމިކް މިނިސްޓްރީން މީގެ ކުރިން ވެސް ހާއްސަ އެހީއަށް ބޭނުންވާ ކުދިންނަށް އެހީވެދޭ ކަން ފާހަގަކުރައްވަމުން ޝިދާތާ ވަނީ އިސްލާމިކް މިނިސްޓްރީ އަށް ޝުކުރު އަދާކޮށްފައެވެ.
އެ ރަސްމިއްޔާތުގައި ވާހަކަފުޅު ދައްކަވަމުން އިސްލާމިކް މިނިސްޓަރު ވިދާޅުވީ، މިފަދަ ޕްރޮގްރާމްގެ ދަށުން ފިޔަވަތީގެ އިތުރުން ހިޔާވަހީގައި ދިރިއުޅޭ ކުދިންނަށް ނަމާދު ކުރާނެ ގޮތާއި، ވުޝޫކުރާނެ ގޮތުގެ އިތުރުން ދީނީ ބައެއް މައުޝޫތަކާއި ބެހޭ ގޮތުން މައުލޫމާތު ދިނުމަށް ހަމަޖެހިފައިވާ ކަމަށެވެ.
''މީގެ އެންމެ ބޮޑު މަގްސަދަކީ، މި ގޮތަށް ހާއްސަ އެހީއަށް ބޭނުންވާ ކުދިންނަށް ދީނީ ހޭލުންތެރިކަން އިތުރު ކުރުމާއި ކީރިތި ގުރުއާން ކިޔެވުމުގެ ފުރުސަތުތައް އެކުދިންނަށް ހޯދައިދިނުން. އެހެންވީމަ މި މަސައްކަތް އަޅުގަނޑުމެން މި ކުރަނީ ޖެންޑާރ މިނިސްޓްރީއާ ވަރަށް ބޮޑަށް ގުޅިގެން އެބޭފުޅުން އެއްބާރުލުމާއި އެކީގައި. އެބޭފުޅުންގެ ( ޖެންޑާރ މިނިސްޓްރީ)ގެ ސަބަބުން ފުރުސަތު މި ލިބެނީ.'' މިނިސްޓަރު ވިދާޅުވިއެވެ.
ހާއްސަ އެހީއަށް ބޭނުންވާ ކުދިން ދީނަށް އަހުލުވެރިކުރުމުގެ ގޮތުން އެމްއޯޔޫގައި ސޮއިކޮށްފައިވާއިރު، އިވުމުން މަހުރޫމްވެފައިވާ ފަރާތްތަތަކަށް ހުކުރު ހުތުބާ، އިޝާރާތުން ތަރުޖަމާ ކުރެވޭނެ ގޮތް ވަރަށް އަވަހަށް ހަމަޖެހިގެންދާނެ ކަމަށް މިނިސްޓަރު ވަނީ ދާދިފަހުން ވިދާޅުވެފައެވެ.
ސައިން ލެންގުއޭޖް ބޭނުންކޮށްގެން ހާއްސަ އެހީއަށް ބޭނުންވާ ފަރާތްތަކަށް އެހެން މީހުންނާއި ތަފާތު ކަމެއް ނެތި މިހާރު ވެސް ކިޔަވައިދެމުން އަންނަ ކަމަށާއި، އެފަދަ ފަރާތްތަކަށް އެއްވެސް ތަފާތު ކުރުމެއް ނެތި ތައުލީމް ހާސިލްކޮށް އުގެނުމުގެ ފުރުސަތު ތަނަވަސް ކޮށްދިނުމަކީ މި ސަރުކާރުން ވަރަށް ބޮޑު އަހައްމީޔަތު ކަމެއް ދީގެން ކުރާ ކަމެއް ކަމަށް ވެސް މިނިސްޓަރު ވިދާޅުވިއެވެ.
