ފެލިދުއަށް ގެންދިޔަ ސަބްމެރިނެއްގައި މަސްތުވާތަކެތި
އެ މައްސަލާގައި ހައްޔަރު ކޮށްފައި ވަނީ 35 އަހަރުގެ ފިރިހެނެއް
ސަބްމެރިނެއްގެ ތެރޭގައި
ވ. ފެލިދޫ ޕޮލިސް ސްޓޭޝަންގައި މަސައްކަތް ކުރާ ފުލުހުން ގުޅިގެން ހިންގި އޮޕަރޭޝަނެއްގައި، މަސްތުވާތަކެއްޗާއެކު ފެލިދޫން މީހަކު ހައްޔަރުކޮށްފިއެވެ. މާލެއިން ފުރައިގެން ފެލިދުއަށް ދަތުރު ކުރަމުން ދިޔަ ފެރީ ލޯންޗަކުން މީހަކު ފެލިދުއަށް މަސްތުވާތަކެތި އެތެރެކުރަން އުޅޭކަމަށް ފުލުހުންގެ އިންޓެލިޖެންސަށް ލިބުނު މައުލޫމާތަކާއި ގުޅިގެން ހިންގި މި އޮޕަރޭޝަންގައި އެރަށުގެ ބަނދަރު ސަރަޙައްދުން މީހަކު ބަލައި ފާސްކުރިއިރު އޭނާގެ އަތުގައި އޮތް ކޮތަޅެއްގެ ތެރޭގައި އޮތް ސަބްމެރިނެއެއްގެ ތެރެއިން މަސްތުވާތަކެތި ކަމަށް ޝައްކު ކުރެވޭ އެއްޗެއް ހުރި ފިލްމް ހުސްކުރި ދަޅެއް ވަނީ ފެނިފައަެވެ.
އެ މައްސަލާގައި ހައްޔަރު ކޮށްފައި ވަނީ 35 އަހަރުގެ ދިވެހި ފިރިހެނެއް ކަމަށާއި ހާދިސާގެ ރިޕޯޓް ފުލުހުންނަށް ލިބިފައި ވަނީ ހޯމަ ދުވަހުގެ ހަވީރު 5:20 އެހާކަންހާއިރު ކަމަށް ފުލުހުން ބުނެއެވެ. އެ މައްސަލަ ފެލިދޫ ޕޮލިސް ސްޓޭޝަނުން އިތުރަށް ތަހުގީގު ކުރަމުން ދާ ކަމަށްވެސް ފުލުހުން ބުނެއެވެ.
މީގެ އިތުރުން ވެސް މިދިޔަ ހޯމަ ދުވަހު މާލޭގެ މަގުމަތިން ހިނގާފައި ދަނިކޮށް ހުއްޓުވި މީހެއްގެ އަތުން މަސްތުވާތަކެތި ހުރި 727 ރަބަރު ޕެކެޓް ފެނުނު މައްސަލާގައި އުމުރުން 40 އަހަރުގެ މީހަކު ހައްޔަރު ކޮށްފައިވާއިރު މިމަހުގެ އެއް ވަނަ ދުވަހު އއ. މަތިވެރި ގެސްޓުހައުސަކުން ބަނގުރާ ކަމަށް ޝައްކުކުރެވޭ އެއްޗެއް ހުސްކޮށްފައި ހުރި ގިނަ އަދަދެއްގެ ފުޅި ފެނުނު މައްސަލާގައި ދެ މީހަކު ހައްޔަރު ކޮށްފައިވެއެވެ.
މަސްތުވާތަކެއްޗާ ދެކޮޅަށް ފުލުހުން ކުރަމުންދާ މަސައްކަތުގެ ތެރެއިން ހުސްވި މާރިޗު މަހުގެ 29 ވަނަ ދުވަހު ވެސް ލ. ގަން ޕޮލިސްސްޓޭޝަނުން ހިންގި އޮޕަރޭޝަނެއްގައި ގިނަ އަދަދެއްގެ މަސްތުވާ ތަކެއްޗާއެކު އެ ތަކެތީގެ ވިޔަފާރި ފުޅާ ދާއިރާއެއްގައި ކުރާ 38 އަހަރުގެ ދިވެހި ފިރިހެނަކު ގަމުން ހައްޔަރުކޮށްފައި ވާކަން ފާހަގަ ކޮށްލެވެއެވެ.
