ބިން މިލްކުކުރެވޭ ގޮތަށް ގާނޫނު އަސާސީއަށް ގެނައި ބަދަލު ބާތިލް ކުރަން ކޮމިޓީން ނިންމައި، މަޖިލީހުގެ ތަޅުމަށް

ބޭރުގެ މީހުންނަށް ބިން މިލްކުކުރެވޭ ގޮތަށް ގާނޫނު އަސާސީއަށް ގެނައި ބަދަލު ބާތިލް ކުރަން ގައުމީ ސަލާމަތުގެ ކޮމިޓީން ނިންމައި، އެކަން 15 ވަނަ ދުވަހު އޮންނަ ރައްޔިތުންގެ މަޖިލީހުގެ ޖަލްސާއަށް އެޖެންޑާ ކޮށްފިއެވެ.

ބޭރު މީހުންނަށް ބިން ގަނެވޭ ގޮތަށް ގާނޫނު އަސާސީއަށް އިސްލާހު ގެނައީ ރައީސް އަބްދުﷲ ޔާމީންގެ ސަރުކާރުގައި 22 ޖުލައި 2015 ގައެވެ.

ގާނޫނު އަސާސީއަށް ޕީޕީއެމްއިން ގެނެސްފައިވާ އިސްލާހު އުވާލަން ، ރައީސް ޔާމީންގެ ސަރުކާރު ނިމުމާއެކު ހުށަހެޅުއްވީ ޕީޕީއެމްއަށް ނިސްބަތްވެވަޑައިގަންނަވާ މާފަންނު ދެކުނު ދާއިރާގެ މެމްބަރު އަބްދުﷲ ރިފާއު (ބޮޗޭ)އެވެ.

ރިޔާސީ ކެމްޕޭން ތެރޭގައި ރައީސް އިބްރާހިމް މުހައްމަދު ސޯލިހު ވިދާޅުވެފައިވަނީ، ބިދޭސީންނަށް ރާއްޖޭގެ ބިން މިލްކުކުރެވޭ އިސްލާހު ބާތިލް ކުރައްވާނެ ކަމަށެވެ.

ގާނޫނުއަސާސީގެ 251 ވަނަ މާއްދާއަށް ރައީސް ޔާމީންގެ ސަރުކާރުގެ ގެނައި ބަދަލުގައި ބުނެފައި އޮންނަނީ ރާއްޖޭގައި ބިން ހިއްކައިގެން އެއް ބިލިއަން ޑޮލަރު އިންވެސްޓް ކުރާ ފަރާތްތަކަށް ބިމުން ބައެއް މިލްކު ކުރެވޭނެ ކަމަށެވެ.ގާނޫނުއަސާސީގެ 251 ވަނަ މާއްދާގައި ކުރިން ބުނެފައި އޮންނަނީ "ދިވެހިރާއްޖޭގެ ސަރަހައްދުގެ އެއްވެސް ބައެއް ރާއްޖެއިން ބޭރުގެ އެއްވެސް ފަރާތަކަށް މިލްކުކޮށެއް ނުދެވޭނެ "އެވެ.

19 ވަނަ ރައްޔިތުންގެ މަޖިލިސް އަންނަ މަހު ފަހު ކޮޅު ފެށޭއިރު، އެމްޑީޕީ ވަނީ 65 ގޮނޑިއާއި އެކު މަޖިލީހުގެ ސުޕަރ މެޖޯރިޓީ ނަގާފައެވެ. މިއީ ރާއްޖޭގެ ބަރުލަމާނީ ހަޔާތުގައި އެއް ޕާޓީއަކަށް އެންމެ ގިނަ ގޮނޑި ލިބުނު ފަހަރެވެ.