ސަރުކާރުން ހުށަހަޅާ ކޮންމެ ކަމަކަށް ވޯޓް ނުދޭނެ ކަމަށާއި ވޯޓްދޭއިރު ރައްޔިތުންނަށް އެކަމުން ފައިދާ ކުރޭތޯ ބައްލަވާނެ ކަމުގައި ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ ގޮނޑި ކާމިޔާބުކުރެއްވި މީކާއިލް ނަސީމް ވިދާޅުވެއްޖެއެވެ.
ހޯމަ ދުވަހުގެ ރޭ ރާއްޖެޓީވީގެ ފަލަސުރުހީ ޕްރޮގްރާމްގައި ވާހަކަ ދައްކަވަމުން މީކާއިލް ވިދާޅުވީ ސަރުކާރުން ހުށަހަޅާ ކަންކަން އިސްލާހު ކުރަން ޖެހޭނަމަ އެކަމަށް ފާޑު ކިޔުއްވާނެ ކަމަށާއި ބިލަކަށް ވޯޓްދޭއިރު އެ ވޯޓް ދޭނީ ރައްޔިތުންނާއި މަޝްވަރާ ކުރުމަށް ފަހުގައި ކަމަށް ވިދާޅުވިއެވެ.
”ސަރުކާރުން ހުށަހަޅާ ކޮންމެ ކަމަކަށް ރަބަރ ސްޓޭމްޕް ޖަހާ މަޖިލީހެއް ނޫން މި އިންތިހާބުވެގެން ދިޔައީ. ހަމަގައިމު ވެސް އަޅުގަނޑު ވޯޓް ދޭނީ އެކަންކަމަކީ ރައްޔިތުންނަށް ފައިދާ ލިބޭ ކަންކަމަށްވާނަމަ. އެހެން ނަމަވެސް ސަރުކާރުން ހުށަހަޅާ ކަންކަން އިސްލާހު ކުރަން ޖެހޭ ކަމަށް ފެންނަކަމުގައިވާނަމަ އެއަށް އަޅުގަނޑު ފާޑު ކިޔާނަން އަދި އަޅުގަނޑާއެކު ފާޑުކިޔާނެ އެހެން މެމްބަރުން އިންތިހާބުވެގެން ދިޔަ ކަމަށް ޤަބޫލުކުރަން" މީކާއިލް ވިދާޅުވިއެވެ.
ރައްޔިތުންގެ މަޖިލީހުގެ ޖަލްސާތަކަށް މެމްބަރުން ހާޒިރުނުވާއިރު އެ މެމްބަރުން ޒިންމާދާރު ކުރެވޭނެ ނިޒާމެއް ރައްޔިތުންގެ މަޖިލީހުގެ ތެރެއިން އޮންނަން ޖެހޭނެ ކަމަށާއި ރައްޔިތުންގެ މަޖިލީހުގެ ތެރެއިން އެންމެ ބޮޑު އިސްކަމެއްދޭނީ ފަނޑިޔާރުގެ އިސްލާހު ކުރުމަށް ކަމަށް މީކާއިލް ވިދާޅުވިއެވެ.
މީކާއިލް އިތުރަށް ވިދާޅުވީ އެމްޑީޕީގެ ފަރާތުން މަޖިލީހަށް ހުށަހަޅާނެ ކަންކަމުގެ ތެރޭގައި ތިން މަހުން އެއް މަހު ދާއިރާގެ ރައްޔިތުންނާއި ބައްދަލުކުރުން ލާޒިމްކުރުމާއި ރައްޔިތުންގެ މަޖިލީހުގެ މެމްބަރުންގެ މުސާރަ ކަނޑައެޅުމަށް މިނިވަން މުއައްސަސާއަށް ބާރުވެރިކަން ދިނުމާއި މެމްބަރުންގެ ވަކި ވަކި މައުލޫމާތު ވެބް ސައިޓްތައް މެދުވެރިކޮށް ފެނުން ވެސް ލާޒިމް ކުރާނެ ކަމަށެވެ.
އެމްޑީޕީ ފިޔަވާ ސިޔާސަތެއް ވިއްކަން ނިކުތް ބައެއް ނެތްކަން ފާހަގަކުރައްވާ މީކާއިލް ވިދާޅުވީ އެމްޑީޕީން ދައްކަމުން ދިޔައީ ރައްޔިތުންނަށް އެންމެ އަސާސީ ހިދުމަތްތައް ފޯރު ކޮށްދޭންޖެހޭ ވާހަކަތައް ކަމަށާއި އެކަންތައްތައް ރައްޔިތުން ބަލައިގެންފައިވާ ކަމަށެވެ.
ރައްޔިތުންގެ މަޖިލީހުގެ ރައީސް ކަމަށް ނުވަތަ ނައިބު ރައީސް ކަމަށް އަންހެން ބޭފުޅަކު ގެނައުމަށް މީކާއިލް ތާއީދު ކުރައްވާ ކަމަށް ވަނީ ވިދާޅުވެފައެވެ.
