އިސްލާހީ ކޮންމެ ސިޔާސަތަކަށް އެއްބާރުލުން ދޭނަން: އަލީ ހުސައިން
8 އެޕްރީލު 2019 | ހޯމަ 04:21ކޯލިޝަން މެނިފެސްޓޯގައި ހުރި ކަންތައްތައް ތަންފީޒު ކުރުމަށް ރައްޔިތުން ބޭނުންވާ ކަަަމަށް ވިދާޅުވި
އަލީ ހުސެއިން ޕީއެސްއެމްގެ މަޖިލީސް ބަހުސްގައި
އަލަށް އިންތިހާބުވާ މަޖިލީހަށް އިސްލާހަށް ހުށައެޅޭ ކޮންމެ ސިޔާސަތަކަށް ތާއިދުކޮށް އެއްބާރުލުން ދެއްވާނެ ކަމަށް ކެންދޫ ދާއިރާގެ މެމްބަރު އަލީ ހުސެއިން ވިދާޅުވެއްޖެއެވެ.
ދެ ވަނަ ދައުރަކަށް ކެންދޫ ދާއިރާގެ ގޮނޑި ކާމިޔާބު ކުރެއްވި އަލީ ހުސައިން ވިދާޅުވީ ކޯލިޝަން މެނިފެސްޓޯގައި ހުރި ކަންތައްތައް ތަންފީޒުކުރުމަށް ރައްޔިތުން ބޭނުންވާ ކަމަށެވެ. ކެންދޫ ދާއިރާގެ ރައްޔިތުން އޭނާ އަށް ވޯޓު ދިނީ، ރާއްޖޭގައި އިސްލާހު ކުރަން ޖެހޭ ކަންތައްތަކެއް ހުރިކަން ފާހަގަވެ އެކަންތައްތައް ތަންފީޒުވެގެން ދިޔުމަށް ބޭނުންވާތީ ކަމަށް އަލީ ވިދާޅުވިއެވެ.
އެމްޑީޕީން މަޖިލީހަށް ހުށަހަޅަން ހަމަޖެހިފައިވާ ''އެޖެންޑާ 19'' ގައި ހުރި ކަންތައްތަކަށް މަޖިލީހުގެ ތެރެއިން އެއްބާރުލުން ދެއްވާނެތޯ ސުވާލުކުރުމުން އަލީ ވިދާޅުވީ،"ރަނގަޅު ކަމެއް ވެއްޖެއްޔާ ފުރިހަމައަށް ތާއިދު ކުރާނެ" ކަމަށެވެ.
''ސަރުކާރުން އިސްލާހި ސިޔާސަތެއްގެ ގޮތުގައި ކޮންމެ ކަމެއް ހުށައެޅި ކަމަށްވިޔަސް އެކަމަކީ ރައްޔިތުން ލާބައާއި މަންފައާ އޭގައި ހިމެނޭ ކަމެއް ކަމަށްވާނަމަ އަދި ގައުމުގެ ހައްގުގައި ހިންގޭ ކަމަކަށް ވާނަމަ ނުވަތަ ގައުމުގައި ހިމެނޭ ހުރިހާ އަފްރާދުންގެ މަސްލަހަތު އޭގާއި ހިމަނައިގެން އެންމެހާ އަފުރާދުންނަށް އޭގެ ސަބަބުން ފައިދާ ކުރާނެ ކަމަށްކަށް ވާނަމަ އަޅުގަނޑު އެ ބިލަކަށް ވޯޓު ދޭނަން،'' އޭނާ ވިދާޅުވިއެވެ.
ރައްޔިތުންގެ މަޖިލީހުގައި ކުރަން ޖެހޭ އެންމެ މުހިއްމުކަމަކީ ސަރުކާރުން ހުށައަޅާ ސިޔާސަތުތަކަށް ގާނޫނީ ބާރު ދިނުން ކަމަށް ފާހަގަ ކުރައްވަމުން އަލީ ވިދާޅުވީ ސަރުކާރު ޖަވާބުދާރީ ކުރުވުމަކީ މަޖިލީހުގެ މެމްބަރުން ކުރައްވަން ޖެހޭ ވަރަށް މުހިއްމު ކަމެއް ކަމަށެވެ. އެ މެމްބަރަކީ ސަރުކާރު ހިންގާ ޕާޓީއެއްގެ މެމްބަރަކަށް ވިޔަސް އެއީ ކޮންމެ މެމްބަރެއްގެ ޒިންމާ އެއް ކަމަށް އޭނާ ވިދާޅުވި އެވެ.
ސަރުކާރުންވެސް މަޖިލީހަށް ހުށައަޅާ ސިޔާސަތުތަކަކީ މުސްތަގުބަލްގައި ގައުމަށް ގެއްލުމެއް ލިބިދާނެ ކަމެއް ހިމެނޭ ކަމެއްނަމަ އެކަންތައް ތަކުގައި މަޖިލީހުގެ މެމްބަރުން ސަރުކާރު ޖަވާބުދާރީކުރުވަން ޖެހޭނެ ކަން އޭނާ ފާހަގަ ކުރެއްވިއެވެ.
