ހޮނިހިރު ދުވަހު ބޭއްވި ރައްޔިތުން މަޖިލީހުގެ އިންތިހާބާއި ގުޅިގެން ފަސް މައްސަލައެއް ހުށައެޅި އެ މައްސަލަތައް ހައްލު ކޮށްފައިވާނެ ކަމަށް ހިއުމަން ރައިޓްސް ކޮމިޝަން އޮފް މޯލްޑިވސް (އެޗްއާރްސީއެމް) އިން ބުނެފިއެވެ.

 އެޗްއާރްސީއެމް އިން ހޮނިހިރު ދުވަހު ނެރުނު ބަޔާނެއްގައި ބުނީ ގާނޫނު އަސާސީއާ އިންތިހާބާ ގުޅޭ ގާނޫނުތަކާއި، ރާއްޖެ ބައިވެރިވެފައިވާ ބައިނަލްއަގްވާމީ މުއާހަދާ ތަކުގައި ބަޔާން ކޮށްފައިވާ ފަދައިން މިނިވަން އިންތިހާބެއް ކަން ކަށަވަރު ކުރުމަށްޓަކައި ވޯޓުލުމުގެ ކަންކަން ކުރިޔަށް ދިޔައިރު މާލެ ސީޓީއާއި އަތޮޅު ތެރޭގައި ބެހެއްޓިފައިވާ 20 ފޮއްޓެއްގައި ކަންކަން ބެލުމަށް އެ ކޮމިޝަނުން ހަރަކާތްތެރިވެފައިވާ ކަމަށެވެ.  

ރާއްޖޭގެ އެކި ސަރަހައްދުތަކުގައި ވޯޓުލުމުގެ ކަންކަން ކުރިއަށް ދިޔަގޮތް މީޑިއާގެ ވަސީލަތްތައް މެދުވެރިކޮށް މޮނީޓަރ ކޮށްފައިވާނެ ކަމަށް އެޗްއާރްސީއެމް އިން ބުންޏެވެ.

 އެ މަސައްކަތުގެ ތެރޭގައި، ވޯޓުލުމުގެ ހައްގާއި ގުޅޭ ގޮތުން ކޮމިޝަނަށް ހުށަހެޅުން ޝަކުވާތަކާއި، ކޮމިޝަނަށް ފާހަގަކުރެވުނު ކަންކަމާއި ގުޅުން ހުރި މުއައްސަސާތަކާ ގުޅިގެން ހައްލު ހޯދުމަށް މަސައްކަތް ކޮށްފައިވާނެ ކަމަށް އެޗްއާރްސީއެމް އިން ވަނީ ބުނެފައެވެ.

އެގޮތުން އިންތިހާބާ ގުޅިގެން ފަސް މައްސަލައެއް ހުށައެޅި ހުރިހާ މައްސަލަތަކަށް ހައްލު ހޯދައި ދީފައިވާނެ ކަމަށް އެޗްއާރްސީއެމް އިން ބުންޏެވެ. އެހެން ނަމަވެސް އެއީ ކޮންމައްސަލަތަކެއް ކަމެއް އެޗްއާރްސީއެމް އިން ހާމަކޮށްފައެއް ނުވެއެވެ.

އެޗްއާރްސީއެމް އިން ބުނީ، މި ފަހަރުގެ އިންތިހާބުގެ ވޯޓުލުމުގެ ކަންކަން ކުރިއަށް ގޮސްފައިވަނީ އަމާން ކަމާއި އެކު ކަމަށާއި، ގިނަ ފޮށިތަކުގައި ގަޑިއަށް ވޯޓުލާން ފަށައި، ހަމަޖެހިފައިވާ ގަޑިއަށް ކިޔޫ ބަންދުކޮށް، ވޯޓު ގުނަން ފަށާފައިވާ ކަމަށް ފާހަގަކުރެވިފައިވާ ކަމަށެވެ.

 ގިނަ ވަގުތު ކިޔޫގައި ތިބެން ނުޖެހޭ ގޮތަށް ވޯޓުލުމުގެ އިންތިޒާމް ހަމަޖައްސާފައިވާ ކަމަށާއި، އިންތިހާބު ކުރިޔަށް ދިޔަ ވަގުތު ދިމާވީ މައްސަލަތަކަށް އަވަސް ހައްލެއް އިލެކްޝަން ކޮމިޝަނުން ހޯދާފައިވާކަން އެޗްއާރްސީއެމް އިން ވަނީ ފާހަގަކޮށްފައެވެ.

 އިންތިހާބާ ގުޅޭ ގޮތުން ރަނގަޅުކުރުމަށް ފާހަގަކުރެވުނު ކަންކަމަށް ބިނާކޮށް، ހުށައަޅާ ހުށައެޅުން ތަކާއެކު ތައްޔާރުކުރާ ރިޕޯޓް އިލެކްޝަން ކޮމިޝަނާއި ކަމާ ގުޅުން ހުރި އިދާރާ ތަކާއި ހިއްސާކުރެވޭނެ ކަމަށް ވެސް އެޗްއާރްސީއެމްއިން ބުންޏެވެ.

 އެޗްއާރްސީއެމް އިން ބުނީ، އިންތިހާބުގެ އެންމެހާ ކަންކަން އަމާން ކަމާއިއެކު ކުރިޔަށް ގެންދެވިފައިވާނީ އީސީއާ، ފުލުހުންނާއި، ސިޔާސީ ޕާޓީ އަދި އާންމު ރައްޔިތުންގެ އެހީތެރިކަމާއި އެއްބާރުލުމާއި އެކީގައި ކަން އެ ކޮމިޝަނުން ފާހަގަކުރެވިފައިވާ ކަމަށެވެ.

އިންތިހާބުގެ ނަތީޖާއަށް އިހްތިރާމްކޮށް ގައުމުގެ ސުލްހަ މަސްލަސް ކަމަށް އިސްކަން ދިނުމަށް އެޗްއާރްސީއެމް އިން ވަނީ ހުރިހާ ރައްޔިތުންނަށް އިލްތިމާސްކޮށްފައެވެ.