ކުރެންދޫއަށް ނަގޫ ރޯޅިއެއް އަރައިފި
ކުރެންދޫއަށް ނަގޫ ރޯޅި އެރީ ރޭ ދަންވަރު 12.30 ހާއިރު
ނަގޫ ރޯޅި އެރީ ރޭ ދަންވަރު
ޅ.ކުރެންދޫއަށް ނަގޫ ރޯޅި އެއް އަރައިފިއެވެ. ޅ. ކުރެންދޫ ކައުންސިލްގެ ރައީސް އިސްމާއިލް މަދީހް ވިދާޅުވީ ކުރެންދޫއަށް ނަގޫ ރޯޅި އެރީ ރޭ ދަންވަރު 12.30 ހާއިރު ކަމަށެވެ. މަދީހް ވިދާޅުވީ މި ހާދިސާގެ ސަބަބުން ކައުންސިލް އިދާރާގެ ކައިރީގައި ޖަހާފައިވާ އެންޓަނާއެއް އިދާރާގެ ފުރާޅު މައްޗަށް ވެއްޓި، ފުރާޅުގެ ބޮޑު ބައެއް ހަލާކުވެ އިދާރާގެ ސީލިން ފޫގޮސްފައިވާ ކަމަށެވެ. ކައުންސިލް އިދާރާގައި ފެން ބޮޑުވުމުގެ ސަބަބުން އިދާރާގެ ފަރުނީޗަރަށް ކޮންމެވެސް މިންވަރަކަށް ގެއްލުން ލިބިފައިވާ ކަމަށާއ، ނަމަވެސް އެއްވެސް އިލެކްޓްރޯނިކް ސާމާނެއް ހަލާކުވެފައި ނުވާ ކަމަށް މަދީހް ވިދާޅުވިއެވެ.
އެންޓަނާ ވެއްޓުމުގެ ސަބަބުން ކޭބަލް ޓީވީގެ ހިދްމަތް މެދުކެނޑިފައި
މަދީހް ވިދާޅުވީ ވެއްޓުނު އެންޓަނާ އަކީ ކޭބަލްޓީވީއާއި އިންޓަނެޓުގެ ހިދުމަތް ކުރެންދޫގައި ދިނުމަށް "ސެޓްލިކް" ކިޔާ ފަރާތަކުން ޖަހާފައިވާ އެންޓަނާއެއް ކަމަށާއި އެންޓަނާ ވެއްޓުމުގެ ސަބަބުން އިންޓަނެޓާއި ކޭބަލް ޓީވީގެ ހިދުމަތް ކުރެންދޫއަށް މިހާރު ލިބެމުން ނުދާ ކަމަށެވެ.
ދެ އޮނޑި ހަރުގެއަކަށް ވަނީ ގެއްލުން ލިބިފައި
ނަގޫރޯޅީގައި އެރަށުގެ ދެ އޮނޑިހަރުގެއަކަށް ގެއްލުން ލިބިފައިވާ ކަމަށާއި، އޮނޑިހަރުގެތަކުގެ ފުރާޅު އެއްލާލާފައިވަނީ ޖެހިގެން ހުރި ގަބުރުސްތާނުގެ ތެރެއަށް ކަމަށް މަދީހް ވިދާޅުވިއެވެ.
