ކުޑަ ކުއްޖަކު ސައިކަލް ވަށިގަނޑަށް ލައިގެން ދުއްވީ ފުލުހެއް، ފިޔަވަޅު އަޅާނަން: ފުލުހުން
ފުލުހުންގެ ޕްރޮފެޝަނަލް ސްޓޭންޑަޑްސް ކޮމާންޑުން މައްސަލަ ތަހްގީގު ކުރަމުންދާ ކަމަށް ފުލުހުން ބުނި
ސައިކަލް ވަށިގަނޑަށް ކުއްޖަކު ލައިގެން ދުއްވަނީ
ކުޑަ ކުއްޖަކު ސައިކަލް ވަށިގަނޑަށް ލައިގެން ދުއްވީ ފުލުހެއް ކަމަށާއި، އެ ފުލުސް މީހާއާ މެދު ފިޔަވަޅު އަޅާނެ ކަމަށް މޯލްޑިވިސް ޕޮލިސް ސަރވިސް އިން ބުނެފިއެވެ.
ސައިކަލެއްގެ ވަށިގަނޑަށް ކުޑަކުއްޖަކު ލައިގެން މާލެ ސިޓީ، ރިންގްރޯޑްގައި ސައިލެއް ދުއްވި ވީޑިއޯއެއް އާންމުވެ، ގިނަ ބައެއްގެ ފާޑުކިޔުން ވަނީ އަމާޒުވެފައެވެ.
އަންގާރަ ދުވަހުގެ ރޭ ސޯޝަލް މީޑިއާއަށް މީހަކު ލާފައިވާ އެ ވީޑިއޯގައި ފެންނަނީ ހުދުކުލައިގެ ވޭވް ސައިކަލެއްގެ ވަށިގަނޑަށް ކުޑަ ކުއްޖަކު ލައިގެން ފިރިހެނަކު ސައިކަލް ދުއްވާ މަންޒަރެވެ. ތާރުއަޅައިގެން ހަދާފައިވާ މަގުގެ ބަންޕަރު މަތިން ސައިކަލު ދުއްވާފައިދާއިރު، ވަށިގަނޑަށް ލާފައިވާ ކުއްޖާ ސައިކަލުން ނުވެއްޓި އިނނީ ކިރިޔާއެވެ.
ދައުރުވަމުންދާ ވީޑިއޯއާ ގުޅޭ ގޮތުން ބުދަ ދުވަހު ފުލުން އާއްމު ކުރި ބަޔާނުގައި ބުނީ، އެފަދަ މައްސަލައެއް ލިބި ތަހްގީގު ކުރަމުންދާ ކަމަށެވެ. އަދި މި މައްސަލާގައި ތުހުމަތު ކުރެވޭ ފަރާތަކީ ފުލުހެއް ކަމުން، ފުލުހުންގެ ޕްރޮފެޝަނަލް ސްޓޭންޑަޑްސް ކޮމާންޑުން މައްސަލަ ތަހްގީގު ކުރަމުންދާ ކަމަށާއި، އޭނާގެ ލައިސެންސް ހިފެހެއްޓުމަށް ޓްރެފިކް ޕޮލިހުންނާ ގުޅިގެން މަސައްކަތް ކުރަމުންދާ ކަމަށް ފުލުހުން ބުންޏެވެ.
ވަށިގަނޑަށް ލީ ކުޑަކުއްޖާގެ ފުރާނައަށް ނުރައްކާވާ ގޮތަށް އަމަލު ކުރި މައްސަލަ ކުޑަ ކުދިންގެ ހައްގުތައް ރައްކާތެރި ކުރާ ޗައިލްޑް ޕްރޮޓެކްޝަން ޑިޕާޓްމެންޓުން ވެސް ބަލަމުންދާ ކަމަށް ފުލުހުން ބުންޏެވެ.
ފުލުހުން ބުނީ، ކުޑަކުދިންނަށް އަދި މީހެއްގެ ފުރާނަ އަށް ނުރައްކާވާ ގޮތަށް ވެހިކަލް ދުއްވުން ކުށްވެރި ކުރާ ކަމަށާއި، އެފަދަ ފަރާތްތަކާ މެދު ފިޔަވަޅު އަޅާނެ ކަމަށެވެ.
މަގުމަތީގެ ސަލާމަތާއި ރައްކާތެރިކަމަށް ހެދިފައިވާ ގަވާއިދުތަކާ އުސޫލުތަކަށް ހުރިހާ ފަރާތްތަކުން ވެސް އިހްތިރާމް ކުރުމަށް ފުލުހުން ވަނީ އިލްތިމާސް ކޮށްފައެވެ.
އެއްގަމު ދަތުރުފަތުރުގެ ޤާނޫނު ބުނާ ގޮތުން އަމިއްލަ އަށް ސައިކަލްގައި ނީނދެވޭވަރުގެ ކުޑަ ކުދިން އަރުވައިގެން ސައިކަލް ދުއްވަން ޖެހޭނީ ބެލްޓެއް އަޅައިގެންނެވެ.
މީގެ ދުވަސްކޮޅެއް ކުރިން ވަނީ ބޮޑު މީހަކު ފަހަތުގައި އިނދެ، 10 ވަރަކަށް އަހަރުގެ ކުޑަކުއްޖަކު ސިނަމާލެ ބްރިޖް މަތީގައި ސައިކަލް ދުއްވާ ވީޑިއޯއއް ވެސް އާންމުވެފައެވެ. މާލޭގައި ވެހިކަލް ދުއްވުމުގައި ޓްރެފިކް ގާވާއިދުތަކާ ޚިލާފްވުން އާންމުވެފައިވައިރު، އެކްސިޑެންޓްތައް ހިނގުން ވެސް ވަނީ ވަރަށް ބޮޑަށް އިތުރުވެފައެވެ.
ފުލުހުން ތަފާސްހިސާބުތަކުން ދައްކާ ގޮތުން މި އަހަރުގެ ފުރަތަމަ ހަތަރު މަސް ދުވަހުގެ ތެރޭގައި 627 އެކްސިޑެންޓް ހިނގާފައި ވެއެވެ. މަގުމަތީގެ ރައްކާތެރިކަމަށް އާއްމުން ހޭލުންތެރިކަން ކުރުމުގެ ގޮތުން ފުލުހުން ދަނީ ފުޅާ ދާއިރާއެއްގައި އެކި ޕްރޮގްރާމްތައް ބާއްވަމުންނެވެ.
