ކުރީގެ ސަރުކާރުން ވަނީ މާފަރު އެއަރޕޯޓް ތަރައްގީކުރަން ރިޝްވަތު ނަގާފައި: ރައީސް ނަޝީދު
މާފަރު އެއަރޕޯޓް އަޅަމުން އަންނަނީ އަބޫދާބީ ފަންޑު ފޯރ ޑިވެލޮޕްމަންޓް ޕްރޮގްރާމުން
ރައީސް ނަޝީދަށް މަރްހަބާ ދެންނެވުމަށް މާފަރު ބަނދަރަށް އެއްވި ރައްޔިތުންނާއި އެކު އެމަނިކުފާނު ފޮޓޯ ނަންގަވަނީ
މާފަރު އެއަރޕޯޓްގެ މަސައްކަތް އެއްކޮށް ނުނިމި ލަސްވެފައިވަނީވެސް ކުރީގެ ސަރުކާރުން އެއަރޕޯޓް ތަރައްގީ ކުރަމުން އައި ބޭރުގެ ކުންފުނިން ރިޝްވަތުގެ ކަޅު ފާއިސާ ނަގާފައި އޮތުމުން ކަމަށް ކުރީގެ ރައީސުލްޖުމްހޫރިއްޔާ އަދި އެމްޑީޕީގެ ރައީސް މުހައްމަދު ނަޝީދު ވިދާޅުވެއްޖެއެވެ.
19 ވަަނަ ރައްޔިތުންގެ މަޖިލީހުގެ މަަނަދޫ ދާއިރާއަށް އެމްޑީޕީގެ ޓިކެޓްގައި ވާދަކުރައްވާ އަހްމަދު ހާރޫންއަށް ތާއީދް ހޯއްދެވުމަށް ނ. މާފަރަށް ވަޑައިގެން އެ ރަށުގައި އޮތް ހާރޫންގެ ކެމްޕެއިން ޖަލްސާގައި ވާހަކަފުޅު ދައްކަވަމުން ރައީސް ނަޝީދު ވިދާޅުވީ، ކުރީގެ ރައީސް ޔާމީންގެ ސަރުކާރުން މާފަރު އެއަރޕޯޓް ތަރައްގީ ކުރަމުން އަންނަ ބޭރުގެ ކުންފުނިން ރިޝްވަތުގެ ކަޅު ފާއިސާއަށް އަބަދުމެ، އެބޭފުޅުންގެ ސަރުކާރު އޮތް އިރު އެދެމުން ދިޔަ ކަމަށެވެ.
މާފަރު އެއަރޕޯޓް އަޅަމުން އަންނަނީ އަބޫދާބީ ފަންޑު ފޯރ ޑިވެލޮޕްމަންޓް ޕްރޮގްރާމުންނެވެ.
ރައީސް ޔާމީންގެ ވެރިކަމުގައި ރިޔާސީ އިންތިޚާބާއި ދިމާކޮށް 28 އޮގަސްޓް 2018 ވަނަ އަހަރު މާފަރުގެ އެއަރޕޯޓްގައި ވަނީ ޓެސްޓް ފްލައިޓެއް ޖައްސާ އެއަރޕޯޓް ހުޅުވާފައެވެ. ނަމަވެސް އަދިވެސް އެއަރޕޯޓްގައި އިތުރު ފްލައިޓެއް ޖައްސާފައިނުވާއިރު، އެއަރޕޯޓްގެ އަަމަލީ މަސައްކަތް އަދިވެސް ދަނީ ކުރިއަށެވެ.
ރައީސް ނަޝީދު ވިދާޅުވީ މާފަރު އެއަރޕޯޓް ތަރައްގީ ކުރަމުން އަންނަ އަބޫދާބީގެ ކުންފުނިން އަންނަނީ ރައީސް އިބްރާހިމް މުހައްމަދުގެ ސޯލިހުގެ ސަރުކާރާއި ވާހަކަދައްކަމުން ކަމަށާއި، މި ސަރުކާރުން އެ ޕްރޮޖެކްޓް ނުހުއްޓުވާނެ ކަމަށެވެ. ރައީސް ނަޝީދު ވިދާޅުވީ ރިޝްވަތެއް ދޭން އެމީހުން ކައިރީ މި ސަރުކާރުން ނުބުނާނެ ކަމަށާއި، މި ސަރުކާރުން ރިޝްވަތުގެ ހުތުުރު ފާއިސާ ހޯދައިގެން އެއްވެސް މަޝްރޫއެއް ކުރިއަށް ނުގެންދާނެ ކަމަށެވެ.
19 ވަނަ ރައްޔިތުންގެ މަޖިލީހުގެ އިންތިޚާބުގައި މައްޗަންގޯޅި މެދު ދާއިރާއަށް ވާދަވެސްކުރައްވާ ރައީސް ނަޝީދު ވިދާޅުވީ ރިޝްވަތުގެ ފާއިސާއިން ޕްރޮޖެކްްޓްތައް ހިންގުން އެއީ ތަރައްގީ ހޯދުން ނޫން ކަަމަށެވެ.
ރާއްޖޭގެ އާންމު ރައްޔިތުންގެ ހާލަތު ރަނގަޅު ކުރުމަށް އިންސާފު ނުހަނު ބޭނުންވެފައިވާ ކަމަށާއި، އެކަން ރައްޔިތުންނަށް ވެގެންދާނީ އެޖެންޑާ 19 އިން ކަމަށް ރައީސް ނަޝީދު ވިދާޅުވިއެވެ. ދިރިއުޅުމުގައި ދިމާވާ ހުރިހާ މައްސަލަތަކުގެ ހައްލަކީ އެޖެންޑާ 19 ކަމަށާއި، އެއީ ބޯހިޔާވަހިކަމާއި، އިންސާފު ފަދަ މުހިންމު ކަންތައް ކަމަށް ރައީސް ނަޝީދު ވިދާޅުވިއެވެ.
މަނަދޫ ދާއިރާގައި ހިމެނެނީ ލަންދޫ، މާފަރު، މަނަދޫއެވެ. މާފަރުގެ އާބާދީ އަކީ 1207 މީހުންނެވެ.
