ސްޕެނިޝްލީގުގައި ބަރސެލޯނާ އާއި އެސްޕަންޔޯލް ވާދަކުރި މެޗު ބަރސެލޯނާ ކާމިޔާބު ކޮށްފިއެވެ. 

 ހޮނިހިރު ދުވަހުގެ މެޗު ބަރސެލޯނާ ކާމިޔާބުކުރީ އެސްޕަންޔޯލްއާއި ވާދަކޮށް 0-2 ނަތީޖާއަކުންނެވެ. 

މެޗު ފެށިގެން ބަރސެލޯނާގެ ފަރާތުން ރަނގަޅު ކުޅުމެއް ފެނިގެން ގޮސްފައިވާއިރު ގިނަ ވަގުތު ބޯޅަ ކޮންޓްރޯލްކޮށްގެން ކުޅެފައިވަނީ ވެސް ބަރސެލޯނާއިންނެވެ. 

މެޗުގެ ފުރަތަމަ ހާފްގައި އެސްޕަންޔޯލްގެ ގޯލާއި އަމާޒުކޮށް ބަރސެލޯނާއިން ރަނގަޅު ހަމަލާތަކެއް ދިން ނަމަވެސް އެސްޕަންޔޯލްގެ ކީޕަރު ވަނީ ހަމަލާތައް ދިފާއުކޮށްފައެވެ. 

ފުރަތަމަ ހާފް ނިމުނީ 0-0 ގެ ނަތީޖާއަކުން ދެ ޓީމް އެއްވަރު ވެގެންނެވެ. 

ބާރސެލޯނާގެ ދަނޑުގައި ކުޅުނު މި މެޗުގެ ދެވަނަ ހާފްގައި ބަރސެލޯނާގެ ކުޅުން ރަނގަޅުކޮށް އެސްޕަންޔޯލްގެ ފަހަތަށް ބާރު ބޮޑުކުރިއެވެ. ނަތީޖާއެއްގެ ގޮތުން ކެޕްޓަން ލިއޮނަލް މެސީއަށް ލިބުނު ރަނގަޅު ފުރުސަތެއްގެ ބޭނުންހިފައި މެޗުގެ 71 އެއްވަނަ މިނެޓުގައި މެސީ އެ ޓީމަށް ލީޑް ނަގައިދިނެވެ. 

މެސީގެ ލަނޑާއެކު ނަތީޖާ ހަމަހަމަ ކުރުމަށް އެސްޕަންޔޯލްއިން މަސައްކަތް ކުރިއެވެ. އެހެން ނަމަވެސް އެ ޓީމަށް ވަނީ މާއެދެވޭ ކުޅުމެއް ކުޅެވޭގޮތް ނުވެފައެވެ. 

މެޗުގެ 89 ވަނަ މިނެޓުގައި ބަރސެލޯނާގެ ދެވަނަ ލަނޑު އެ ޓީމަށް ކާމިޔާބުކޮށް ދިނީ މެލްކަމް ފިލިޕްގެ އެހީތެރި ކަމާއިއެކު ލިއޮނަލް މެސީއެވެ. 

މި ނަތީޖާ އާއިއެކު ބާސެލޯނާ އެއްވަަނައިގައި އޮތީ 29 މެޗުން 69 ޕޮއިންޓާ އެކު އެވެ، ދެ ވަނައިގައި އޮތް އެތުލެޓިކޯ މެޑްރިޑް ރޭ 4-0 އިން އަލަވޭސް ބަލިކުރިއިރު، އެ ޓީމު ދެ ވަނައިގައި އޮތީ 29 މެޗުން 59 ޕޮއިންޓާ އެކު އެވެ. ތިން ވަނައިގައި އޮތް ރެއާލް މެޑްރިޑްގެ އޮތީ 28 މެޗުން 54 ޕޮއިންޓެވެ.