އިންޓަރ ކޮލެޖް ވޮލީބޯޅަ މުބާރާތް އެމްއެންޔޫ ކާމިޔާބު ކޮށްފި

ވޮލީބޯލް އެސޯސިއޭޝަން އޮފް މޯލްޑިވްސްއިން ކުރިއަށް ގެންދިޔަ އިންޓަރ ކޮލެޖް ވޮލީބޯޅަ މުބާރާތް މޯލްޑިވްސް ނެޝަނަލް ޔުނިވަރސިޓީ (އެމްއެންޔޫ) ކާމިޔާބު ކޮށްފިއެވެ.

މުބާރާތުގެ ފިރިހެން އަދި އަންހެންބައިގެ ޗެމްޕިއަންކަން އެމްއެންޔޫ ހޯދި މިއީ ތިންވަނަ ފަހަރެވެ.

ޒުވާނުންގެ މަރުކަޒު އެތެރެ ހޯލުގައި ހޮނިހިރު ދުވަހު ކުޅުނު މެޗު އެމްއެންޔޫގެ ފިރިހެން ޓީމް ކާމިޔާބުކުރީ ފައިނަލުގައި ވިލާ ކޮލެޖް ބަލި ކޮށްގެންނެވެ.

މެޗުގެ ފުރަތަމަ ދެ ސެޓު އެމްއެންޔޫ 22-25، 18-25, ގެންދިިޔައިރު ތިންވަނަ ސެޓު 21-25 ގެ ނަތީޖާއަކުން ކާމިޔާބުކުރީ ވިލާ ކޮލެޖުންނެވެ. ހަތަރުވަނަ ސެޓުވެސް 22-25 ވިލާ ކޮލެޖް ކާމިޔާބު ކޮށްފައިވަނިކޮށް ފަހު ސެޓު 9-15 ގެ ނަތީޖާއަކުން ކާމިޔާބު ކުރީ އެމްއެންޔޫއިންނެވެ.

މެޗުގެ މޮޅު ކުޅުންތެރިއާގެ މަގާމު ލިބުނީ މުބާރާތުގައި ރަނގަޅު ކުޅުމެއް ދެއްކި ޝަމާއިލް ހުސައިންއެވެ. ޝަމާއިލް ވަނީ މުބާރާތުގެ ފިރިހެންބައިގެ ޑްރީމް ޓީމްގައި ވެސް ހިމެނިފައެވެ. އޭނާގެ އިތުރުން ޑްރީމް ޓީމުގައި ހިމެނުނީ ވިލާ ކޮލެޖްގެ މުހައްމަދު އަލީ އެ ކޮލެޖްގެ އަހުމަދު މުހައްމަދު، ސައިރިކްސް ކޮލެޖްގެ އަހުމަދު ރަޒްނީ މުހައްމަދުގެ އިތުރުން އެމްއެންޔޫގެ މުހައްމަދު ޝަމްވީލްއާއި މުހައްމަދު ޝާމްއެވެ.

އިންޓަރ ކޮލެޖް ވޮލީބޯޅަ މުބާރާތުގެ އަންހެންބައިގެ ޗެމްޕިއަންކަން އެމްއެންޔޫ ހޯދީ ފައިނަލުގައި ސައިރިކްސް ކޮލެޖް ބަލިކޮށްގެންނެވެ.

މެޗުގެ ފުރަތަމަ ސެޓު 12-25 ގެ ނަތީޖާއަކުން ސައިރިކްސް ކާމިޔާބު ކޮށްފައި ވަނިކޮށް ފަހަތުން އަރައި ފަހު ތިން ސެޓު އެމްއެންޔޫ ގެންދިޔައީ 13-25، 17-25 އަދި 21-25 ގެ ނަތީޖާއަކުންނެވެ.

މެޗުގެ މޮޅު ކުޅުންތެރިއަކަށް ހޮވުނީ ވޮލީބޯލް އެސޯސިއޭޝަން ކަޕްގެ އުންމީދީ ކުޅުންތެރިއެއްގެ ގޮތުގައިވެސް ހޮވިފައިވާ ޝަހާ ޝާމިންއެވެ.

މުބާރާތުގެ އަންހެންބައިގެ ޑްރީމް ޓީމުގައި ހިމެނުނީ އެމްއެންޔޫގެ ޝަހާ ޝާމިން، ޝާގް އިބްރާހިމް، ފާލާ އަބޫބަކުރު، ޝަރދާ އިޔާޒް އަދި ސައިރިކްސް ކޮލެޖްގެ އާމިނަތު ރާޝިދާގެ އިތުރުން އައިޝަތު އަފްނާން އަހުމަދުއެވެ.