އިދިކޮޅު ފަރާތްތަކުން އިންތިހާބު ފަސްކުރުމަށް މަސައްކަތްކުރާކަމުގެ އަޑުތައް އިވިވަޑައިގެންފައިވާކަމަށާއި، އެކަމަށް ސަމާލުވެ ހުންނެވި ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހް ވިދާޅުވެއްޖެއެވެ. 

ކެމްޕޭން ދަތުރުފުޅުގައި ތިލަދުންމައްޗަށް ވަޑައިގެން، ހަނިމާދޫ ރައްޔިތުންނާއި މުހާތަބުކުރައްވާ ވާހަކަފުޅު ދައްކަވަމުން ރައީސް ސޯލިހް ވިދާޅުވީ، އާދައިގެ މަތިން އިންތިހާބު ފަސްކުރަން އުޅޭ ކަމުގެ އަޑުތައް އިވިވަޑައިގެންފައިވާ ކަމަށެވެ. އަދި އެއީ ޕީޕީއެމުން ވެރިކަމުގައި އޮތް އިރު ވެސް މަސައްކަތްކުރެއްވި ގޮތް ކަމަށާއި، ނަމަވެސް އެކަމަށް ހުންނެވި ވަރަށް ބޮޑަށް ސަމާލުވެ ކަމަށް ރައީސް ވިދާޅުވި އެވެ. 

"އިރާދަކުރެއްވިޔާ އިންތިހާބު ބާއްވަން އިލެކްޝަންސް ކޮމިޝަނުން ކަނޑައަޅާފައިވާ 6 އޭޕްރީލްގައިި މި އިންތިހާބު ބޭއްވިގެންދާނެ" 

ރައީސް ސޯލިހް ވިދާޅުވީ ކެމްޕޭނަށް ނިކުމެވަޑައިގެންނެވީ ޤައުމު ކުރިއޮތް ހާލަތަށް ދާ މަންޒަރު ފެނިވަޑައިގަންނަވާތީ ކަމަށެވެ. އަދި އެއީ ރައްޔިތުން ވެސް ބޭނުންވާ ގޮތް ނޫން ކަމަށް ރައީސް ސޯލިހް ވިދާޅުވިއެވެ. އެ މަނިކުފާނު ވަނީ ކުރީގެ ރައީސް އަބްދުﷲ ޔާމީނަށް ވެސް މި ޖަލްސާގައި ވަރަށް ބޮޑަށް ފާޑުވިދާޅުވެފައެވެ. 

އިންތިހާބު ފަސްކުރަން އުޅޭކަމުގެ އަޑުތައް އިވިވަޑައިގެންފައިވާ ކަމަށް ރައީސް ސޯލިހް ވިދާޅުވިއިރު، އިލެކްޝަންސް ކޮމިޝަނުން އާދިއްތަ ދުވަހު ބޭއްވި ނޫސްވެރިންގެ ބައްދަލުވުމުގައި އެ ކޮމިޝަންގެ ރައީސް އަހުމަދު ޝަރީފް ވިދާޅުވީ އިންތިހާބު ފަސްކުރަންޖެހޭ އެއްވެސް ހާލަތެއް ނެތް ކަމަށެވެ. ނަމަވެސް ރިސޯޓްތަކުގައި ވޯޓުލުމަށް ރަޖިސްޓްރީވުމަށް އެކަށީގެންވާ ފުރުސަތު ނުލިބޭ ކަމަށް ބުނެ ބައެއް ފަރާތްތަކުން އިންތިހާބު ފަސްކުރުމަށް މަަސައްކަތްކުރާކަމުގެ މައުލޫމާތު ލިބިވަޑައިގެންފައިވާ ކަމަށެވެ. 

ޝަރީފް ވިދާޅުވީ ކެމްޕޭން ކުރުމަށް ވެސް، އަދި އެހެން ކަންތައްތަކަށް ވެސް ޤާނޫނުގައި ކަނޑައަޅާފައިވާ މުއްދަތުތައް ދީފައިވާ ކަމަށެވެ. އެހެންކަމުން އިންތިހާބު ފަސް ކުރުމަށް އެއްވެސް ފުރުސަތެއް ނުލިބޭނެ ކަމަށް އޭނާ ވިދާޅުވިއެވެ.