ޖެމްސް އެކަޑަމީގެ ނަމުގައި ނެޓްބޯލް އެކަޑަމީއެއް ހަދައި އެ އެކަޑަމީގައި ބައިވެރިވުމުގެ ފުރުސަތު ހުޅުވާލައިފިއެވެ. 

ވިލާ ކޮލެޖް ކުރިމަތީގައި އޮންނަ ނެޓްބޯލް ކޯޓުގައި ހޮނިހިރު ދުވަހު ޖެމްސް އެކަޑަމީގެ އޯޕަންޑޭ ވަނީ ކުރިއަށް ގެންގޮސްފައެވެ.

އެކަޑަމީގެ ފައުންޑަރ އަދި ކޯޗް ފާތިމަތު ރިޝްމާ ރާއްޖެ އެމްވީއަށް މައުލޫމާތު ދެމުން ބުނީ، ޖެމްސް އެކަޑަމީ އުފެދިގެނެއައީ ނެޓްބޯޅައަށް ހުންނަ ޝައުގުވެރިކަމެއްގެ ސަބަބުން މުސްތަގުބަލުގައި ނެޓްބޯލް އިތުރަށް ކުރިއަރުވައި، ގައުމީ ފެންވަރަކަށް ތަމްރީނުވެފައިވާ ނެޓްބޯޅަ ކުޅުންތެރިން ތަކެއް އުފެއްދުމުގެ މަގުސަދުގައި ކަމަށެވެ.

ޤައުމީ ޓީމްގެ ކުޅުންތެރިޔާ އަދި ޖެމްސް އެކަޑަމީގެ ކޯޗް އީމާ އަބްދުއްސައްތާރު ބުނީ މިހާތަނަށް އާންމުންގެ ފަރާތުން ރަނގަޅު އެއްބާރުލުމެއް އެކަޑަމީއަށް ލިބެމުންދާ ކަމަށާއި، ގިން އަދަދެއްގެ ކުދިން އެކަޑަމީއާއި ގުޅެމުންދާ ކަމަށެވެ. 

ޖެމްސް ނެޓްބޯލް އެކަޑަމީގައި އުމުރުން އަށް އަހަރުން ފެށިގެން 16 އަހަރާ ދެމެދުގެ ކުދިންނަށް ބައިވެރިވުމުގެ ފުރުސަތު ހުޅުވާލާފައިވާއިރު އެ އެކަޑަމީން ބުނީ މާރޗް 30 ވަނަ ދުވަހު ފުރަތަމަ އޯޕަން ޑޭ ބޭއްވިކަމުގައި ވީނަމަވެސް ވީހާވެސް ގިނަ ކުދިންނަށް ފުރުސަތު ދިނުމަށްޓަކައި އޭޕްރިލް މަސްތެރޭ އިތުރު ޓްރަޔަލް ޑޭއެއް ބޭއްވުމަށް ޕްލޭން ކުރަމުންދާ ކަމަށެވެ. 

އެކަޑަމީގައި ބައިވެރިވުމަށް ރެޖިސްޓްރޭޝަން ފީގެ ގޮތުގައި 200 ރުފިޔާ ދައްކަން ޖެހޭއިރު، މަހު ފީގެ ގޮތުގައި 300 ރުފިޔާ ނެގުމަށް ހަމަޖެހިފައި ވާކަމަށް އެ އެކަޑަމީން މައުލޫމާތު ދެއެވެ. މީގެ އިތުރުންވެސް އެ އެކަޑަމީން ބުނެފައިވަނީ، ޖެމްސް ނެޓްބޯލް އެކަޑަމީގައި ބައިވެރިވާން ބޭނުންވާ ކުދިން އެ އެކަޑަމީގެ އީމެއިލްއަށް މެއިލް ކުރުމުގެ ފުރުސަތު ހުޅުވައި ލެވިފައި ވާކަމަށެވެ. 

ނެޓްބޯލް އެސޯސިއޭޝަން އޮފް މޯލްޑިވްސްއިން މީގެ ކުރިން ޔޫތު ޑިވަލޮޕްމެންޓް ޕްރޮގްރާމް ހިންގާފައިވާއިރު، އެ ޕްރޮގުރާމުގެ ދަށުން އެކި އުމުރުފުރާ ތަކުގެ ގިނަ އަދަދެއްގެ ކުދިން ތަމްރީންކޮށްފައިވެއެވެ. 

ނެޓްބޯލް އެސޯސިއޭޝަންގެ އިތުރުން އަމިއްލަ ފަރާތްތަކުން ނެޓްބޯޅަ ކުރިއެރުވުމަށާއި، އިތުރުކުދިން ތަމްރީނު ކުރުމަށް ގިނަ މަސައްކަތްތަކެއް އަބަދުވެސް ކުރަމުން ގެންދެއެވެ.