އައިޖީއެމްއެޗް ކިޔޫގައި ޖެހުމަށް ދާއިމީ ހައްލު: ހޮސްޕިޓަލް ސޮފްޓްވެއާ
ކޮންމެ ތިން މަހަކުން ކިޔު ތަރުތީބު ކުރުމުގެ މަސައްކަތް ކުރަމުންދާ ކަމަށް ސަލީމް ވިދާޅުވި
އައިޖީއެމްއެޗް
އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް) އިން ކިޔޫގައި ޖެހިގެން ޑޮކްޓަރަށް ދެއްކުމަށް ދާއިމީ ހައްލެއް ހޯދައިދިނުމުގެ ގޮތުން ހޮސްޕިޓަލް ސޮފްޓްވެއާއެއް ހޯދުމުގެ މަސައްކަތް ކުރަމުންދާ ކަމަށް އައިޖީއެމްޗްގެ ސީއީއޯ އިބްރާހިމް ސަލީމް (ކުޑަ ބަންދޭ) ވިދާޅުވެއްޖެއެވެ.
ރާއްޖެ.އެމްވީ އަށް ދެއްވި ހާއްސަ އިންޓަވިއުއެއްގައި ސަލީމް ވިދާޅުވީ، ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހުގެ 100 ދުވަހުގެ ވައުދުތަކުގެ ތެރޭގައި ހިމެނޭ, އައިޖީއެމްއެޗުގައި ޚިދުމަތުގެ ކިޔޫއަށް ލުޔެއް ލިބިގެންދާނެ ގޮތަކަށް ނިޒާމަށް ބަދަލުތަކެއް ގެނައުމަށް މިހާރުވެސް މަސައްކަތްތަކެއް ކުރަމުންދާ ކަމަށެވެ.
އެގޮތުން ކޮންމެ ތިން މަހަކުން ކިޔޫ ތަރުތީބު ކުރުމުގެ މަސައްކަތް ކުރަމުންދާ ކަމަށާއި، މަގާމާއި ހަވާލުވެވަޑައިގަތް ފަހުން އެއްބުރު ކިޔޫ ތަރުތީބު ކޮށްފައިވާ ކަމަށް ސަލީމް ވިދާޅުވިއެވެ.
''މާނައަކީ މިތާ އެޕޮއިންޓްމެންޓް ހަދާފައި ތިބި މީހުންނަށް އަޅުގަނޑުމެން އެސްއެމްއެސް އެއް ފޮނުވާނީ. ފޮނުވާފަ އެ އެޕޮއިންޓްމެންޓް ކޮންފޯމްތޯ 72 ގަޑިއިރު ތެރޭގައި އަޅުގަނޑުމެން އާހަނަން'' ސަލީމް ވިދާޅުވިއެވެ.
ސަލީމް ވިދާޅުވީ، ބައެއް ފަހަރު އެޕޮއިންޓްމެންޓް ރިކުއެސްޓް ކޮށްފައިވާ ފަރާތްތަކުން އެހެން ތަނަކުން ހިދުމަތް ހޯދާފައި އެޕޮއިންޓްމެންޓް ކެންސަލް ނުކޮށް ހުންނަ ފަހަރުތަކާ ދިމާވާ ކަމަށެވެ. އެހެން ވުމުގެ ސަބަބުން ކިޔޫގައި އެޕޮއިންޓްމެން ގިނަވަމުންދާ ކަމަށް ވިދާޅުވިއެވެ.
އައިޖީއެމްޗްގެ ސީއީއޯ އިބްރާހިމް ސަލީމް ރާއްޖެ.އެމްވީއަށް އިންޓަވިއު ދެއްވަނީ
ސަލީމް ވިދާޅުވީ، އެޕޮއިންޓްމެންޓް ރީކޮންފަރމް ކުރުމުގެ ގޮތުން އިތުރު އެސްއެމްއެސްއެއް ފޮނުވައި 72 ގަޑިއިރު ތެރޭ ރީކޮންފަރމް ކުރަން ޖެހޭނެ ކަމަށެވެ. އެހެން ކަންތައް ކުރުމުން އަސްލު ހިދުމަތް ބޭނުންވާ ފަރާތްތައް ދެނެގަނެވޭނެ ކަމަށް އޭނާ ވިދާޅުވިއެވެ.
''މުސްތަގުބަލްގައި މި ކަހަލަ ކަންތައް. ކިޔޫ ތަރުތީބު ކުރާކަށް ނުޖެހޭނެ. ހޮސްޕިޓަލް ސޮފްޓްވެއާ ގެނައިމަ. އަޅުގަނޑުމެން މިހާރު މިއުޅެނީ އެ މަރުހަލާގައި. ސޮފްޓްވެއާ އެއް ހޯދުމުގެ މަސައްކަތުގައި.. ދާއިމީ ހައްލެއް އަންނާނީ ހޮސްޕިޓަލް އޮޓްމޭޝަން ސިސްޓަމެއް އައިސްގެން. އޭރަށް ވާނެ ގޮތަކީ މުޅި ހޮސްޕިޓަލްގެ އޮޓޮމޭޓްވާނެ. މިހާރު މި ހުންނަނީ ޕާޝަލްކަންކަން ކޮށްފައި'' އައިޖީއެމްއެޗްގެ ސީއީއޯ ވިދާޅުވިއެވެ.
ސަލީމް ވިދާޅުވީ، ސޮފްޓްވެއާ ގެނެވުމުން ކިޔޫގެ ކަންތައްތަކާއި، ޑޮކްޓަރަށް އެޕޮއިންޓްމެންޓް ހެއްދުން ފަދަ ކަންތައްތަކަށް ފަސޭހަވެގެން ދާނެ ކަމަށެވެ. އަދި އައިޖީއެމްއެޗްއުން ދުވާލަކު 4،000 މީހުން ޚިދުމަތް ހޯދަމުންދާއިރު، މިހާރު ހަދަމުންދާ ދަރުމަވަންތް ހޮސްޕިޓަލުގެ ހަތަރު ފޮލޯ ހުޅުވަން ތައްޔާރުވެފައިވާ ކަމަށް ސަލީމް ފާހަގަ ކުރެއްވިއެވެ.
އައިޖީއެމްއެޗްއިން މިހާރުވެސް ދަނީ އެ ހޮސްޕިޓަލްގެ ވެބްސައިޓް މެދުވެރިކޮށް ޑޮކްޓަރުންނަށް ވެއިޓްލިސްޓް ކުރުމާއި، ލެބް ރިޕޯޓް ދޫކުރުމުގެ ޚިދުމަތް ދެމުންނެވެ.
